Read Tangkhul Naga HAOKAPHOK 20 Bible Online

HAOKAPHOK 20 - Tangkhul Naga bible

HAOKAPHOK 20

¹Apam chiwui eina Abrahamna Negebwui ramshong vāda Kadesh eina Shurwui ngachaili tāpama; kala Gerarli vai.

² Abrahamna apreiva̱ Sarahli “Azarva̱na” da hānga. Chieina Gerarwui awunga Abimelechna Sarahli khui.

³Kha mangshong Varena Abimelechli rāhānga, “Yanglu, nana kakhuia sha̱nao chiwui vang eina na thiki jiura, kaja ava mi kateiwui preiva̱na.”

⁴Abimelechna mangasomirangsāthuda hānga, “PROHO, nana khayon makhalei mili shaothatrala?

⁵Akhalattana ‘Hi izarva̱na’ kala sha̱naopava̱nala ‘A ipāna’ majimala? Chiwui vang ining katong eina kala ipāng kathar eina kasāna.”

⁶Chieina Varena awui mangshongli hānga, “Mha, nana ningkathar eina kasāna kaji ina thei, kala nana iwuitungli morei masā khavai khāmkhame chi ina; chieina ali masāza̱ khangasakna.

⁷Chiwui vang eina apreiva̱ chi hanmihaolu, ava marān akhana, ana nawui vang seihā sāmida na ringra. Kha nana mahanmiakha na thilakra, kala nawui khalei saikorala thira da theilu.”

⁸Chieina Abimelechna ngathorthakva̱ ngakarthuida awui raobing saikorali hokhuilaga tui saikora chi hāngchithei, kala athum saikora ngacheelakhaowa.

⁹Chieina Abimelechna Abrahamli hokhuida hānga, “Nana ithumli khi kasākhala? Ina nali khi morei sāhaoda nana ili kala iwui wungramli hakkhamahā morei phungrākhamikhala? Masākhangayi ot chi nana sāhaira.”

¹⁰Kala Abimelechna Abrahamli hānglui, “Nana khi phaningda hikathā ot kasākhala?”

¹¹Abrahamna hānga, “Apam hili Vareli khangachee maleimana kala ipreiva̱wui vang athumna ili shaothathaipaishina da kaphaningwui vang hithāda kasāna.

¹²Chili lāngda kachangkhat hāngsa jiakha izara̱ shokpapama, kaja ishāvāwui naongalāva̱na, ishāva̱wui maningmana, chieina ipreiva̱ ngasā kahaina.

¹³Kala Varena ili ishāvāwui shim eina thuikhangasak chitharān ina ali kahāngna, ‘Ithumna khavāvāpam kachida ili napāna’ da hāngmilu jikahaina.”

¹⁴Chieina Abimelechna seila, yaola, awui rao sha̱nao mayarnao kachungkha Abrahamli mida apreiva̱ Sarahlila hanmihaowa.

¹⁵Kala Abimelechna hānga, “Yanglu, iwui ngalei, nawui mangāli theida lei; nana somkhangai apam chili sompaira.”

¹⁶Sarahlila hānga, “Yanglu, ina napāli lupāsā thingkha mihaira; nawui ngasokazat mi saikorawui mangāli nali khayon maleimana da mashung ngasak kahaina.”

¹⁷Chieina Abrahamna Vareli seihā sai; kala Varena Abimelechli raimihaowa; kala apreiva̱la, rao sha̱naobingla raimida athum nao pharāhaowa.

¹⁸Kaja Abraham preiva̱̱ Sarahwui vang eina Varena Abimelechwui shimkhurli sha̱nao saikorawui naopam shungkhamiserhairasai.