Read Tangkhul Naga HAOKAPHOK 34 Bible Online

HAOKAPHOK 34 - Tangkhul Naga bible

HAOKAPHOK 34

¹Leahna kapharā Jacobwui naongalāva̱ Dinahna ram chiwui sha̱naobingli yaothuivai;

²kala Hivpa Hamorwui naomayara Shechem, ram chiwui wungnao china Dinahli kathei eina shimenkhuida ngasopimihailaga maishi ngasaka.

³Jacobwui naongalāva̱ Dinahli ningchānghaowa; kala leishilakhaoda ana ngahuiri eina khararchān sai.

⁴Chiwui vang Shechemna avāva̱ Hamorli hānga, “Sha̱naopava̱ hi ipreiva̱ sākhavai khuimilu.”

⁵Jacobna anaongalāva̱ Dinahli sākhamāngmihaira kaji shāhaowa; kha anao mayara ngarāva seihomphungli awui sei hompamsāhaoda athum maungranglakha kasaikha pamsai.

⁶Kala Shechemwui avāva̱ Hamorna Jacobli ngazek khavai vai.

⁷Pao hi kashā eina Jacobwui naomayara ngarāna seihomphungwui eina unga; athum ning thurlakhaowa kala malungvātlakhaowa, kaja Jacobwui naongalāva̱li hikathā kasā hi Israelli kachipatna, hikathā otsak masārānmana.

⁸Kha Hamorna athumli hānga, “Inaomayara Shechemwui ning nanao ngalāva̱māngli leihaira; ina seiha kasāna, ali ngakum khavai mihaolu.

⁹Ithum ngalā ngakhotsa; nathumwui ngalānaobing ithumli milu, kala nathumla ithumwui ngalānaobing khuilu.

¹⁰Chithāda nathumna hili pamda, ngalei hila nathumli chikāra; ram hili pamda leih sālaga lan mathuisangkhuilu.”

¹¹Shechemnala Dinahwui avāva̱ kala amei ngarāli hānga, “Ili nathumwui mikyanli khaleishimilu, kala nathumna kahahāng saikora ina sāmira.

¹²Manho mikhangayi nathumna kapo chiwui athishurda ina mira; ngalāva̱ hi ipreiva̱ sākhavai vangmāng ili khamilu.”

¹³Jacobwui naomayara ngarāna Shechem eina avāva̱li minamda ngahānkai, kaja athumwui azarva Dinahli yansaimihaowa.

¹⁴Athumna anili hānga, “Ahui marimkashokbingli ithumwui azarva khami hi masākapai otna, kaja hi ithum maishi khavaina.

¹⁵Apong himāngli ithumna mayāra: chiya, nathumla ithumwui thāda nathumwui mayarnao kachiva̱ ahui rimshokhaolu.

¹⁶Chiwui thili ithumwui nao ngalāva̱bing nathumli mira, kala nathumwui naongalāva̱ ngarāla ithumna khuira, ithumna nathumli panrumda ithum miyur akha sāra.

¹⁷Kha nathumna ithumli manganāmada ahui marimshokakha ishiwui naongalāva̱ khuiphungda thuihaora.”

¹⁸Athumwui tui china Hamor eina anaomayara Shechemli ningyāng ungngasakhaowa.

¹⁹Yaronpa china ahui rimkashok chi kapan maleila sāhaowa, kaja ana Jacobwui naongalāva̱li ningchangnahaowa. Chitharan nao hi ashi shimkhur saikorawui ngachaili khayākālak eina leisai.

²⁰Chiwui vang Hamor eina anaomayara Shechemna keinung chiwui ngaveili unglaga keinungli khalei mibingli hānga,

²¹“Mibing hi ithumli ngahānngailakta lei; athumla ithumwui ramli pamda leih sāranu, kaja yanglu, ram chi athumwui vang shaptaira; ithum eina athum ngalā ngakhotsa.

²²Miyur akha sāda pamrum khavai apong akhamāng eina athumna mayāra jihaira: chiya, athumna ahui rimkashok thāda ithumwui mayarnao kachiva̱la ahui rimshokphalungra.

²³Athumwui sha̱kei, kala lan saikora ithumwui mangasāmarala? Chiwui vang eina athumna ithumli ngasopam khavai mayāhaosa.”

²⁴Ngaveili khavā mi saikorana Hamor eina anaomayara Shechemwui kahāng mayāda chili khavā mayarnao saikora ahui rimshokhaowa.

²⁵Kakathumathang athumna ningchotmahunglakha Jacobwui naomayara khani, Dinahwui amei Simeon eina Levina, aniwui raighai khuiphungda ngathumda keinungli zanglaga mayarnaobing saikora sāthatserhaowa.

²⁶Anina Hamor eina anaomayara Shechemli raighai eina sāthathailaga ashi shimwui eina Dinahli khuiphungda thuihaowa.

²⁷Kala Jacobwui naomayara ngarāna sāthat kahaitungli vāda keinung chi sakathānmiserhaowa; kaja azarva̱li yansaimihaowa;

²⁸athumwui yao, sei, gadhā kala keinungli khalei, luili khalei saikora;

²⁹athumwui lan, naoshinaola, preinaola shimli khalei saikora athumna ngaponthuihaowa.

³⁰Chiwui vang Jacobna Simeon eina Levili hānga, “Nanina iwuitungli kakhanang mida ram hili khaleibing Canaannao kala Periznaobingna ili chamalā khavai nanina retsangmihaira; iwui mi kateokhamānga, athum kazipkhuilaga ili rākaiakha, ili sāshimānhaora, I kala iwui shimkhur khanini shimānhaora.”

³¹Kha athumna hānga, “Ana izarva̱li khayorsha̱nao thāngasakpaila?”