Read Tangkhul Naga HAOKAPHOK 23 Bible Online

HAOKAPHOK 23 - Tangkhul Naga bible

HAOKAPHOK 23

¹Sarah kum shākha maga̱da shini okthui, hi Sarahwui mirin zingkumna.

²Sarah Canaan ngaleili khalei Kiriath-arba (chiya Hebron) li thihaowa; kala Abrahamna Sarahwui vang wukkhanangda chapngachai.

³Kala Abrahamna awui kathi khaleipam chiwui eina ngakarthuida Hitnaobingli hānga,

⁴ “Iya kha̱mi sāda nathumwui ngachaili hunakha rākapamna; chieina chikhur sākhavai ili apam akha khamilu, chithakha kathi hi chizanpaira.”

⁵Hitnaobingna ngahānkai,

⁶“Ithumwui tui khuimilu, amei, nava ithumwui ngachaili pangshap sāshapa wungnao akhana. Ithumwui chikhur leida khalei hili nana ningchāngmeikap kaji chikhurli chizanpaira; ithum khipānakha makhāmmara, lah makhamayāla masāmara.”

⁷Abrahamna ngakarthuida ngalei chiwui mibing, Hitnaobingli kui mashungzangda khayākashi mi.

⁸Kala ana athumli hānga, “Kathi hi chizanpai khavai iwui vang nathumna mayāmiakha ili nganāmilu, Zoharwui naomayara Ephronli,

⁹awui luipheili khalei Machpelah kaho lungkhur chi mikhavai kahāngmilu. Nathumwui mangāli luiman horzakta ili chitheida ishiwui chikhur sākhavai lokhuira.”

¹⁰Atam chili Ephronla Hitnaobingli ngasoda pamsai; kala Hitnaopa Ephronna Hitnaobingwui mangāli ana Abrahamli hānga;

¹¹“Khuikhalailu, amei, nganāmilu; iramnao saikorawui mangāli ina lui chila lungkhur chila nali thāda mikahaina; kathi chi chili chizanpaira.”

¹²Chiwui thili Abrahamna ngalei chiwui mibingwui mangāli kui mashungzangda khayākashi mi.

¹³Kala ana Ephronli aramnao saikorawui mangāli hānga, “Kha nana mayāmiakha iwui tui kakhuimilu, ishi chikhur sāchang khavai ngalei chiwui aman kakhuimilu.”

¹⁴Ephronna Abrahamli ngahānkai,

¹⁵“Amei, ili nganāmilu, lui chiwui aman lupāsā shekel shāmati sha̱kha china iniwui vang khi sārakhala? Kathi chi chizanmalu.”

¹⁶ Abrahamna Ephronwui chi mayāhaowa; kala Abrahamna Hitnaobingwui mangāli hāngkatā lupāsā shekel shāmati aramwui leih kasānaobingna zatkhāna athishurda Ephronli onmihaowa.

¹⁷Chithāda Mamrewui zingshoshong khalei Machpelah kaho Ephronwui lui chi, lungkhur pamla, luipam chila Abrahamli miserhaowa.

¹⁸Kala awui keinung ngaveili kharā Hitnaobing saikorawui mangāli Abrahamwui sāhaira da horsangmi.

¹⁹Chiwui thili Mamre (chiya, Hebron) wui zingshoshong, Canaan ngaleili khalei Machpelahwui lungkhurli Abrahamna apreiva̱ Sarahli chifahaowa.

²⁰Lui kala chiwui alungli khalei lungkhur chi awui chikhur sākhavai Hitnaobingna Abrahamli metchanghaowa.