Read Tangkhul Naga HAOKAPHOK 5 Bible Online

HAOKAPHOK 5 - Tangkhul Naga bible

HAOKAPHOK 5

¹ Hi Adamwui naothotbingwui lairikna. Varena mi sākakhui tharān, Varena awui sakrin khuida sai.

² Mayarnao eina sha̱nao ana sākhui, kala sākhuilaga somida aming Mi da hoi.

³Adamna zingkum shākha thumrā okthuihailaga awui azak tākam kahai, ali khangamāna mayarnao akha pharākhui kala aming Seth hoi.

⁴Seth pharā kahaiwui thili zingkum shāchishat ringvāda khangatei mayarnaola sha̱naola pharai.

⁵Chithāda sāda Adamna zingkum shāchiko thumrā okthuilaga thihaowa.

⁶Sethna zingkum shākha phangā kākashung eina Enoshli pharai.

⁷Enoshli pharā kahaiwui thili zingkum shāchishat apā shini ringvāda khangatei mayarnaola sha̱naola pharai.

⁸Chithāda sāda Sethna zingkum shāchiko tharāda khani okthuilaga thihaowa.

⁹Enoshna zingkum hangchiko kākashung eina Kenanli pharai.

¹⁰Kenanli pharāhailaga kum shāchishat tharāda phangā okthuivāda khangatei mayarnaola sha̱naola pharai.

¹¹Chithāda sāda Enoshna kum shāchiko apa phangā okthuilaga thihaowa.

¹²Kenanna kum hangshini kākashung eina Ma-halalelli pharai.

¹³Ma-halalelli pharāhailaga Kenan kum shāchishat hangmati okthuivāda nao khangatei mayarnaola sha̱naola pharai.

¹⁴Chithāda sāda Kenanna kum shāchiko apā tharā okthuilaga thihaowa.

¹⁵Maha-lalelna kum hangtharukta phangā kakā eina Jaredli pharai.

¹⁶Jaredli pharāhailaga Ma-halalelna kum shāchishat thumrā okthuivāda nao khangatei mayarnaola sha̱naola pharai.

¹⁷Chithāda sāda Ma-halalelna kum shāchishat hangchikoda phangā okthuilaga thihaowa.

¹⁸Jaredna kum shākha hangtharukta khani kākashung eina Enochli pharai.

¹⁹Enoch pharāhailaga Jaredna kum shāchishat okthuivāda nao khangatei mayarnaola sha̱naola pharai.

²⁰Chithāda sāda Jaredna kum shāchiko hangtharukta khani okthuilaga thihaowa.

²¹Enochna kum hangtharukta phangā kākashung eina Methuselahli pharai.

²²Methuselah pharāhailaga Enochna Vareli ngavaplak eina kum shākathum okthuivāda khangatei mayarnaola sha̱naola pharai.

²³Chithāda sāda Enochna kum shākathum hangtharukta phangā okthui.

²⁴ Enoch Vareli ngavapta okthuisai, chiwui thili a maleithuwa; kaja Varena ali khuithuihaowa.

²⁵Mathuselahna kum shākha hangchishatta shini kākashung eina Lamechli pharai.

²⁶Lamechli pharāhailaga kum shāshini hangchishatta khani okthuivāda nao khangatei mayarnaola sha̱naola pharai.

²⁷Chithāda sāda Mathuselahna kum shāchiko hangtharukta chiko okthuilaga thihaowa.

²⁸Lamechna kum shākha hangchishatta khani kākashung eina mayarnao akha pharai,

²⁹kala naowui aming Noah phokmida hānga, “PROHOna khonshi kahai ngaleili ithumna ot kasā kala ngalangkazār chiwui eina ana ithumli ngasāmkhui ngasakra.”

³⁰Noahli pharāhailaga Lamech kum shāphangā hangchikoda phangā okthuivāda nao khangatei mayarnaola sha̱naola pharai.

³¹Chithāda sāda Lamechna kum shāshini hangshinida shini okthuilaga thihaowa.

³²Noah kum shāphangā kākashung eina Shem, Ham, kala Japhet athumli pharai.