Read Tangkhul Naga HAOKAPHOK 42 Bible Online

HAOKAPHOK 42 - Tangkhul Naga bible

HAOKAPHOK 42

¹Egyptli kashakazā samphangdalei kaji kashā eina Jacobna anaomayarabingli hānga, “Khiwui vang nathum akha eina akha yangngaroklikhala?”

² Kala ana hānga, “Yanglu, Egyptli kashakazā samphanga da ina shāhaira; ithum kakhum eina mathi khavai, ithumwui vang kashakazā talokhuilu.”

³Chiwui vang Josephwui achinā tharā china kashakazā lokhavai Egyptli tai.

⁴Kha Jacobna Josephwui agato Benjaminliva achināngarābingli mangasotā ngasakmana; kaja kalākashi shokpaishinada ngacheehaowa.

⁵ Chithāda sāda Israelwui naomayarabingna kashakazā tālo khavai khangateibingli ngasovai, kaja zāt kasak Canaan ngaleilila za̱haowa.

⁶Chitharān Josephna ngalei chiwui rammunga sāsai; ngalei chiwui mibingli ana yorsangkasāna. Josephwui achinā ngarāna awui mangāli vākashung eina ngakhumshām eina khayākashi mi.

⁷Josephna achinā ngarāli thei, kala athumli machuthaowa, kha athumli khami thāda sāda chanhān maunglakla ngahāna, “Nathum kachiwui eina kharākhala?” Athumna hānga, “Kashakazā lokhavai Canaanwui eina kharāna.”

⁸Josephna achinā ngarāna da theishingkhuihaowa, kha athumna ali matheimana.

⁹Kala athumwui pongli ali kashiman mang chi Josephna phaningunga; kala ana athumli hānga, “Nathum ra̱khayangbingna, apam hiwui khangazan yangkhui khavai kharāna.”

¹⁰Athumna ali hānga, “Maningmana, amei, kha naraobing kashakazā lokhavai kharāna.

¹¹Ithum saikora mi akhawui naona, ithum ningkathara misera, ithum rāra̱khayanga mi maninglakmana.”

¹²Ana athumli hānga, “Maningmana, nathumna ngalei hiwui khavāt khangazan yangkhui khavai kharāna.”

¹³Athumna hānga, “Narao ithum Canaan ngaleili mi akhawui naosera, ishi chinao tharāda khanina; paisho ishāvāli ngasopamdalei, kha akhava maleithura.”

¹⁴Kha Josephna athumli hānga, “Ina nathumli kahāng thāda, nathum ra̱khayangasera.

¹⁵Hi eina nathumli theikhuipaira: Pharaohwui ming singda kahāngna, nagato paisho chi hili makhuirākha nathum hiwui eina mazatpaimara.

¹⁶Nathumwui ngachaili akhana paisholi unghokhuilu, kateibingna phātopli pamsāra. Pharaohwui ming singda kahāngna, nathum ra̱khayanga mi maningmana jiakha kala nathumwui tui chi mashungakha hi eina theikhuira.”

¹⁷Kala ana athum saikorali kathumthangwui vang phātopli sanghaowa.

¹⁸Kakathumathang Josephna athumli hānga, “I Vareli ngacheeya; chieina hithāda saakha nathum ringpaira:

¹⁹nathum ningkathar miakha, nathumwui achinā akha phātopli chipamsālu, kala kateibingna shimshong zākhavai kashakazā phungunghaolu.

²⁰Kala agato paisho chi ili rāchitheilu; chieina nathumwui tui mashunga da theipaira, kala nathum mathimara.” Athumna chithāda sai.

²¹Chiwui thili athum eina athum hāngngaroka, “Igatowui pongli ithum nguihaira kaji hi khamashungna, ana ithumli kapo ithumna matheikhami chitharān awui malung kharing chi ithumna thei; chiwui vang malung kharing chi ithumwuitungli rātāhaira.”

²² Kala Reubenna athumli hānga, “Nao chili makaphā masālu da ina nathumli mahāngmala? Kha nathumna makhuisangthu. Chiwui vang ara awui asheewui athut hāngkasang atam rāhaira.”

²³Josephna athumwui tui shai kaji athumna matheimana, kaja athumwui ngachaili khalatme leisai.

²⁴Chiwui thili ana athumwui eina thuihaida chapa; kala athumwuishong latungda chān ungngazeka. Kala ana Simeonli khuilaga achinā ngarāwui miktāli khalaphaowa.

²⁵Chiwui thili athumwui khao chi kashakazā chipem ngasakta athum kachiva̱wui pheisā chi athumwui khaoli sangmiluihaolu da kasoi; kala athum shongfali zākhavai sangmilu kaji athishurda sangmi.

²⁶Chiwui thili athumwui kashakazā gadhābingli shaksākhuilaga zathuwa.

²⁷Kala athumwui shimzunpamli ungshungda achinā akhana gadhāli uikhavai akhao kasho eina chili awui pheisā zangkasā chi thei;

²⁸Chieina ana achināngarāli hānga, “Iwui pheisā hanmiluihaira; khaowui khamorli zangdalei!” Chi shālaga athum ngacheelakhaowa, kala akha eina akha ngarei ngasunda kathirriri eina hāngngaroka, “Ithumli Varena khi sāmi kahaikhala?”

²⁹Athumna Canaanli avāva̱ Jacobwuili ungkashung eina shokkahai saikora hithāda hānga,

³⁰“Ngalei khamunga china ithumli chānhān maunglakla ngazeka, kala ithum ngalei chili ra̱yang khavai kachihona da khuihaowa.

³¹Kha ithumna ali hānga, ‘Ithuma ningkathar mina, ithum ra̱khayangabing maningmana;

³²ithum avāva̱ akhawui chinaongarā tharāda khanina; akhavā maleithura, paishova Canaanli ishāvāwui ngalemli pamda lei.’

³³Chieina khangama akhavā china ithumli hānga, ‘Hina nathum ningkathara mina kaji ina theipaira: nachinā akha iwuili pamngasaksālu, kateibingna shimshong zākhavai kashakazā phungungulu.

³⁴Nathumwui agato paisho chi khuirālu; chithakha nathum ra̱khayangbing maningmana, kha ningkathara mina da theira, kala nachināli nathumli hanmida nathum ngalei hili leih khayora sāpaira.’”

³⁵Athumna akhao chi pheikhayang chitharān, yanglu, mi kachiva̱wui pheisārom khaoli zangsāsera; athum kala athumwui avāva̱na pheisārom chi theilaga ning saza̱lakhaowa.

³⁶Avāva̱ Jacobna athumli hānga, “Inao ngarāwui vang nathumna ili wukkhanang ngasakhaira: Joseph maleithura, Simeonla maleithura, ara nathumna Benjaminli khuithuiluiki jihaira; saikora hi iwuitungli tāserhaira.”

³⁷Chieina Reubenna avāva̱li hānga, “Ina Benjaminli mathānungakha iwui naomayara khaninili sāthathaolu; ipāngli sangmilu, ina nawuili ali thānungmiluira.”

³⁸Kha avāva̱na hānga, “Inaomayarali mavā ngasakmara, kaja nagato thihaira amāngli notha kahaina. Nathumna vāki kaji shongzāli ali kalākashi rāza̱kha, nathumna ili asarlamshong wukkhanang ngasakta Kazeiramli vāngasakra.”