Read Tangkhul Naga HAOKAPHOK 3 Bible Online

HAOKAPHOK 3 - Tangkhul Naga bible

HAOKAPHOK 3

¹ Varena sākakhui ramsā saikorawui ngachaili phara̱na awor themmeikapsai. Ana sha̱nao chili hānga, “ ‘Yāmgui chili khalei thingrongwui athei akhala nani mashaipaimara’ da Varena hāngla?”

²Chieina sha̱nao china phara̱ chili hānga, “Inina yāmgui chiwui thingrongbingwui athei chi shaipaiserra;

³kha Varena hānga, ‘Yāmguiwui alungthungli khalei thingrong chiwui athei mashaipaimara, kasing eina tangda masingza̱paimara, singza̱akha thira ji.’”

⁴ Kha phara̱ china sha̱nao chili hānga, “Nani mathimara.

⁵Varena thei kaja, nanina hi shaikhaleoda naniwui mik rakhaora; kala kashi-kaphā theida Vare thāhaora.”

⁶Chieina sha̱nao china thingrong chi kashakazāwui vang mathai da kathei eina, kala mikli ngayam ngasak kahai eina kala thingrong china thangmei ngasaka jihaoda, ana chiwui athei chi khuida shai; kala agaharalila kateokha mi, kala ana shai.

⁷Chieina aniwui mik rakhaowa, kala ani asāmsai eina lei kaji theihaowa; chieina anina khaorātheinā khopkazemkhuilaga ngavai khavai sākhui.

⁸Zingyinlam PROHO Varena yāmguili yaothui kharāwui pheikhon shai, chieina mi chi eina apreiva̱na PROHO Varewui eina yāmguiwui thingrongbingwui alungli ngathumhaowa.

⁹Kha PROHO Varena mi chili hoda hānga, “Na kali leili?”

¹⁰Ana ngahānkai, “Yāmguilungli ina nawui akhon shai, kha I khamahong eina leikahaiwui vang ngacheehaida ngathum kahaina.”

¹¹Ana hānga, “Na khamahong eina leili da khipāna hāngkhala? Ina nali mashaialu kaji thingrong chiwui athei shaihaola?”

¹²Mi china ngahānkai, “Nana iwui vang khami sha̱nao china arong chiwui athei chi mida ina shaihaowa.”

¹³ Chieina PROHO Varena sha̱nao chili hānga, “Nana khi sākahaikhala?” Sha̱nao china ngahānkai, “Phara̱ china ili ning nguingasakhaida shaihaowa.”

¹⁴PROHO Varena phara̱ chili hānga, “Nana hithāda kasāwui vang, sha̱keiwui ngachaili kala ramsā saikorawui ngachaili nali khonshi kahaina; nawuk eina ngamenzatra, kala nawui mirin peichaoda ngalei zālaga okthuira.

¹⁵Ina sha̱nao naniwui ngachaili kala nawui athei eina awui atheiwui ngachaili yangshi khangarok leingasakra; ana nakui naikhaira, kala nana aphei maja̱li makeira.”

¹⁶Sha̱nao chili ana hānga, “Ina nali nao khavaiwui kachotkachāng haklak eina mataisangmira, chotchānglak eina nana nao pharākhuira, chithālala nana nagaharali ningchāngchingra, kala ana nawuitungli mungra.”

¹⁷ Kala Adamli ana hānga, “Nana napreiva̱wui tui khanganāwui vang, kala ina nali ‘Chi mashaialu’ da kaso kahai thingthei chi kashaiwui vang ngalei hi nawui vang eina khonkashi ngasāhaira; nawui mirin peida chotlak eina ot sāda phāshak phazāra,

¹⁸ka̱shāt, kuivā nawui vang shokra; kala luili kashok thingnā-ra̱hā eina na ringra.

¹⁹Nana ngaleili malatvāranglakha eina tangda shairanra̱ shokta phazāra; kaja nali ngalei eina sākakhuina; na chifana, kala chifa ngasāluira.”

²⁰Mi china apreiva̱li Eve hoi, kaja ana kharing saikorawui ava̱va̱na.

²¹Kala PROHO Varena Adam eina apreiva̱wui vang sāhui eina kachon sākhuida anili ngavaimi.

²² Chiwui thili PROHO Varena hānga, “Yanglu, mi hina ithum akha thāda kashi-kaphā theihaira; ara apāng eina kharingawui thingthei chi khuishaiakha mashimānla ringhaora” —

²³chiwui vang eina PROHO Varena ali shungkhui khavai ngalei chili lui ot sākhavai Eden yāmguiwui eina chihohaowa.

²⁴Ana mi chili kashamshokhaowa; kala kharingwui thingrong shongfa chi mayon khavai Eden yāmguiwui zingshoshong cherubim kala achikun peida nganingung nganingkhavā meiwon kashoka raighai akha da haihaowa.