Read Tangkhul Naga HAOKAPHOK 9 Bible Online

HAOKAPHOK 9 - Tangkhul Naga bible

HAOKAPHOK 9

¹ Varena Noah kala anaomayara ngarāli somida hānga, “Athei matheida mataisanglu, kala okathui chipemlu.

²Okathuiwui sāyur kachiva̱, khamasaiwui vānaoyur kachiva̱, ngaleili ngarikazat yur kachiva̱ kala tara̱lungli khalei khaihyur kachiva̱ nathumli ngacheera; athum saikora nathumwui pāngli horsangmi kahaina.

³Khangatha̱a kharing yur saikora nathumwui kashakazāsera; kala ina nathumli khamateka thingnā-ra̱hā mikahai thāda ot kachiva̱ mihaira.

⁴ Kha asāli ashee zangda mashaipaimana, kaja ashee hiya manglāna.

⁵Nathumwui manglā kakhuiapāli ina makahatlakla athut khuira; sāyur kachiva̱la miwui manglā kakhuia chili ina athut khuira, kala achinā akhawui mirinwui vang mi akhawui mirin hāngsangra.

⁶Kachikathāna mi akhali ashee tāngasakakha alila mina ashee tāngasakra, kachiwui vangkhala kaja mi hi Varewui sakrin khuida sākahaina.

⁷ Chieina nathum athei matheida khamataila mataisanglu, mayāsangda apam kachiva̱li okthuilu.”

⁸Varena Noah kala anaomayara ngarāli hānga,

⁹“Yanglu, ina nathumli kala naoda rāki kaji ara̱-azāli,

¹⁰kala nathumli ngasoda khalei kharing yurbing, kaja vānao, sha̱kei, ramsā marikhongwui eina ngasokashokbing saikorali tuingashit akha kasāna.

¹¹Iwui tuingashit hina, kaja ara asā khavai saikora tara̱ kaphong eina mathiluilakmara kala okathui shimān khavai tara̱ maphongluilakmara.”

¹²Kala Varena hānga, “I eina nathum kala nathumli ngasoda khalei manglākapai saikorawui alungli iwui tuingashit khudam hi khanaowa mithot eina tangda leira.

¹³Iwui chāngjingawut muiyā tungli haihaira, hina I eina okathui tuingashitwui khudam sāra.

¹⁴Ina okathuili muiyā ngapān khangasak tharān kala muiyālungli chāngjingawut kachithei tharān,

¹⁵I eina nathumwui ngachaili, kala manglākapai kachiva̱li iwui tuingashit chi ina phaningungra; kala asā khavai saikorali shimān khavai tara̱ maphongluilakmara.

¹⁶Muiyālungli chāngjingawut kashok tharān ina chi yanglaga Vare eina okathuili khalei asā khavaibingwui kharinga yur kachiva̱wui ngachaili katang makhavai tuingashit chi ina phaningungra.”

¹⁷Varena Noahli hānga, “I eina okathuili khalei asā khavai ayur saikorawui ngachaili ina tuingashit sākahaiwui khudam china.”

¹⁸Marikhong eina kashok Noahwui naobing chiya, Shem, Ham, Japheth athum hina. Hamna Canaanli pharai.

¹⁹Ashi kathum hi Noahwui nao ngarāna, kala athumwui eina okathui vāshungda mi mayāsanga.

²⁰Lui vākhare mi chi Noahna. Ana drakhā yāmgui akha sākhui;

²¹kala chiwui atheira̱ manglaga maliphaida awui kachonshimli khamahong eina pivāhaowa.

²²Canaanshi avā Hamna avāva̱wui mahonghat kahai chi theilaga kayāngli achinā khanili shokhānga.

²³Chieina Shem eina Japhethna kachon akha aniwui yārtuili parlaga sa̱na̱zangda avāva̱wui khamasai phasā chili farormi; ani avāva̱wui shong mayangzangmana kala awui khamahong chi matheimana.

²⁴Noahna mathingkhaung eina ngakarthuida naopaishowui sākahai chi theida hānga,

²⁵“Canaanli khonkashi ngasāranu; achinā ngarāwui raonaobingwui raonao sāranu.”

²⁶Kala ana hāngluishita, “Shemli iwui PROHO Varena sokhami ngasāranu; kala Canaanna awui raonao sāranu.

²⁷Varena Japhethli mataisang ngasakra, kala Shemwui kachonshimli pamranu, kala Canaanna awui raonao sāranu.”

²⁸Tara̱ kaphongwui thili Noahna zingkum shākathum hangphangā ringvai.

²⁹Chithāda Noahna zingkum shāchiko hangphangā okthuilaga thihaowa.