Read Tangkhul Naga HAOKAPHOK 31 Bible Online

HAOKAPHOK 31 - Tangkhul Naga bible

HAOKAPHOK 31

¹Labanwui naomayara ngarāna, “Ishavāwui khalei saikora Jacobna khuithuiserhaira; kala ishāvāwui eina kakhui china awui lan kachungkha mataisanghaira” da kahāng chi Jacobna shāhaowa.

²Kala Labanna kharewui thāda ali ngahānkhangai maleithura da Jacobna thei.

³Chiwui thili PROHOna Jacobli hānga, “Navāwui ngaleili kala nawui athei-asāli hanunghaolu, kala ina nali ngasomira.”

⁴Chieina Jacobna Rachel eina Leahli awui yao ashangva̱ hompam khavaipamli rākhavai ahokhui ngasakta,

⁵anili hānga, “Navāna kharewui thāda ili ngahānkhangai chi maleithura. Kha ishāvāwui Varena ili ngasozatchingda lei.

⁶Iwui yāng khalei saikora chigatta navāli otram ngatha̱khami nanina thei;

⁷kha navāna ili minamda iwui chotman tharā shida ngacheimihaira, chithālala ana sākashi sākhavai Varena mamayāmana.

⁸Ana, ‘Chukpoma saikora nawui chotman sāra’ jiakha katonga chukpomsera; kala ana ‘Khākhanang saikora nawui chotman sāra’ jiakha katonga khānāngsera.

⁹Chithāda sāda navāwui sha̱kei katonga Varena khuithuihailaga ili mihaira.

¹⁰Ngalat kachāngwui mangshongli ina ngashānkhayang chitharān mevā ngawok kazatabing chi khākhanang chukpomasera.

¹¹Chieina Varewui kazingraona mangshongli ili ‘Jacob’ da kaho eina ina, ‘I hili leili!’ da ngahānkai.

¹²Kala ana hānga, ‘Namik kapeikāda yanglu, ashangvalungli ngawok kazata me saikora khākhanang, chukpomasera; kaja Labanna nali sāda khalei saikora ina theiserhaira.

¹³Nana ngalung shunlaga thao neomida khangashit sākahai apam Bethelwui Varivara chi ina. Ara hiwui eina ngakarthuida nawui pharāsang khavai ramli hanungulu.’” da hānga.

¹⁴Chieina Rachel eina Leahna ali ngahānkai, “Ishāvāwui shimli inina samphangkapai shimlui leila?

¹⁵Ana inili yur katei thāda kakhui maningmala? Kaja ana inili yorhailaga chiwui pheisā chi yorzāpamda khaleina.

¹⁶Ishāvāwui eina Varena khuithui kahai lan saikora chi iniwui kala naongarāwui ngasāhaira; ara chiwui vang eina Varena kahāng saikora chi sālu.”

¹⁷Chieina Jacobna ngakarthuida anaomayara ngarā kala preiva̱ ngarāli uttungli chipama;

¹⁸kala ana mathuisang kahai sha̱kei kala Paddan-aramli samkaphang sha̱kei lan saikora khuiphungda avāva̱ Isaacwui lam Canaan ngaleili latunghaowa.

¹⁹Laban yaohah chichāp khavai vāhairasai, chieina Rachelna avāva̱wui shim meoma̱ liphunghaowa.

²⁰Arampā Labanli Jacobna thangmeimeihaowa kaja, ana yāmhaora kaji machishātlakmana.

²¹Awui khalalei saikora khuiphunglaga yāmhaowa, kala Euphrates makānda Gilead phungreishong shanguwa.

²²Kakathumathang Labanli Jacob yāmhaira da kahāng eina,

²³ana awui theisābing thānphungda shinithang kharomda Gileadwui phungreili ali vānganaihaowa.

²⁴Kha Arampā Labanli Varena chithang ngayā awui mangshongli rāhānga, “Ning ngasharlu, kaphāranu kashiranu, Jacobli khituikha mahānglakalu.”

²⁵Labanna Jacobli angaphankhuiya. Chitharān Jacobna phungreipam akhali kachonshim sālaga leisai, kala Laban eina awui theisābingna Gileadwui phungreili apisanga.

²⁶Labanna Jacobli hānga, “Ina nali khi sahaoda hithāda mikhanamkhala, kala kachiwui vang inao ngarāli raituk thāda khuithui kahaikhala?

²⁷Khisāda nana pao machishātlakla ili minamda yāmhaokhala, ina nali ringkaphā khamathān laasak tingteilā eina chihomihaipaishina kajila?

²⁸Khiwui vang inaomayara ngarā kala inaongalava̱ ngarāli kapāng sāda mamaya̱khui ngasakthukhala? Hi na mangma̱lak eina sāhaira.

²⁹Nali ina sākashi sāga jilala sāshapa, kha navāwui Varena angayā ili rāhānga, ‘Ning ngasharlu, kaphāranu, kashiranu, na Jacobli khikha mahangphāphāpaimara!’ da.

³⁰Ara nana nashāvāwui shimli ungngailakhaoda nana zat kahaina, kha khiwui vang nana iwui meoma̱bing lithuihaokhala?”

