Read Tangkhul Naga HAOKAPHOK 26 Bible Online

HAOKAPHOK 26 - Tangkhul Naga bible

HAOKAPHOK 26

¹Abrahamwui thotli shokhairakasā chi maningla, apam chili chāmrei akha rāluishita. Kala Isaacna Philistinewui awunga Abimelechli samphang khavai Gerarli vai.

²Shongfali PROHOna rāsamphangda hānga, “Egyptli mataalu, kha ina kachithei ram chili pamlu.

³ Ina kahāng apam chili vālu, ina nali ngasomira kala somira; nali kala nawui ara̱-azāli; navā Abrahamli ngashit kahai chi ungshung ngasakta ram saikora chi na eina nawui atheili mira.

⁴Ina nawui ara̱-azā kazingramwui sirāyākha mataisangmira, kala ram saikora hi ina nathumli mira; nawui ara̱-azāwui eina okathuiwui miyur saikora athum khalatta sokhami ngasāra:

⁵khikhalajila Abrahamna iwui kahāng nganāda ina kakaso, ningkhami, shiyan-chikan kala ain mayonchinga.”

⁶Chieina Isaacna Gerarli pamhaowa.

⁷ Mina apreiva̱wui pongli ngahānakha “Izarva̱na” da hānga, kaja “Apreiva̱na” jiakha aramnaobingna Rebekahwui vang eina ali shaothathaipaishinada ngacheehaowa. Khikhalajila Rebekah ngalā mathālaka.

⁸Chili kasāngkha pamkahaiwui thili Isaac eina Rebekah ngareokasā Philistinewui awunga Abimelechna charfawui eina yangshokta thei.

⁹Chieina Abimelechna Isaacli hokhuida hānga, “Hi napreiva̱na, kathāda nazarva̱na jikhala?” Isaacna hānga, “Awui vang eina ili shaothathaipaishinada phaning kahaiwui vang chithā kahaina.”

¹⁰Abimelechna hānga, “Na ithumli khicham kasākhala? Napreiva̱li mi akhana paisor eina ngasopimihailaga nana ithumli khayon phungsangmipai.”

¹¹Chiwui eina thuida Abimelechna aramnao saikorali mathinda hānga, “Mi hipāli kala apreiva̱li pāng kaparpāli shaothatra.”

¹²Kala chikum Isaacna lui vāsangda heiun kachungkha khui. PROHOna ali somi,

¹³kala mipā chi shānghaowa, kala mataisangkhangai mataisangda shāngshunhaowa.

¹⁴Ana seila, yaola kala thongthāng kachungkha leihaoda, chiwui vang Philistinenaobingna ali yuishihaowa.

¹⁵(Avāva̱ Abrahamwui thotli awui raobingna khonkahai ra̱khongbing chi Philistinenaobingna ngalei eina phinmiserhaowa).

¹⁶Kala Abimelechna Isaacli hānga, “Ithumwui eina thuihaolu, kaja ithumli nana pangmeikharhaira.”

¹⁷Chiwui vang Isaacna apam chiwui eina thuihaowa, kala Gerarwui tampākli apama.

¹⁸Kala avāva̱ Abrahamwui atamli khonkahai ra̱khongbing chi Isaacna akhonlui; kaja Abraham thikahaiwui thili Philistinenaobingna sāphinmiserhairasai; kala avāva̱na phokkhami amingbing chi phokmiluishita.

¹⁹Kha Isaacwui raobingna tampāk chili ra̱khong khonda chili ura̱ samkaphang eina,

²⁰Gerarwui sei kahombingna Isaacwui sei kahombingli kharar ngarokta hi “Ithumwui tara̱na” da hānga. Chiwui vang ana ra̱khong chiwui ming chi Esek phokmi, kaja athumna ngapaihaowa.

²¹Chiwui thili athumna khangatei ra̱khong akha khonluishita, chilila athum kharar ngarokluihaowa; chieina ana chiwui aming Sitnah hoi.

²²Ana chiwui eina apam khangatei akhali vāda ra̱khong khangatei akha akhonluishita; kha hiliva marākhararthuwa; chiwui vang ana apam chili Rehoboth hoi, kaja “PROHOna ithumwui vang apam chikāmihaira, kala ram hili ithum mataisangra” kajina.

²³Chiwui eina ana Beershebali shanga.

²⁴Chithang ngayā PROHOna ali rāchitheida hānga, “I navā Abrahamwui Varena; mangacheelu, kaja ina nali ngasomidalei kala somira kala iwui rao Abrahamwui vang eina nawui ara̱-azā mataisangmira.”

²⁵Chieina ana apam chili hanphut akha sāda PROHOwui mingli khoruma, kala awui kachonshim akhankhui. Chili Isaacwui raobingna ra̱khong akha khonkhuiya.

²⁶ Chiwui thili Abimelechna Gerarwui eina awui machinme Ahuzzath kala raimi akhavā Phicolli ngasoda Isaacli vāsamphanga.

²⁷Isaacna athumli hānga, “Ili ningkachaida nathumwui eina kashamhailaga khi rāsā kajikhala?”

²⁸Athumna hānga, “PROHOna nali ngasomida lei kaji ithumna ngahāhang eina thei; chieina ithumna kahāngva, na eina ithumwui ngachaili shākhi leilaga tuingashit akha leingasakmilu,

²⁹chiya nali khikha mathālakla chingri eina chiho kahai thāda ithumlila sāshida masākhavai ngashitmilu. Na ara PROHOwui sokhame china.”

³⁰Chieina ana athumli zātkhān sāda phāshak phazāngaruma.

³¹Athumna ngathorthāk ngakarthuida akha eina akha shākhi sangaroka kala Isaacna athumli chithothaowa kala athumla awui eina chingri eina pākthuihaowa.

³²Chithang Isaacwui raobingna ra̱khong akha khonlaga “Tara̱ samphanghaira” da unghānga.

³³Ana chili Shibah hoi, chiwui vang aja eina tangda keinung chiwui ming Beer-sheba da hoi.

³⁴Esauna kum hangmati kākashung tharān Hitpa Be-eriwui naongalāva̱ Judith eina Elonwui naongalāva̱ Basemathli khui;

³⁵kala anina Isaac eina Rebekahwui mirin ning chotngasakhaowa.