Read Tangkhul Naga HAOKAPHOK 40 Bible Online

HAOKAPHOK 40 - Tangkhul Naga bible

HAOKAPHOK 40

¹Atam khaleilaga Egypt awungawui pong singme eina khamui kasemana aniwui akhavā Egyptwui awungali khayon ot sathathuihaowa.

²Chiwui vang Pharaohna pong singme akhoka eina khamui kasema akhoka khani chili malungvāthaoda,

³phātop kashina kathānawui pāngli horsangmida ana anili Josephli narhaikasa phatop chili sanghaowa.

⁴Phātop kashina china anili Josephwui pāngli horsangmi, kala ana anili mayonpama, narkhavai pam chili athum kasha̱kha pamrumsai.

⁵Thangngayākha ani khani—Egypt awungawui pong kasinga eina khamui kasema, phatopli khaleia khanina mang shimanripa — mang chi ngatateia, kakhalatla ngatateia.

⁶Ngathorshong Josephna anili akhayang tharān ani wuk khanangda khalei ana thei.

⁷Chieina ana anili ngahāna, “Kathahaoda nani aja ningngai mamathālakla khaleikhala?”

⁸Anina ali hānga, “Inili mang shimana, kha chi khalatmi khavai khipākha maleimana.” Josephna anili hānga, “Khalatkhami hi Varewui maningmala? Ili kahāngmilu.”

⁹Chieina pong singme china Josephli awui mang chi hānga, “Mangshong iwui mangāli drakhārong akha leisai,

¹⁰kala arong chili aphāng kathum leisai; ashon shokkhaleoda awon wona kala amazānbing chi athei matheida minhaowa.

¹¹Pharaohwui tengkot ipangli singsai; kala ina drakhāthei chi khuilaga Pharaohwui tengkot chili sursangda tengkot chi Pharaohwui pāngli misai.”

¹²Chieina Josephna ali hānga, “Chiwui kakhalat chi hina: aphāng kathum chi zimiksho kathumthangna;

¹³kathumthangwui alungli Pharaohna nali khuishokta nawui otpamli hanmiluira; kala nana tengkot singmikasā thāda tengkot chi Pharaohwui pāngli sangmiluira.

¹⁴Kha nawui ot saikora ungshung kahaiwui thili ili phaningungmilu, ina nali kapona, ili lumashanmida Pharaohli iwui maram kahāngmilu, kala shim hiwui eina ili khuishok ngasakmilu.

¹⁵Kaja ili Hebrewbingwui ngalei eina ngathumda khuithui kahaina; kala hilila ina khikha khayon masālakla athumna ili phātopli masangngayimana.”

¹⁶Khalatkhami chi khamui kasema akhoka china mayāngaihaoda Josephli hānga, “Ila mang akha shimana: iwui kuitungli khamui luk kathum tongzatsai,

¹⁷kala atungmeikap kaji lukli Pharaohwui vang khamui ayur kachungkha zangsai, kha vānaobingna khamui chi ikuitung eina ratākshaisai.”

¹⁸Chieina Josephna ngahānkai, “Chiwui kakhalat chi hina: luk kathum chi zimiksho kathumthangna;

¹⁹kathumthangwui alungli nali khuishokta Pharaohna nakui rangda naphasā thingli hokthānghaora; kala vānaobingna nawui asā shaira.”

²⁰Kakathumathang, Pharaohwui kapharā zimiksho ngasāhaoda, ana awui raobingwui vang zātkhān sāmi, kala tengkot singkhamiwui akhavā eina khamui kasemawui akhavā chili khuishoka.

²¹Tengkot singmeli awui otpamli sangluishita, kala awui pāng eina tengkot chi Pharaohwui pāngli mi;

²²kha Josephna athumli khalatkhami tākam eina khamui kasemali hokthāngthathaowa.

²³Chithālala tengkot singme china Josephli maphaningungla malaihaowa.