Read Tangkhul Naga HAOKAPHOK 19 Bible Online

HAOKAPHOK 19 - Tangkhul Naga bible

HAOKAPHOK 19

¹Sodomwui ngaveili Lot pamda leilakha kazingrao khani chi ngazinshong Sodomli tarāsai. Anili theikhaleoda Lotna vāngaroka, kala ngakhumshāmhailaga,

²ana hānga, “Amei khani, arui ngayā narao iwui shimli ungngasāmkhuilu, kala pheipāng pheokhuilu, chiwui thili ngathorthakva̱ ngakarthuida zatnaolu.” Anina hānga, “Masāpaimara, ini shongfali pisangra.”

³Kha ana anili panglāk eina kahāngwui vang ashi shimli unga; kala kashakazā khamathā kala khawok makazang khamui ngarānmida athum phāshak phāzai.

⁴Kha athumna ngayā mapiranglakha Sodom keinungwui mibing khararnaosan mateila katongana shim chi rākuinamhaowa;

⁵ kala athumna Lotli hoda, “Arui ngayā nashiwuili kharā kha̱mi chi kali leikhala? Anili hili khuishoklu, ngasovaiga.”

⁶Lotna khanukshong eina shokta, awui thili khāmong shungnamhailaga

⁷hānga, “Ichināngarā, ina nathumli kapona, hiyākha sāshida masaalu.

⁸Yanglu, mayarnao matheilakrang kaji inao ngalāva̱ khani leili; ina anili chishotka, nathumwui ningkachāng sālu; kha mi khani hili khikha mathāmialu, kaja ani iwui shimli rāzang kahaina.”

⁹Kha athumna hānga, “Shongfa chikālu!” kala athumna hānga, “Mipa hi kha̱mi sāda rālaga bichar sāki jikhaningli! Anipāli hailaklaga napāli sakmeida sātha̱ra.” Chieina athumna Lotli namrada khāmong sākhai khavai vai.

¹⁰Kha mi khani china pāng katingshokta Lotli aniwui ngalemli shimlungshong khuikāhaowa, kala khāmong shungnamhaowa.

¹¹ Kala anina shim chiwui khāmong ngalemli khalei khararnaosan katongali mik ngapeomiserhaida khāmong phākachupzatuwa.

¹²Chiwui thili anina Lotli hānga, “Hili nashi mi khangatei khaleila? Narihā ngarā, naomayara ngarā, naongalāva̱ ngarā, maningakha nawui mi keinungli khalei athumli apam hiwui eina khuishokserhaolu;

¹³kaja apam hi inina shimān ngasaki jihaira; kachiwui vangkhala kaja hiwui mibingli chupchup khamatui PROHOwui miktāli marnāhaira, chieina shimān ngasak khavai PROHOna inili kachihona.”

¹⁴Chieina Lotna anao ngalāva̱ khanili ngakumki kaje arihā khani chili ahoi, “Ngakarthuida apam hiwui eina thuiulu; khikhala jila keinung hi PROHOna shimān ngasakki jihaira.” Kha arihā khanina ngashankasāna jihaowa.

¹⁵Ngathor kazing kathang eina kazingraobing china Lotli, “Ngakarthuida napreiva̱ eina nanao ngalāva̱ khani khalei hi khuithuiulu, chi maningakha keinungwui kashong khalāngli nathumla shimānnarhaipaishina.” da malung katunglak eina hānga.

¹⁶ Kha ana ningchungpamhaowa; chithālala PROHOna ali lumashanhaoda alila apreiva̱lila kala anao ngalāva̱ khanilila mi khani china athumwui pāngli yonkhuilaga keinungwui ayarli khuishoka.

¹⁷Athumli khuishok kahaiwui thili hānga, “Mathi khavai yāmulu, khanuk makapeiungalu; kala tampāklungli mangasāmlakalu; phungreishong yāmkāhaolu, maningakha nathumlila chuithathaora.”

¹⁸Kala Lotna athumli ngahānkai, “Chi mathāmilu, amei ngarā;

¹⁹yanglu, narao ili ngahānngailak eina lukhamashan kachungkha chitheimida imanglā huimihaira; kha ina phungreili mayāmvārarmara, kaja kalāshāt china rāngaphankhuida ila thirumhaora.

²⁰Yanglu, araa chili kathei keinungnao chi teolaka, katāla matāmana, ina chili ngayinkhuika, apam kateonao chili mavāngayinkhuipaimarala?”

²¹Ana ngahānkai, “Yanglu, nana kapo hila mayāmihaoga, kaja nana kahāng keinung chi masākhaimimara.

²²Thākta chili yāmvaulu; kaja nathum chili mavāshungranglakha ina khikha masāpaithura.” Chiwui vang eina keinung chili Zoar da hoi.

²³Lotna Zoarli vākashung chitharān zimik shokhairasai.

²⁴ Chiwui thili PROHOna Sodom eina Gommorrahwuitungli kazingramwui eina meiri rotā ngasaka;

²⁵kala keinung khanini shimān ngasaka, tampākla, keinung chili okathui mi saikora, kala ngaleitungli kakhārra akhala mashāklakmana.

²⁶ Lotwui khanukshong kazata apreiva̱na yangkhaungwui vang machiwui pakra̱ sāthuihaowa.

²⁷Ngathorthakva̱ Abrahamna ana PROHOwui mangāli nganing khavai pam chili vai;

²⁸ kala ana Sodom eina Gomorrahshong kala tampāk chiwui apam saikorali ngashānkhayang eina, yanglu, apam chiwui meikhut chi mei shātkharungwui thāda thei.

²⁹Chithāda Lotna somkasa tampāk chiwui keinungbing chi shimān khangasak chitharān Varena Abrahamli phaningungmida Lotli keinung chiwui eina shokngasakhaowa.

³⁰Chiwui thili Lotna Zoarli mapamlengthuda, anao ngalāva̱ khanili ngasoda phungreili apama; kala athum lungkhur akhali apama.

³¹Khararva̱ china agatuiva̱li hānga, “Ishāvā sārhaira, kala okathuiwui khangachā zatkhanā thāda inili ngakum khavai okathuili mayarnaola maleilākthura.

³²Chieina rālu, ishāvāli marip ngasakhailaga ini ali ngasopisa; chithākha iniwui nao ishāvāwui eina samphangda amachi leipaira.”

³³Chithang ngayā anina avāva̱li marip ngasakhaowa, kala khararva̱na avāva̱li kāngasopiya; kha katharān kāpi, katharān thuihao kaji avāva̱na matheimana.

³⁴Akhama kathā khararva̱ china agatuiva̱li hānga, “Yanglu, angayā ina ishāvāli ngasopihaira, ajala marip ngasakluida ashama nani ngasopilu; chithāda sāda iniwui nao ishāvāwui eina samphangda amachi leipaira.”

³⁵Chieina chithang ngayāla anina avāva̱li marip ngasakluishita; kala agatuiva̱na avāva̱li kāngasopiya; kha katharān kāpi, katharān thuihao kaji avāva̱na matheimana.

³⁶Chithāda sāda Lotwui naongalāva̱ khanini chi avāva̱wui nao vaithathuihaowa.

³⁷Khararva̱na mayarnao akha pharai; kala aming Moab hoi. Aja ana Moab mibingwui avāva̱na.

³⁸Khanganuiva̱nala mayarnao akha pharai, kala Ben-ammi hoi; aja ana Ammon mibingwui avāva̱na.