Read Tangkhul Naga HAOKAPHOK 33 Bible Online

HAOKAPHOK 33 - Tangkhul Naga bible

HAOKAPHOK 33

¹Jacobna ngashankhavā tharān yanglu, mi shāmati Esauli ngasoda rārāsai. Chieina ana naoshinaobing chi Leah eina Rachel kala raopava̱ khani da athumli ngayarmihaowa.

²Ana raopava̱ khani eina athumwui naobing chi mangāli ringasaka, chiwui thili Leah eina awui naobing kala Rachel eina anaomayara Joseph naoda zatngasaka.

³A khalattana athumwui mangāli zatta amali mavānganairanglakha eina tangda ngaleili shini shida ngakhumshāma.

⁴Kha Esauna ali samphang khavai ngasamrai, kala ngavamkhui, kala kahungli hungreikhuida maya̱laga ani chapa.

⁵Esauna yangkāda preinaobing kala naoshinaobing chi kathei eina ngahāna, “Nali khangasobing hi khipālongkhala?” Jacobna hānga, “Naraoli Varena lumashanmida khami naongarābingna.”

⁶Chieina raopava̱ khani eina aniwui naongarābingna rānganaida ngakhumzanga;

⁷Leah eina awui naongarābingla chi tākam eina sai; kala naolak eina Rachel eina Josephna rānganaida ngakhumsanga.

⁸Esauna hānga, “Ili rākhangarok ashangbing china khi kakhalatkhala?” Jacobna ngahānkai, “Ishameina lumashanmi khavai kasāna.”

⁹Kha Esauna hānga, “Igato, iwuila kashap leiya, nawuili khalei chi nawui vang haihaolu.”

¹⁰Jacobna hānga, “Maningmana, ina nali kapona, nawui mangāli ili lukhamashan leiakha iwui pāng eina nali khami hi khuimilu; kaja kachangkhat eina nazak kathei hi Varewui zak kathei thāhaira, nana ili hiyākha lumashanmida rāsamphang khami hi.

¹¹Iwui kachigat hi kakhuimiphalunglu da ina nali kapona, kaja Varena ili mathālak eina yangmihaira, chiwui vang ila leishap leihaira.” Hithāda ana hānglui hānglui kaji eina Esauna khuihaowa.

¹²Chiwui thili Esauna hānga, “Ithumwui shongzā zatphokusa, ina nawui mangāli zatka.”

¹³Kha Jacobna ali hānga, “Ishameina thei, kaja naoshinaobing hi mazattheimana, kala seinao ana̱ khamangla zanghaoda ngasharda homzatra; kalikhada thangkha pangna zathaiakha sha̱keibing hi kathila thihaora.

¹⁴Ishameina narao ili rida zatsahaolu; ina athumli ngairon eina thānda sha̱keiwui kala naoshinaobingwui shongzā athishurda ishameiwui pam Seir chili ungrāsanaoga.”

¹⁵Chieina Esauna hānga, “Ili ngasokazat mibing kaikha nali haimiga.” Kha Jacobna hānga, “Khi savaiurakhala? Nana ili lumashankhami hina vaimalu.”

¹⁶Chithāda sāda Esauna aram Seirli latunghaowa.

¹⁷Kha Jacobna Succothli vāda, awui vangla, sha̱keiwui vangla shimnao asākhui, chiwui vang apam chiwui aming Succoth hoi.

¹⁸Kala Jacobna hapkakhano maleilakla Shechemli vāshunga, apam chi Paddan-aramwui eina ungakha Canaan ngaleili lei, kala keinung mavāshungnāla apama.

¹⁹Ana awui kachonshim khāngkhaningkakā apam chi Shechemwui avāva̱ Hamorli lupāsā shākha mida lokhui.

²⁰Chili ana hanphut akha sakāda chiwui aming El-Elohe-Israel hoi.