Read Tangkhul Naga HAOKAPHOK 43 Bible Online

HAOKAPHOK 43 - Tangkhul Naga bible

HAOKAPHOK 43

¹Chitharān ngalei chili zāt sakkachangkhathaowa.

²Kala athumna Egyptwui eina khuikhaung kashakazā chi zāngakān kahai tharān, avāva̱na athumli hānga, “Ithumwui vang kashakazā valokhuiluilu.”

³Kha Judahna ali hānga, “Mi chipana ithumli saklak eina hāngkazazakhaidalei, kaja ‘Nagato makhuiraakha nathum ili masamphangpaimara’ jihaira.

⁴Nana ithumli agato zanglaga chihovākha ithumna vāda nawui vang kashakazā alomika;

⁵kha nana ali machihoakha ithum mavāmara, kaja mi chipana ithumli hānga, ‘Nagato makhuiraakha nathum ili masamphangpaimara.’”

⁶Israelna hānga, “Nathumna khisāda ili khanang khavai, nachinā akha lei da hāngkhala?”

⁷Athumna ngahānkai, “Mi chipana ithum kala athei-asāwui ponglila munlak eina ngahānda hānga, ‘Navā aruila ringda leila? Nachinā khangatei maleilui?’ Ana khangahān chili ithumna ngahānkakāna, ana ‘Nagato khuitālu’ da hāngra da ithum theisāla?”

⁸Judahna avāva̱ Israelli hānga, “Nao chi ili ngasoda chiholu, nala ithumla, kateobingla mathila ringkhavai ithum zatuka.

⁹Ina awui vang nganingra, awui vang ili tānlu. Ina ali khuiungluida napāngli masangmiakha chiwui khayon chi ina phungchingra;

¹⁰kaja ithumna mahuinganongsi kaja khanishida vālaga latunghairara.”

¹¹Chieina athumwui avāva̱ Israelna hānga, “Chithaphalungra jiakha hithāda sālu; ngalei hiwui mathāmeikap kaji atheiyur; balm kateokha kala khuira̱ teomeikha, gum, myrrh, kala pistachio athā kala almond, nathumwui khaoli khuiphunglaga mipa chili lemmet sāda, khuitāmilu.

¹²Pheisāla mataida khuiphunglu; nathumwui khaoli sangmihaikasā pheisā chila khuivāluishitlu; hi yangngui kahailapai.

¹³Nagatolila thānphunglu, ngakarthuida mi chipali valuishitlu;

¹⁴pangshapa Varena nathumli mi chipawui mangāli lukhamashan chitheimida nagato akhapa eina Benjaminli shiunluiranu. Inaongarāwui vang ili wukkhananglu jilala khananghaorali.”

¹⁵Chieina athumna lemmet mikhavai ot chi khuiphunga, kala athumna pheisāla chungmeida khuiphungda Benjaminli thānphunga; kala athumna Egypt tākashung eina Josephwui mangāli anganinga.

¹⁶Josephna Benjamin athumli ngasokazat kathei tharān, ana awui shim kashina chili hānga, “Mibing chi shimlungli hozanglu, kala sā taithatta khangarān sālu, kaja ngashunshong mibing chi ili zāngarumra.”

¹⁷Josephna sālu kaji chi mipa china sai, kala mibing chi Josephwui shimli khuizanga.

¹⁸Josephwui shimli khuizanghaoda mibing chi ngacheehaowa, kala athum hāngngaroka, “Hi kharethang ithumwui khaoli pheisā sangmihaikasā chiwui vang shimlungli khuikazangna, chieina ana ithumwui khayon phākhuida awui raonao sāngasak khavai, kala ithumwui gadhābing hi khuikhavai kasāna.”

¹⁹Chiwui vang eina athumna Josephwui kashina chili vāda khāmongpheili angazekta,

²⁰hānga, “Oh, amei, kashakazā lokhavai ithum kharethang hili rai;

²¹kala ithumna pikhavaipamli ithumwui khao pheikhayang tharān ithum kachiva̱wui pheisā horzakta khaoli zangsai; chiwui vang ithumna pheisā chi khuirālui kajina,

²²kala kashakazā lokhavai pheisā khangateila pāngli singphungdalei. Ithumwui khaoli pheisā chi khipāna sangmikhala ithum matheimana.”

²³Ana ngahānkai, “Chingri ngasāmkhuilu, mangacheelu; nathum kala navāwui Varena lan chi nathumwui khaoli sangmi kahaira; nathumwui pheisā chi ina samphanghaira.” chiwui thili ana Simeonli thānshokmi.

²⁴Kala mipa china athumli Josephwui shimli thānzangda tara̱ khuimida athumna phei pheokhui, kala ana athumwui gadhābingli seizat khuimi kahai thili,

²⁵ngashunshong Josephna khaung tharan, miki kaji ot chi mikhavai khangarān sai, kaja athum chili phazāngarumra da shāhaowa.

²⁶Josephna shimli hankhaung tharān, athumna khuikaphung ot chi awui shimli khuizanga, kala ngaleili ngakhumsangda khayākashi mia.

²⁷Ana athumwui kashok-kazang ngathingda ngahāna, “Nathumna kahāng navā kasara chi ringphāda leila? A ringchingda leila?”

²⁸Athumna ngahānkai, “Narao ishāvā ringda lei kala ringphāda lei.” Chieina athumna kui mashunda ali khayākashi chithei.

²⁹Kala ana kapeikakā eina avāva̱wui nao agato Benjaminli theida hānga, “Hi nathumna ili kahāng nathumwui agato paisho chila? Varena nali lumashanmiranu inaomayara!”

³⁰Josephna samphangngailakkasā agato chili kathei eina chapngaihaoda totot thuihaowa, kala awui kāli zangda chapa.

³¹Chiwui thili ana mai ngatāphailaga; akhalatta khalem khuilaga shokhānga, “Kashakazā khuirālu.”

³²Awui vang ngateida khuimi; athumwui vang ngateida khuimi, kala ali phazākharuma Egyptnaobingwui vang ngateida khuimi, kaja Egyptnaobingna Hebrewnaoli ngarumda maphazāpaimana, kaja athumwui vang jat tālaka.

³³Awui mangāli khararana kharar athishurda, paishona khanganui athishurda pama; kala mibing china akha eina akha matakhak eina yangngaroka.

³⁴Josephwui table eina athumli sangmi, Benjaminwuiva khangateiwuili sharuk phangā shida mataida sangmi. Chithāda athumna ali lumlaolak eina phāshak phazāngaruma.