Read Tangkhul Naga HAOKAPHOK 48 Bible Online

HAOKAPHOK 48 - Tangkhul Naga bible

HAOKAPHOK 48

¹Chiwui thili Josephli, “Navā kazādalei”; da kahāng eina ana anaomayara khani, Manasseh eina Ephraimli thānda vai.

²Kala Jacobli, “Nanaomayara Joseph rāhaira.” da kahāng eina Israelna zingarāda petli thuipama.

³ Kala Jacobna Josephli hānga, “Pangshap sāshapa Varena Canaan ngaleiwui Luzli ili rāchitheida somi,

⁴kala ili hānga, ‘Yanglu, ina nali athei mathei ngasakta kachungkha mataisangmira, kala nawui eina miyur akha sākhuira, kala nawui thili kharā ara̱-azāli ngalei hi metchangra.’ da hānga.

⁵“Ara nanao khani ina Egypt ngaleili marāranglakha kapharā chi iwuina; Reuben eina Simeon iwui khangasā thāda Ephraim eina Manassehla iwui ngasāra.

⁶Aniwui thili kapharābing chi nawui sāra, kala athumwui achinā ngarāwui shimlui khararwui ming eina phokra.

⁷ Kaja ina Paddanwui eina kazat chitharān, Canaan ngaleili zatlakha, Ephrath mavāshungranglakha Rachel thihaida I wukkhananglakhaowa; kala ina ali Ephrath (chiya, Bethlehem) vākhavai shongfali chifahaowa.”

⁸Israelna Josephwui nao khanili kathei eina, “Hi khipālongkhala?” da ngahāna,

⁹Josephna avāva̱li hānga, “Ili Varena hili khami inaomayara khanina.” Chieina ana hānga, “Ina anili somi khavai iwui ngalemli khuirālu.”

¹⁰Chitharān sārnahaida Israelna mikla matheirarthuwa. Chieina Josephna anili nganaida awuili thānvai; kala ana anili maya̱khuida vamkhuiya.

¹¹Kala Israelna Josephli hānga, “Ina nali theiluira da maphaningsāmana; kha yanglu, Varena ili nanao ngarālila theingasakhaira.”

¹²Chieina Josephna anili amakāwui eina tāngasakhailaga akhalatta ngaleili ngakhumshāmzanga.

¹³Kala Josephna anili, Ephraimli awui yāshong eina thara̱laga Israelwui uishong kala Manassehli uishong eina thara̱laga Israelwui yāshong da khuirai.

¹⁴Kala Israelna awui pāng chākreita katingshok laga paisho Ephraimwui kuitungli awui yāpang para kala awui uishong kharara Manassehwui kuitungli para.

¹⁵Kala ana Josephli somida hānga, “Ishāvā Abraham eina Isaacna shitsangda ringkharā Vare, iwui mirinli aja rāshungda thānkhame Vare;

¹⁶Ili makaphā saikorawui eina ngatangkhame, kazingrao china nao khanili somilu; kala aniwuitungli iwui, kala ishāvā ngarā Abraham, Isaacwui ming leichingranu; kala okathuili mataisangda, kachungkha ngasāranu.”

¹⁷Avāva̱wui yāpang Ephraimwui kuitungli kapar chi theilaga Joseph maringphāthuwa; chieina avāva̱wui pāng chi khuilaga Ephraimwui eina Manassehwui kuitungli parkhavai sai.

¹⁸Kala Josephna avāva̱li hānga, “Maningmana avā; kaja hipāna khararana, awui kuitungli nawui yāpāng parmilu.”

¹⁹Kha avāva̱na mamayāmada hānga, “Ina thei, inaomayara, ina thei; ala yur akha ngasāra, kahaka akha ngasāra; chithālala agatona ali reimeira, kala awui ara̱-azāna yur kachungkha ngasāra.”

²⁰ Chithāda chithang ana anili somida hānga, “Nathumwui ming singda Israelnaobingna somida hithāda hāngra; ‘Varena nali Ephraim eina Manasseh thāda somiranu’”; chithāda ana Manassehwui mangāli Ephraimpāli ringasaka.

²¹Chiwui thili Israelna Josephli hānga, “Yanglu, I thiki jiura, kha Varena nali ngasomira kala navā ngarāwui ngaleili thānshokmiluira.

²²Chili lāngda nachinā ngarāli mamila napāli, ina raighai eina malā singlaga Amornaobingwui eina kakhui kaphungwui amai akha mihaira.”