³¹Jacobna Labanli ngahānkai, “Khikhalajila nana nanaongarāli tandi eina ngapaithuihaipaishinada ngacheehaowa.

³²Nawui vare khuiphungkasāpā chi maringmara. Iwui theisāwui mangāli iwuili khalei nawuina kaji chi phāshoklu, kala chi khuilu.” Chitharan Rachelna liphungdalei kaji Jacob matheimana.

³³Chieina Labanna Jacobwui kachonshimli, Leahwui kālila, raopāva̱ khaniwui kālila zangyangserlaga khikha maleisāmana. Leahwui kachonshim eina shokta Rachelwuili zanga.

³⁴Rachelna shimwui varebing chi khuilaga utwui sāpān eina farorlaga ana kāpamshānhaowa. Labanna kachonshim saikora chili phāyanga, kha masamphangmana.

³⁵Avāva̱li Rachelna hānga, “Ina mangakarkathuiwui vang ishāmeina malung mavātmiranu, kaja sha̱naowui khangachā kazat chi ili leihaowa.” Chieina ana phālala shimwui varebing chi masamphangthuwa.

³⁶Chiwui thili Jacob malungvāthaoda Labanli khararra; Jacobna Labanli hānga, “Iwui khalāng khikhala? Khi morei leihaoda, hiyākha malungvātta kharomkharākhala?

³⁷Iwui ot katonga kapeoserhailala nawui shim ot khi samphangkhala? Nawui kala iwui theisābingwui mangāli chitheilu, athumna iniwui ngachaili bichar samiranu.

³⁸Kum maga̱ ina nali ngayurpamhaira; nawui yaova̱ kala meva̱ akha eina tangda nao tākahai maleiranga, kala nawui yaoshangwui eina yaovā akhanida ina shaikahai maleiranga.

³⁹Ramsāna shaihaisālala nawuili mashānsangla kashimān chi ina phunga; ngashunranu, ngayāranu leethuihaisālala chi iwui kashimān sai.

⁴⁰Chithāda sāda, ili ngashunwui kasāna kala ngayāwui kasikna pangshap shimān ngasaka, kapi eina tangda masamphangmana.

⁴¹Kum maga̱ hi ina nawui shimli pamrāhaira; nanao ngalāva̱ khaniwui vang kum tharāda mati, kala sha̱keiwui vang kum tharuk nali otram ngatha̱rāhaira, kha nana iwui sāman tharāshida ngacheimihaira.

⁴²Ishāvāwui Vare, Abrahamwui Vare, kala Isaacna Khangachee Varena ili manganingmisi kaja nana makahatlakla ili khamasai eina shiunlakra. Iwui kakhanang kala ipāng eina ot kasā chi theida angayā nali Varena rākakaharna.”

⁴³Chiwui thili Labanna ngahānkāda Jacobli hānga, “Sha̱nao khani hi inao ngalāva̱ thathuiya, naoshinaobing hila inaosera, sha̱keibingla iwui sha̱keisera kala nana theida khalei saikora iwuisera. Kha inao ngalāva̱ khani kala anina pharākhui kahaibing hili ina aja khisaura?

⁴⁴Ralu, na eina I, ini tuingashit akha sāsa; kala khangashit hina iniwui ngachaili shākhi akha sāda leiranu.”

⁴⁵Chieina Jacobna ngalung akha eina pākra̱ sāda shuna.

⁴⁶Kala Jacobna awui theisābingli hānga, “Ngalunggui apongkhuilu,” chieina athumna ngalunggui kazipkhuida rihai akha khora; kala chiwui ngalemli phazāngaruma.

⁴⁷Labanna chili Jegar-sahadutha hoi: kha Jacobna Galeed hoi.

⁴⁸Labanna hānga, “Aja, rihai hina iniwui ngachaili shākhina.” Chiwui vang eina apam chili Galeed kahona,

⁴⁹kala pakra̱ hili Mizpah dala hoi, kaja ana hānga, “Inina ngateida pamngaroksālala, PROHOna yangmiranu.”

⁵⁰“Nana inao ngalāva̱ khanili sāshida saakha, kala ani leilakha ngalā khangatei khuiakha, mi khipākha maleilala Varena na eina iwui ngachaili shākhina kaji mamalailakalu.”

⁵¹Chieina Labanna Jacobli hānga, “Na eina iwui ngachaili ngalung shunkahai kala rihai khorkahai hi theilu.

⁵²Rihai eina pakra̱ hina shākhina, kaja ina nali makaphā sākhavai rihai kala pakra̱ hi mamakānmara, kala nanala ili makaphā sākhavai rihai eina pakra̱ hi mamakānpaimara.

⁵³Abrahamwui Vare, Nahorwui Vare, kala aniwui avāwui Varena iniwui ngachaili bichar sāranu.” Chieina Jacobna avāva̱ Isaacna Khangachee Vare ming eina tuingashit sai.

⁵⁴Kala Jacobna phungrei chili pha̱kaphayā chigatta ashi shimkhurli phazāngaruma; athumna phazāngarumda ngayā pongda phungreitung chili pama.

⁵⁵Labanna ngathorthakva̱ ngakarthuida awui ara̱ngarā eina naongalāva̱ khanili maya̱khuida athumli kasola somi; kala chiwui thili pākngarokta shimli hanunghaowa.