Read Tangkhul Naga HAOKAPHOK 4 Bible Online

HAOKAPHOK 4 - Tangkhul Naga bible

HAOKAPHOK 4

¹Adamna apreiva̱ Eveli khangaso eina nao vaida Cainli pharai; kala hithāda hānga, “PROHOwui ngachonkhami mangā eina ina naomayara akha samphanghaira.”

²Chiwui thili preiva̱ china agato Abelli pharai. Abelna yaokahom ot sai, kala Cainna luikhavā ot sai.

³Atamwui athishurda Cainna awui luili kashok theishirai PROHOli ungchigata,

⁴ kala Abelna yaoshangwui anao pharākhare kala asākakā yaonaothao chigata. Kala PROHOna Abelwui kachigat chi khuisangmi,

⁵kha Cain eina awui kachigat ana makhuisangmimana. Chiwui vang Cain malungvātlakhaowa, kala ning khāsuthaowa.

⁶PROHOna Cainli hānga, “Na khisāda malungvātta ningkhāsuthaokhala?

⁷Nana mathāda saakha nalila makhuimimarala, nana mathāda masaakha moreina khāmongli rimdalei; kala nali ningkachāngna, nana chili yuikhavai sāphalungra.”

⁸ Cainna agato Abelli hānga, “Luishong vausa.” Kala anina luili leilakha Cainna agato Abelli pāng kāda shaothathaowa.

⁹Chieina PROHOna Cainli hānga, “Nagato Abel kali vāhaokhala?” Ana ngahānkai, “Matheimana; I igatoli kahomala?”

¹⁰Chieina PROHOna hānga, “Na khi sāhailikhala? Nagatowui asheena ngaleiwui eina ringāda ili ngakaoda lei.

¹¹Ara napāng eina tāngasak kahai nagatowui ashee, khamor makālaga zimkhui kahaiya ngalei chiwui eina nali khonshihaira.

¹²Nana lui vālala theishirai mathāda mashokluimara; okathuili na ara ramsom makhavaiya yāmkazata mi ngasāra.”

¹³Cainna PROHOli hānga, “Iwui shongrān hi ina phungthukki kaji maningmana.

¹⁴Yanglu, aja nana ili apam hiwui eina kashamhaira; kala nawui eina ngathummihaora; ara I okathuili ramsom makhavaia, yāmkazata mi ngasāhaoda kathatheina ili shaothathaora.”

¹⁵Chieina PROHOna ali hānga, “Maningmana, kachikathāna Cainli shaothatakha ali shini shida athut khuira,” Kala PROHOna mi kateina shaothatpaishina da Cainli machut akha chukmi.

¹⁶Chiwui thili Cainna PROHOwui eina thuihaowa, kala Edenwui zingshoshong Nod kaho apam chili apama.

¹⁷Cainna apreiva̱li khangaso eina Enochli pharai, kala ana keinung akha semkāda anao mayarawui ming khuida keinung chi Enoch phoka.

¹⁸Enochwui naoli Irad hoi; Iradna Me-huja-elli pharai; kala Me-huja-elna Me-thusha-elli, Me-thusha-elna Lamechli pharai.

¹⁹Lamech ngalā khani ngashira, akhali Adah, kala akhapāva̱li Zillah hoi.

²⁰Adahna Jaballi pharai; ana kachonshimli pamda sei kakeibingwui avāva̱na.

²¹Agatoli Jubal hoi; sipa̱, tingteilā kala pipe kasingabing chiwui avāva̱na.

²²Zillahna Tubal-cainli pharai; ana pithrai eina mariwui akap kasembingwui avāva̱na. Tubal-cainwui azarva̱li Naamah hoi.

²³Lamechna awui preiva̱ khaninili hānga: “Adah eina Zillah, iwui kahāng nganālu; Lamechwui preiva̱ khani, Ina kahāng khuisanglu: yaronnao akhana ili shaoda khamā za̱khamiwui vang, ina ali shaothathaira.

²⁴Cainli shini shida athut khuiakha, kachangkhat eina Lamechli hangshinida shini shida khuira.”

²⁵Adamna apreiva̱li ngasoluishitta mayarnao akha pharai, kala aming Seth hoi, kaja apreiva̱na hānga, “Abelli Cainna shaothathaoda awui mahut Varena ili nao khangatei akha mihaira.”

²⁶Sethla mayarnao akha pharai, kala aming Enosh hoi. Atam chiwui eina thuida mina PROHOli mingzaiphoka.