Read Tangkhul Naga HAOKAPHOK 47 Bible Online

HAOKAPHOK 47 - Tangkhul Naga bible

HAOKAPHOK 47

¹Chieina Josephna Pharaohli zangda hānga, “Ishāvā, ichināngarā, athumwui sha̱kei khalalei saikora thānda Canaan ngaleiwui eina rāserhaira, kala athum ara Goshenli pamda lei.”

²Kala achinā ngarāwui eina mi phangāli thānvāda Pharaohli samphang ngasaka.

³Pharaohna achinā ngarāli hānga, “Nathum khi ot sākhala?” Athumna ngahānkai, “Ishāvā ngarā thāda naraobingna yao homa.”

⁴Athumna Pharaohli hānga, “Ithumna kasha̱khawui vang ngasāmkhui khavai ngalei hili rāhaira, kaja naraobingwui sha̱keiwui vang azāt maleithuwa, khikhalajila Canaan ngaleili zāt kasak marlakhaowa; chieina ara narao ithumna nali seihā kasāna, naraobingli Goshenli kapam ngasākmilu.”

⁵Pharaohna Josephli hānga, “Navā eina nachinā ngarā nawuili rāhaira.

⁶Egypt ngalei nawui pāngli lei, navā kala nachinā ngarāli mathāmeikap kaji apamli panngasaklu; athum Goshenli pamranu; kala athumwui ngachaili sākashap mi zangakha iwui sha̱keila homngasaklu.”

⁷Chiwui thili Josephna avāva̱ Jacobli khuirāda Pharaohwui mangāli thānzanga, kala Jacobna Pharaohli somi.

⁸Kala Pharaohna Jacobli hānga, “Na kum kayākha kāhairakhala?”

⁹Jacobna Pharaohli hānga, “Iwui ram kazat mirin kum shākha thumra kāshunghaira, mirinla maphāmana, kumla ishāvā ngarāwui ram kazat kum yakha makāshungmana.”

¹⁰Jacobna Pharaohli somilaga shokhaowa.

¹¹Kala Josephna Pharaohwui kakaso athishurda avāva̱ kala achinā ngarāli Egyptwui pam mathāmeikap kaji lam, Rameseswui lam chi athumli mihaowa.

¹²Kala Jacobna avāva̱, achinā ngarā kala avāva̱wui shimkhur katongali athumwui mashing athishurda kashakazazā mi.

¹³Chitharan ngalei saikorali zāt masamphangthuwa; kaja zāt kasak chi marlakhaowa; chiwui vang Egypt eina Canaan ngaleilila zāt masamkaphangwui vang chothaowa.

¹⁴Kashakazā khalowui vang Egypt eina Canaan ngaleiwui pheisā katonga Josephna kazipkhuiserhaowa; kala Pharaohwui shimli khuivai.

¹⁵Kala Egyptlila kala Canaanlila lupā kānser kahai eina, Egyptnaobingna Josephli rāhānga, “Ithumli zāt milu; khiwui vang ithum nawui miktāli thirakhala? Khikhalajila ithumwui pheisā yorzāngakānserhaira.”

¹⁶Chieina Josephna hānga, “Nathumwui pheisā yorzāngakānhairakha nathumwui sha̱kei yorlu; nathumwui sha̱kei eina ngatha̱ khavai ina zāt mira.”

¹⁷Chiwui vang athumna Josephli athumwui sha̱kei khuivāmi; kala athumwui sigui, yao, simuk kala gadhā eina ngatha̱ khavai Josephna athumli zāt mi; kala chikum ana athumli zāt mida athumwui sha̱kei saikora eina ngatha̱zāhaowa.

¹⁸Kala kum chi peikahaiwui thili athumna Josephli rāda hānga, “Ameili ithumwui pheisā yorzaserhaira kaji mangathumara, sha̱keila ameiwui sāthuiserhaira; ithumwui lam eina phasā maningla ameiwui mangāli khikhala maleithura.

¹⁹Khiwui vang ithum saikora kala iram ngalei nawui mangāli thikachangrakhala? Ithumlila lamla, kashakazā milaga lohaolu; laga ithum eina ithumwui lam ngasoda Pharaohwui raonao sāhaora; kala ramla marampho khavai, ithumla mathila ringkhavai ithumli māmachi milu.”

²⁰Chieina Josephna Egyptwui lam katonga Pharaohwui vang lokhui; kaja Egyptwui mibingna athumwui lui saikora yorzāserhaowa, khikhalajila zāt kasak chi athumwui vang marlakhaowa. Lam chi Pharaohwui ngasāhaowa;

²¹kala Egyptwui achikun akha eina akha vāpeida mi saikora awui raonao sāngasakhaowa.

²²Ana pāngmonbingwui lammāng malomana; kaja Pharaohwui eina pāngmonbingli yarkhami lei, kala yarkhami chi zāda athumna ringa; chiwui vang athumwui lam mayorhaimana.

²³Kala Josephna mibing chili hānga, “Yanglu, aja zimiksho Pharaohwui vang ina nathum eina nathumwui lam lohaira. Ara nathumwui vang māmachi chi hili leili; kala nathumna lam chili māmachi hi yaolu.

²⁴Kala māhāli akhum phangāwui khumkha Pharaohli mira, kala khum phangāwui khum mati chi amachiwui vang, chili langda nathum, kala nathumwui shimkhur saikorala zākhavai sāra.”

²⁵Chieina athumna hānga, “Nana ithumwui mirin kanmihaira; ithumna Pharaohwui raonao sāra kaji hi ameiwui ningyāngkhaung ngasāranu.”

²⁶Chieina Egyptwui ngaleiwui pongli Josephna shiyan akha semkhuida aja rāshungda chi mayonda lei, chiya Pharaohna khum phangāwui akha khuira, pāngmonbingwui lammāng Pharaohwui maningmana.

²⁷Chithāda sāda Israelna Egyptwui ngalei Goshenwui lamli pama; kala chili athumna lan kachungkha mathuisangda chunglak eina mataisanga;

²⁸kala Jacobna Egyptli kum tharāda shini okthui; chithāda sāda Jacobwui kum shākha hangmatida shinina.

²⁹ Israelna thiphalungki kaji atam rānganai kahai tharān anaomayara Josephli hokhuida hānga, “Nawui mikyanli mayāngaiakha napāng ikhaishāngzingli hailu, kala khamashung eina ning horsangda sāmirada khangashit sālu. Ili Egyptli machifalu,

³⁰kha ishāvā ngarāli ngasoda chifalu; ili Egyptwui eina khuishokta athumli chifa khavai pam chili chifalu.” Chieina Josephna ngahānkai, “Nana hāngkahai thāda ina sāra.”

³¹Kala ana hānga, “Ili khangashit sālu;” chieina ana ngashita. Chiwui thili Israelna awui khumkuili mashun zangda khoruma.