Read Tangkhul Naga HAOKAPHOK 22 Bible Online

HAOKAPHOK 22 - Tangkhul Naga bible

HAOKAPHOK 22

¹ Hiwui thili Varena Abrahamli chāng yangda, “Abraham” da kaho eina “I hili leili” da ngahānkai.

²Ana hānga, “Nawui akhamāng kaje naomayara nana leishilak kahai Isaacli Moriah ngaleili, ina chitheiki kaji phungrei chili thānvāda rikkatā kachigat akha sāda apha̱haolu.”

³Ngathorthakva̱ Abrahamna ngakarthuida gadhānaoli ot shaksāmi; kala yaronnao khanili thānphung kala Isaacli ngasoda hanphut sākhavai thing phākhuilaga Varena kakaso pamli vai.

⁴Kakathumathang Abrahamna ngashān khavā tharān apam chi katāva̱li thei.

⁵Chieina yaronao khani chili Abrahamna, “Hili gadhā eina ngasoda pamsālu; ini vānaoni lākhashong akhorumlaga ungrāsanaoga.” da hānga.

⁶Kala rikkatā kachigat riktā khavai thing chi khuilaga naomayara Isaacli ngava̱ ngasaka, kala ana mei eina khainao khuiphunga. Chithāda ani ngasothuihaowa.

⁷Kala Isaacna avāva̱ Abrahamli “Avā” da kaho eina “Khikhala inao, I hili leili” da ngahānkai. Chieina ana ngahāna, “Yanglu, meila, thingla leihaira, kha pha̱phayā khavai yaonao kali leili?”

⁸Abrahamna hānga, “Inao, rikkatā kachigatwui vang Vare akhalattana yaonao ngarānmira.” da hānglaga ani ngasothuiuwa.

⁹ Varena ali hāngkahai apam chi vākashung eina Abrahamna hanphut akha sākhui kala riktā khavai thing ayet eina semkahaiwui thili Isaacli pheipāng khalaplaga hanphut chiwui thingtungli khāngkai.

¹⁰Chiwui thili pāng khangkāda khainao yonkhuilaga anao mayarli sāthat khavai sai.

¹¹Kha PROHOwui kazingraona kazingramwui eina “Abraham, Abraham!” da vaotai kala ana “I hili leili” da ngahānkai.

¹²Ana hānga, “Nao chili napāng maparalu, lah ali khikha mathālu; nawui nao akhamāng kaje chi eina tangda iwui vang kashivām maleimana kaji theilaga na Vareli ngacheeya kaji ina theihaira.”

¹³Kala Abrahamna amik kapeikakā tharān, yanglu, awui khanukshong khararli angachi ngaruishāntitlaga yaovā akha leisai; kala Abrahamna yaovā chi akhuilaga Isaacwui mahut rikkatā kachigat sāda pha̱phayāhaowa.

¹⁴Chieina Abrahamna apam chili PROHOna ngarānmira da hoi; aja eina tangda “PROHOwui phungreili ngarānmira” da hānga.

¹⁵Kala PROHOwui kazingraona Abrahamli kakhane sāda kazingramwui eina vaotāda

¹⁶ hānga, “I khalattana nali ngashit kahaina, nana nanaomayara akhamāng chila iwui vang mashivāmlakla kasāwui vang,

¹⁷kachangkhat ina nali somira, kala ina nawui ara̱-azā kazingli khalei sirāyākha kala kongpheiwui situiyākha ngasā ngasakra. Kala nawui ara̱-azāna nawui yangkashebingwui ngavei khavangra.

¹⁸Kala nawui ara̱-azāwui mangā eina okathuiwui miyur saikora sokhami ngasāra, kaja nana iwui kahāng nganai.”

¹⁹Chieina awui rao khaniwui chili latunglaga athum ngasoda Beer-shebali ungshunga, kala Abrahamna Beer-shebali pama.

²⁰Chiwui thili Abrahamli hithāda rāhānga, “Yanglu, nachinā Nahorwui preiva̱ Milcah nao kachungkha pharāhaira:

²¹Khararrali Uz, agatoli Buz, Kemuelwui avāva̱ Aram,

²²Chesed, Hazo, Pildash, Jidlaph kala Bethuel.”

²³Rebekahli Bethuelna pharai. Ashi chishat hi Abrahamwui achinā Nahorwui preiva̱̱ Milcahwui naosera.

²⁴Chili lāngda Nahorwui angashirva̱ Reumahna Tebah, Gaham, Tahash kala Maacahli pharai.