Read Tangkhul Naga HAOKAPHOK 7 Bible Online

HAOKAPHOK 7 - Tangkhul Naga bible

HAOKAPHOK 7

¹Chiwui thili PROHOna Noahli hānga, “Na kala nashi shimkhur katonga marikhong alungli zanghaolu, kaja mithot hili na iwui mangāli khamashungana da ina theihaira.

²Kathara sāyurwui eina avā eina ava̱ ngawor shinini khuiphunglu, kala makathara sāyurwui avā eina ava̱ ngaworkharip khuilu;

³kala kazingli yongkazat vānaola avā eina ava̱ ngawor shinini khuilu, hi okathuili athumwui athei mashimān khavaina.

⁴Kaja shinithangwui thili ina okathuili ngashun ngayā hangmatithang kazing rongasakra; kala ina sākahai kharing yur kachiva̱ okathuiwui eina shimān ngasakra.”

⁵Kala PROHOna Noahli kakaso saikora chi tākam eina ana sai.

⁶Okathuili tara̱ kaphong tharān Noahwui zingkum shātharuk kāhairasai.

⁷ Kala tara̱ kaphongwui eina yāmshok khavai Noah, apreiva̱, anaomayara ngarā kala athumwui preiva̱ ngarāla marikhongli zangserhaowa.

⁸Kathara sāyur, makathara sāyur, vānaoyur kala ngaleitungli ngarik kazat yur saikora,

⁹avā eina ava̱, ngawowor eina Noahli ngasoda, Varewui kakaso athishurda marikhongli zangserhaowa.

¹⁰Kala kashinethangwui thili okathuili tara̱ phonghaowa.

¹¹ Noahwui zingkum shākatharuka kum, kachāng kakhanewui tharāda kashinethang kathukawui eina ura̱ kachungkha ngawokkhaishoka kala kazingramwui charfa shoserhaowa.

¹²Ngashun hangmati ngayā hangmati okathuili kazing rothai.

¹³Chithang Noah kala awui naomayara ngarā Shem, Ham, Japheth kala apreiva̱ eina naongarāwui preiva̱ kathum, athumli ngasoda,

¹⁴athum kala sāyur kachiva̱, sha̱keiyur kachiva̱, ngarikazata yur, vānaoyurla peida marikhongli zangsera.

¹⁵Noahli ngasoda kharing khaksui suida khalei saikora ngawowor eina marikhongli zangserhaowa.

¹⁶Varena kakaso athishurda phasā khavai yur saikorawui avā eina ava̱ kātong kahai eina PROHOna khāmong shungmihaowa.

¹⁷Zimiksho hangmatithang zingchā machatlakmada tara̱ chungkhangai chungkāda marikhong chi ngaphongkāhaowa, kala kajuiva̱ ngaphongkāhaowa.

¹⁸Okathuili tara̱ kaphong chi markhangai marda marikhong chi tara̱tungli ngaphongkāhaowa.

¹⁹Tara̱ chi hakmahānāhaida kazingramwui azingli khalei kajujuiya kaphung saikora ngaphumserhaowa;

²⁰tara̱na phungreitungli pemkāda khuining tharāda phangā tumhaowa.

²¹Okathuili phasā khavai yur vānao, sha̱kei, ramsā, okathuili asum asum eina paikazata kala mi saikora thihaowa;

²²ngalei kathengtungli khalei nātāngkhurli khaksui kasuia kachiva̱ thiserhaowa.

²³Ngaleitungli khalei kharingyur kachiva̱, mi, sāyur, kala ngarikazata yur, kazingramli yongkazata saikora okathuiwui eina shimānhaowa. Noah eina ali ngasokasābingmāng taishoka.

²⁴Kala okathuili zimiksho shākha hangphangāthang tara̱ phonga.