Read Tangkhul Naga HAOKAPHOK 21 Bible Online

HAOKAPHOK 21 - Tangkhul Naga bible

HAOKAPHOK 21

¹2PROHOna hāngkahai thāda Sarahli asamphangda rida ngashitmi kahai chi tāzakta Sarahli shokngasaka.

² Kala Sarah nao vaihaowa, kala asarlamshong Varena hāngkahai atam horzakta Abrahamli mayarnao akha pharāmi.

³Sarahna kapharā naomayara chiwui aming Abrahamna Isaac phokmi.

⁴ Kala Varena kaso kahai athishurda Isaac pharāda chishatthang kākashung eina Abrahamna ahui rimshokmi.

⁵Awui naomayara Isaacli pharāthang Abrahamwui kum shākha kāhairasai.

⁶Kala Sarahna hānga, “Varena ili mana̱ khavai sāmihaira; kala hi kashā mi kachiva̱na ili mana̱rumra.”

⁷Kala ana hānglui, “Sarahna nao pharāda na̱ shimanra da khipāna Abrahamli hāngsārakhala? Kha awui asārlam atamli ina ali naomayarnao akha pharāmihaira.”

⁸Nao chi rarmamānda zattheiuwa; kala Isaacna na̱ reithang Abrahamna zātkhān kahakva̱ akha sai.

⁹Kha Egyptwui sha̱nao Hagarna kapharā Abrahamwui naomayara eina anaomayara Isaac ngareo khanganao chi Sarahna thei.

¹⁰ Chieina ana Abrahamli hānga, “Raopava̱ eina anaomayarali kashamhaolu, kaja raowui naona iwui nao Isaacli shimlui makhuirumpaimara.”

¹¹Anaomayarawui vang phaninglaga Abraham ning maringphāthuwa.

¹² Kha Varena Abrahamli hānga, “Nao chiwui vang kala sha̱nao chiwui vang ning maringkaphā masaalu; Sarahna nali kahāng kachiva̱ thāda sālu, kaja Isaacwui eina nawui ara̱-azāwui ming phokki kajina.

¹³Kala raopava̱wui naomayarawui einala ina yur akha shokngasakra, kaja ala nawui naotheina.”

¹⁴Chieina Abrahamna ngathorthakva̱ ngakarthuida khamui kala tara̱ sāhuiham khatkha Hagarwui yartuili parmi kala nao chi eina ngasoda chithothaowa. Kala ana zatta Beer-shebawui lamhāngli nganingzata.

¹⁵Sāhuihamwui tara̱ chi kānkahai eina awui nao chi thingphei akhali vāhaihaowa.

¹⁶Chiwui thili lungherkha chāng tāmeida vālaga ana khana̱da apama, kaja “Nao hiwui kathi I matheingaimana” da ana hānga. Ana khana̱da pamlakha nao china panglāk eina chapshokrāsai.

¹⁷Kala Varena nao chiwui khon shai; kala Varewui kazingraona atungshong eina vaotāda Hagarli hānga, “Khina nali khanang ngasakhaokhala Hagar? Mangacheealu, kaja naona leida khaleipam chiwui eina awui kachapkhon Varena shāhaira.

¹⁸Ngakarthuilu, naomayara chi khangkāda vamkhuilu, khikhalajila ina ali kahaka yur akha sāngasakra.”

¹⁹Chiwui thili Varena awui mik rakngasaka, kala ana ra̱khong akha thei; ana sāhuikhong chili tara̱ achipemkhuida naoli shimana.

²⁰Nao chi rarmamānda Varena ngasomi; ana lamhāngli okthuida malā kakāp themlākhaowa.

²¹Ana Paranwui lamhāngli okthui kala apreiva̱ sākhavai ava̱va̱na Egyptwui ngalānao akha khuisangmi.

²² Atam chitharān Abrahamli Abimelech eina awui raimi akhavā Phicolna hānga, “Nawui otsak kachida Varena ngasomida lei;

²³chiwui vang eina ili, inaongarāli, lah iwui ara̱-azālila mikhanam ot masālakmara da Varewui ming singda ina nali ning horsangchaoda kasā thāda, nana kazat ngalei chili ilila chithāda sāra da shākhi sālu.”

²⁴Abrahamna ngahānkai, “Ina shākhi sāra.”

²⁵Abimelechwui raobingna ra̱khong ngapaithui kahaiwui vang Abrahamna mamayāmada kahāng chitharān,

²⁶Abimelechna ngahānkai, “Hi khipānakhala kaji I matheimana; nanala ili mahāngthuda aja rākashālaka.”

²⁷Chieina Abrahamna yao eina mukkā khuida Abimelechli miya, kala ani tuingashit sāngaroka.

²⁸Abrahamna yaovā shini yaoshangwui eina ngateida hai.

²⁹Chieina Abimelechna Abrahamli hānga, “Nana yaovā shini ngateida kahai hiwui kakhalat khikhala?”

³⁰Ana hānga, “Yaovā shini hi na khuilu, kala ra̱khong hi ina kakhonna kaji nana shākhi sāra.”

³¹ Chiwui vang eina apam chi Beer-sheba hoi, kaja apam chili ani shākhi sāda khamayā mingaroka.

³²Chithāda sāda anina Beer-shebali tuingashit sāngaroka. Chiwui thili Abimelech eina raimi akhavā Phicolna ngakarthuida Philistine ngaleili latunghaowa.

³³Beershebali Abrahamna tamarisk akha lingsangda Mashimānda Makashimān PROHO Varewui mingli khoruma.

³⁴Abrahamna Philistine ngaleili sha̱rākha pama.