Read Tangkhul Naga HAOKAPHOK 2 Bible Online

HAOKAPHOK 2 - Tangkhul Naga bible

HAOKAPHOK 2

¹Chithāda sāda kazingram eina okathui kala chiwui alungli khalei aning-anang saikora sākuphaowa.

² Kala kashinethang Varena ana sāda khalei saikora kupserhaowa, kala kashinethang chi ngasāmkhui.

³Chieina Varena kashinethang chi somida tharngasaka, kaja Varena sākahai saikora kuphaida chithang ngasāmkhui.

⁴Kazing eina ngalei kasā tharanwui thotbing chi hina. PROHO Varena kazing eina ngalei sāthang,

⁵ngaleitungli akhar maleisāmana, kala luiwui thingnā-ra̱hābing makhārshokrangsai kaja PROHO Varena atam chitharan okathuili zingrot marotāmisāmana, kala lui vākhavai mi khipākha maleisāmana;

⁶kha ngaleiwui eina leijui ngapānkālaga okathui katongali tara̱ chaimi —

⁷ Chiwui thili PROHO Varena ngaleiwui chifa eina mi sākhui, kala nātangkhurli kharingwui khakkhā suisangmi; chieina mi chi kharinga ngasāhaowa.

⁸Kala PROHO Varena zingshoshong, Edenli yāmgui akha sākhuida ana sākakhuia mi chi chili chipama.

⁹ Kala ngaleiwui eina mik khangayama kala kashakazā sākapai thingrong ayur ayāyāva̱ phorngasaka. Yāmgui chiwui alungthungli kharingawui thingrong kala kashi-kaphā kathei thingrongla phorngasaka.

¹⁰Yāmgui chili tara̱ chaimi khavai Edenwui eina kong akha longshoka, kala chiwui eina ngayarkhaida kong mati ngasāhaowa.

¹¹Khare chiwui aming Pishon hoi; sinā khaleipam Havilah ngaleili kuimareida khalonga kong china;

¹²chiwui sinā mathālaka; bdellium kala onyxla samphanga.

¹³Kakhane kong chiwui aming Gihon hoi; Cush ngalei kuimareida khalong kong china.

¹⁴Kala Assyriawui zingshoshong khalonga Tigris kong china kakathumana. Kala khamate chi Euphratesna.

¹⁵PROHO Varena mi chi Eden yāmgui sāmathā khavai kala mayon khavai chili hai.

¹⁶Kala PROHO Varena mi chili kasoda hānga, “Yāmguiwui alungli khalei thingrong kachiva̱wui athei shaipaira;

¹⁷kha kashi-kaphā theithangmei khavai thingrongwui athei chi mashaipaimara, kaja chi shaithang na thira.”

¹⁸Chiwui thili PROHO Varena hānga, “Mi hi amāng kapam maphāthura; awui vang kachā ngachonme akha sākhuira.”

¹⁹Chieina PROHO Varena ngalei eina ngaleili khalei sāyur kala khamasaiwui vanaoyur saikora sākhui, kala saikora chi aming phokmi khavai mi chiwui ngalemli khuirāmi; kala mi china kahoho chi manglākapai kachiva̱ chiwui aming ngasāhaowa.

²⁰Mi china sha̱kei yur saikora, kala kazingramwui vānaobing, kala khararwui sāyurbing saikorali aming phokmi, kha awui vanga ali ngachonmishapa kachā akhala masamphangmana.

²¹Chieina PROHO Varena mi chili piphup ngasakhaowa, kala ā pivā kahai eina arāpthingra̱ akha khuilaga akhamā chi aphi eina sāphinmihaowa;

²²kala PROHO Varena khuikahai arāpthingra̱ chieina sha̱nao akha sākhuilaga mi chiwui mangāli khuirāmi.

²³Chieina mi china hānga, “Ara hi iwui ara̱kuiwui ara̱kuina, kala iwui asāwui asāna; ali Sha̱nao hora, kaja ali Mayarnaowui eina khuishokkakhuina.”

²⁴ Chiwui vang eina mayarnaona ava̱ avāli horhaida apreiva̱li ngaruma, kala ani asā akha ngasāhaowa.

²⁵Kala ala apreiva̱la, khanini asāmsai eina leisai, kha makhayakmana.