Read Tangkhul Naga 2 SAMUEL 1 Bible Online

2 SAMUEL 1 - Tangkhul Naga bible

2 SAMUEL 1

¹Saul thikahaiwui thili, Davidna Amaleknaobingli asāthathailaga hankhaung eina, Davidna Ziklagli khanithang ungpama,

²kala kakathumathang, yanglu, mi akha kachon tānār eina ngavailaga kui ngalei tottāt eina, Saulwui rāmrahwui eina rārāsai. Kala Davidli kathei eina ana ngakhumshām eina khayashiya.

³Davidna, “Kachiwui eina kharākhala?” da ali ngahāna. Kala ana ngahānkai, “I Israelwui rāmrahwui eina yāmkharāna”.

⁴Kala Davidna ali, “Kathamameilikhala? Ili hānglu” da ngahāna. Chieina ana ngahānkai, “Mibing raipamwui eina yāmserhaira, kachungkha pitāda thihaira; kala Saul eina anaomayara Jonathanla thihaira.”

⁵Chieina Davidna, “Saul eina anaomayara Jonathan thihaira kaji nana kathāda theikhala?” da ali rākahānga yaronnao chili ngahāna.

⁶ Ali rākahānga yarona china hānga, “Ina Gilboa Kaphungli kakā eina, Saulna awui kazei ngazunglaga pamsai, kala siguigari kala sigui katongabing, ali rānganaihaowa.

⁷Kala ana kapeikhaung eina ili theida hoi. Ina ‘I hili leili’ da ngahānkai.

⁸Kala ana ili hānga, Na khipākhala? Chieina ina, I Amalekwui mina da ngahānkai.

⁹Chieina ana ili hānga, ‘Iwui ngalemli rāda ili sāthathaolu! I chotnāhaira, kha manglāva mathuirangli.’

¹⁰Chieina ina awui ngalemli nganingda ali sāthathaowa, khikhalajila a pitāhaiakha a mashokluimara kaji ina thei. Kala ana khangahon kuihon eina apāngli kasang kazao ina khuilaga ishameiwui mangāli khuikharā hina.”

¹¹Chieina Davidna awui kachon yonkhuida serkhāka; kala ali khangasobingla chithāda sai;

¹²kala athumna Saul eina Jonathanwui vang kala PROHOwui mibing Israel shimkhur raili thikahaibingwui vang, athumna mangayāranglakha eina tangda kakhum eina chapngachāreihai.

¹³Ali rākahānga yarona chili Davidna, “Na kachiwui eina kharākhala?” da ngahāna. “Iya Amalekwui mina, ram kazata mi akhawui naona” da ana ngahānkai.

¹⁴Davidna ali hānga, “PROHOna thao neomi kahaia chiwuitungli napāng kakhāng na mangacheemala?”

¹⁵Chieina Davidna yaronnao akhali hokhuida hānga, “Zatlu, mi hili sāthathaolu,” kala ana shātta thihaowa.

¹⁶Kala Davidna hānga, “Nawui ashee nakhalattali tāranu, kaja PROHOna thao neomikahaia chili, ‘Ina sākathatna’ da nakhalatta shākhi khamina.”

¹⁷Kala Davidna Saul eina anaomayara Jonathanwui vang sifada malungringlak eina chapa,

¹⁸ kala ana hi Judahwui mibingli tamchitheiphalungra da hānga, yanglu, hi Jasharwui Lairikli kapihaida lei. Ana hānga:

¹⁹“Nawui tekhamatei, O Israel! Nawui kajujui apambingli pitā ngasakhaira! Pangshapa chi kathāda pitāhaokhala!

²⁰Gathli mahāngalu, Ashkelonwui chanreili machishātalu; Philistinewui naongalāva̱bing mathānpaishina, ahui marimkashokabingwui naongalāva̱bing maireopaishina.

²¹“Gilboawui phungrei nathum, chili zingrot, lah ikra̱ matāranu, akharla makharshokranu! Kaja pangshapwui chāngvei sākhamānghaowa; Saulwui chāngvei thao eina maneomathāluimara.

²²Sāthat kahaibingwui ashee, kapingbingwui athao eina, Jonathanwui malā mahanungluimana, Saulwui raighai khamasai eina mahanungmana.

²³“Saul eina Jonathan, leikashi kala leishirihai! Ringlala thilala ani mapāk; ani khalānglila thākmei; kazingkha̱lila pangmei.

²⁴“Israelwui naongalāva̱ nathum Saulwui vang chapngachālu, nathumli kachon khamathāthā ngavai khangasakali; nathumwui sārili sināwui sāri-khongnāng shaksākhamiwui vang.

²⁵“Kapingabing railungli kathāda pitāhao! Jonathan nawui kajujui apambingli pisanghaira.

²⁶“Nawui vang ining sifahaira, ichina Jonathan! Nana ili ngahānkhangai! Nana ili leikashi matakhakhai, preiva̱ ngarāwui leikashili langmei.

²⁷“Kapingabing kathāda pitāhao! Raisārila kathāda shimānhao!”