Read Tangkhul Naga HAOKAPHOK 6 Bible Online

HAOKAPHOK 6 - Tangkhul Naga bible

HAOKAPHOK 6

¹ Okathuili mikumo kachungkha mataisangmamān kaji tharan, sha̱naola kachungkha pharāsanga,

²Varewui naomayara ngarāna miwui naongalāva̱ ngarāwui khamathā chi theilaga; athumna kapangkakhui chi khalattawui preiva̱ sāda ngakuma.

³Chieina PROHOna hānga, “Imanglāna mikumoli katang mavaila mangayurchingmara, kaja ava phasā khavaiana; ana zingkum shākha maga̱ okthuira.”

⁴ Atam chitharān Nephilimbing okathuili pānsai, kala Varewui naomayara ngarāna mibingwui naongalāva̱ ngarāli ngakumda nao kachungkha pharā kahaiwui thilila leisai. Achālakha aming kazata kala kapanga mi chi athumna.

⁵ Okathui alungli mikumowui makaphā sorngasai kahai kala makaphāmāng chukkhamaja katang makhavai chi PROHOna thei.

⁶Kala okathuili mikumo semhaikasāwui vang PROHO wukkhananghaowa.

⁷Chieina PROHOna hānga, “Ngalei eina sākakhui mi hili okathuili malei khavai mila, sāyurla, phara̱-pharāla kala kazingli yongkazat vānaobingla ina shimān ngasakserhaora, kaja athumli sākahai hi I wukkhananghaira.”

⁸Kha PROHOwui mangāli Noahva ngahānkhangai mi ngasāsai.

⁹Noahwui naothot hithai. Noah khamashunga mina, awui thotli shātmakakā mina; Noahna Vareli ngavaplak eina okthui.

¹⁰Noahwui nao Shem, Ham kala Japheth hoda kathum leisai.

¹¹Chitharān okathui hi Varewui mangāli khamakhao mirin kala khangama̱ khangazaina pemsai.

¹²Varena okathui hi theilaga, yanglu, makhaolak eina thei; kaja phasā khavai athum saikora kachichāwui ningkachāng athishurda zatsai.

¹³Chieina Varena Noahli hānga, “Phasā khavai saikora shimān khavai ina machukhaira; kaja athumwui eina okathui hi khangama̱ khangazaina pemtinghaira; yanglu, okathui eina ngasoda athumli ina shimān ngasakra.

¹⁴Gopher thing eina nakhalatta marikhong akha sākhuilu; alungli kā khailu, kala khe eina alung ayār saphinlu.

¹⁵Chi hithāda sāki kajina: marikhong chiwui asān khuining shākathumra, aretna khuining hangphangā, kala kajuina khuining thumra jira.

¹⁶Marikhong chiwui akhum sāsanglu, kala chi khuining akha juimeida kāfalu, kala arāpli khāmong wutlu; nemkhamei mathāng kakhane, kala kakathuma sāsangra.

¹⁷Kaja yanglu, ina okathuili tara̱ phongshilongra, kazingramwui azingli khalei khak-kasuia yur saikora shimān ngasakra; okathuili khalei saikora thiserra.

¹⁸Kha ina nali tuingashit akha sāra, na, napreiva̱, nanaomayara ngarā kala athumwui preiva̱ngarā nali ngasoda marikhongli zangserra.

¹⁹Asā vaida kharingyur kachiva̱ nali ngasoda ringkhavai, ayur kachiva̱wui khanini, chiya avā akha, ava̱ akha da marikhongli zangngasaklu.

²⁰Vānaola ayur-ayā athishurda, kala sāyurla ayur-ayā athishurda kala ngaleili ngawokazat kachiva̱ ayur peida, khanini nali ngasoda ringkhavai zangngasaklu.

²¹Kala kashakazā sakapai yur saikorala khuiphunglu kala kazipkhuilu; kaja chi nathumwui vangla kala athumwui vangla kashakazā sāra.”

²² Varena kakaso athishurda Noahna sāsera.