Read Tangkhul Naga HAOKAPHOK 32 Bible Online

HAOKAPHOK 32 - Tangkhul Naga bible

HAOKAPHOK 32

¹Jacobna zatmamānda leilakha Varewui kazingraobingna ali samphanga;

²kala Jacobna athumli kathei eina ana hānga; “Hi Varewui raimibingna!” Chiwui vang ana apam chiwui aming Mahanaim hoi.

³Kala Edom ngaleili khalei Seir kaho ram, ashāmei Esau khaleipamli Jacobna rida paomebing chihovai,

⁴kala athumli hithāda hānga, “Nathumna ishāmei Esauli hithada ahāngra: Nawui rao Jacobna hithāda hānga, ‘Ina Labanwuili aja rāshungda apam kahaina;

⁵kala ina mukkā, gadhā, sha̱kei, rao mayarnao sha̱nao kachungkha lei; nawui mikyanli lukhamashan samphang khavai ameili hi hāngkhavai ina kachihona.’”

⁶Paomebing china latungda Jacobli hānga, “Nashamei Esauli samphanga, ana nali samphang khavai mi shāmati ali ngasophungda rārāda lei.”

⁷Chieina Jacob ngacheelakhaowa kala wukkhananglakhaowa; kala ali ngasokazat mibing chi ana ngayarpakhaowa, awui sha̱kei kala utbing chi akhum khani sāda ngayarkhai;

⁸ana phaninga, “Esauna rālaga akhum akha hi shimān ngasakhailala, khangatei akhum akha hi taishokpaira.”

⁹Chieina Jacobna hānga, “O ishāvā Abrahamwui Vare, kala ishāvā Isaacwui Vare; O PROHO ili, ‘Nawui ngalei kala theisāli hanunghaolu, ina kaphā sāmira’ da kahānga,

¹⁰nana narao ili hiyākha leikashi, mayonkhami hi iwui matik maningmana, ina khāmshui singlaga Jordan kānhaira, ara iwui khalalei katonga khum khani sāhaira.

¹¹Ishamei Esauwui pāng eina ili huimilu da ina nali poli, kaja I ali ngacheeya, naoshinaobing kala preiva̱ ngarā ithum saikorali ana rālaga shaothathaipai.

¹² Kha nana, ‘ina nali kaphā sāmira, kala nawui ara̱-azā mashānkharar shamadruwui situiyākha ngayāra’ da hānga.”

¹³Chieina chithang ngayā chili pisanga, kala ana khuikaphungwui eina ameiva̱ Esauli mikhavai khangarān sāda,

¹⁴me ava̱ shākhani, avā maga̱, yao ava̱ shākhani, yaovā maga̱,

¹⁵ut ana̱ kasur anao eina ngasoda thumra, seiva̱ hangmati eina mukkā tharā, gadhā ava̱ maga̱ eina avā tharā khuishoka.

¹⁶Hibing hi ana awui raobingwui pāngli sangmida hānga, “Iwui mangāli zatlu, kala asum asum eina mataklaga zatlu.”

¹⁷Rimeikapta kahomapa chili ana hāngchithei, “Ishamei Esauna nali rāsamkaphang tharan, ‘Khipāwui mikhala? Kali vanikhala? Hi khipāwui vangkhala?’ da ngahānakha,

¹⁸nana ‘Hi narao Jacobwuina; hibing hi ishāmei Esauli thada mikhavaina; kala ala ithumwui khanukli zatta lei’ da ngahānkālu.”

¹⁹Ana hi tākam eina kakhanelila, kakathumalila kala chiwui thili homkazatbing saikorali tamchitheida, “Nathumna Esauli samkaphang chitharān ngaraichāda hāngserra,

²⁰kala, ‘Chili lāngda narao Jacobla khanukli zatta lei’ da hānglu.” Kaja ana phaninga, “Iwui mangāli ali miki kaji pāngrān china malung nemhaora, kala chiwui thili ali samphangnaora; hithāda ana ili mayāmira.”

²¹Chithāda miki kajibing chi awui mangāli thuingasakhaowa; kala a chithang ngayā chili pihaowa.

²²Chithang ngayā ana ngakarthuida apreiva̱ khani, rao khani, kala awui nao tharāda akha khuiphungda Jabbok kong makānkai.

²³Ana athumli thānvāda kong makānda shivāthaowa, kala awui khalalei katongala chihokāserhaowa.

²⁴ Jacobmāng pamhaowa; kala kazing kathang eina tangda mi akhana ali rāngatuka.

²⁵Mi china Jacobli mayuirarthura kaji theilaga ngatukmamānda Jacobwui shaksha̱ shimetshokmihaowa.

²⁶Chieina mi china hānga, “Kazing thangki jihaira, ili chihohaolu.” Kha Jacobna hānga, “Ili nana masomiranglakha eina tangda nali mathui ngasakmara.”

²⁷Chieina ana Jacobli ngahāna, “Nawui aming khipā hokhala?” Ana “Jacob” hoi da hānga.

²⁸ Chieina ana hānga, “Nawui ming Jacob maholuimara, kha Israel hora, kaja nana Vare eina mikumoli nganurda nana yuihaira.”

²⁹ Chieina Jacobna ngahāna, “Nawui ming hāngmilu, ina kapona.” Kha ana hānga, “Khiwui vang eina nana iwui ming ngahānkhala?” Kala chili ana Jacobli somi.

³⁰Chiwui vang eina Jacobna apam chiwui aming Peniel phokmida hānga, “Kaja ina Vareli mai eina mai ngasunda kathei samphanghaira, thalala iwui mirin kanmihaira.”

³¹Awui shaksha̱ shokhaida phei ngasongda Peniel kakān tharān zimik shokhairasai.

³²Chiwui vang eina aja eina tangda Israelnaobingna ashaksha̱ phonkhavai anonān chi mashaimana, kaja ana Jacobwui shaksha̱ shimet khamili chiwui anonānli singza̱haowa.