Read Tangkhul Naga HAOKAPHOK 8 Bible Online

HAOKAPHOK 8 - Tangkhul Naga bible

HAOKAPHOK 8

¹Kha Varena marikhonglungli khalei Noah, kala sha̱kei eina sāyur saikorali phaningunga. Kala Varena okathuili masi phanngasakta tara̱ thengmamanhaowa.

²Kathuka ura̱la kala kazingramwui charfala saphinmihaida kazing maro ngasakthuwa,

³kala okathuili tara̱ ngahap mamānhaowa. Zimiksho shākha hangphangāthangwui thili tara̱ ngasunhaowa;

⁴kachāng kashinewui zimiksho tharāda kashinethang marikhong chi Ararat phungreili tāngasāma.

⁵Kachāng tharā makāshungranglakha eina tangda tara̱ ngahapmamānda kachāng katharāwui zimiksho kharethang phungreitonbing theiphokhaowa.

⁶Zimiksho hangmati thangwui thili Noahna ana sāsang kahai charfa chi shoyanga,

⁷kala hangkhāyur akha chihoi; kala vānao china okathuitungli tara̱ mathengranglakha eina tangda yongung yongvai.

⁸Chiwui thili tara̱ katheng makatheng yangkhavai nāsha̱ akha chihoi;

⁹kha nāsha̱ chi pa̱khavaipam maleithuda marikhong chili latungrāsai; kaja ngaleitungli tara̱ mathengchaorangsai. Chieina apāng tāngshokta vānao chi khuilaga marikhonglungli sangluihaowa.

¹⁰Ana shinithang ngarailaga nāsha̱ chi chiholuishita;

¹¹kala nāsha̱ china chithang ngazin ali hanunga, kala yanglu, nganaozaonao eina olivenā akha khamorli ngatamsai; chieina tara̱ thenghaira da Noahna theihaowa.

¹²Chiwui thili ana shinithang shānglaga nāsha̱ chi chiholuishita; kha malatungluithuwa.

¹³Noahwui zingkum shātharuk apā akhawui kachāng khare kala zimiksho kharethang ngaleitungli tara̱ thengchenghaowa; kala Noahna marikhongwui akhum khuishokhailaga yanga, kala yanglu, ngaleitung thenghairasai.

¹⁴Kachāng kakhanewui zimiksho maga̱da kashinethang ngalei thenghaowa.

¹⁵Chieina Varena Noahli hānga,

¹⁶“Na, napreiva̱, nanaomayara ngarā kala athumwui preiva̱ ngarā marikhongwui eina tungserlu.

¹⁷Asā khavai kharing yur, vānaoyur, ngaleitungli ngarikazata yur, nali khangaso saikorala thānshokserlu, chieina okathuili athumna nao kachungkha pharāsangda okathuili athei matheida mayāsangra.”

¹⁸Chieina Noahna apreiva̱, naomayara ngarā kala athumwui preiva̱ ngarāli ngasoda shoka.

¹⁹Sāyur kachiva̱, ngarikazat yur kachiva̱, vānaoyur kachiva̱ kala okathuili kharinga yur saikora marikhongwui eina shoksera.

²⁰Chieina Noahna PROHOli hanphut akha sākhuida kathara sāyur kala vānaoyur kachiva̱ khuida rikkatā kachigat akha sai.

²¹Kala PROHOna nganamkaphā anganam chi nganamlaga PROHOwui ningli hānga, “Ara ina ngalei hi miwui vang eina makhonshiluilakmara, kaja miwui chukkhamaja nganuilakhawui eina thuida makaphā makhayāmānga; kala kharing yur kachiva̱ ina shimān khangasak chi ara ina masāluilakmara.

²²Okathui leilakha eina tangda khayao eina kahāt, kasik eina kasā, si eina lum, ngashun eina ngayā mangasāmmara.”