Read Tangkhul Naga 2 SAMUEL 10 Bible Online

2 SAMUEL 10 - Tangkhul Naga bible

2 SAMUEL 10

¹ Khaleilaga Ammonnaobingwui awunga thihaida, anaomayara Hanunna mahut shinda thuimunga.

²Kala Davidna hānga, “Avāva̱ Nahashna ili khayāshida kasā sāda, inala Hanunli khayāshida sāra.” Chiwui vang eina avāva̱ kathiwui wukkakhanang chithei khavai Davidna awui raobingli chihovai. Chithāda Davidwui raobingna Ammonnaobingwui apamli vai.

³Kha Ammonwui wungnaobingna Hanunli hānga, “Davidna navāli khayākashiwui vang ninglum ngasak khavai nali mi chihokharāna da phaningla? Keinung hi phākhuida ra̱yang khavai kala ngalei khuikhavai Davidna awui raoli kachiho maningmala?”

⁴Chieina Hanunna Davidwui raobing chili morhā lākharip simihai, phahon ngahunpat katattāmihailaga shiunhaowa.

⁵Hi Davidli kahāng eina, ana athumli angarokkhui khavai mi chihovai, kaja athum khayaklākhaowa. Awungana angarok ngasakta hānga, “Nathumwui morhā mashokranglakha eina tangda Jericholi pamsālu, chiwui thili hanunglu.”

⁶Ammonnaobingli Davidna maringkaphā chi theihaoda, athumna Beth-rehobli khalei kala Zobahli khalei Syriawui raimi thingmaga̱, Maacah awungali ngasoda thingkha, Tobwui thing tharāda khani amasākhui.

⁷Kala tui chi kashā eina Davidna Joabli ngasoda rai ashangva̱ kapingbing saikora chihoserhaowa.

⁸Kala Ammonnaobingna raisāri ngaveiriplaga zangkhavai ngaveili pareng sāda kazipa; Zobah eina Rehobwui Syrianaobing kala Tobeina Maacahwui raimibingna luiwuk khamashāli kazipa.

⁹Joabna khanukshongla mangāshongla nganingphin kahai chi kathei eina Joabna Israelwui raimi hākhuilaga Syriawui raimibingli ngarar khavai nganingrip ngasakhaowa;

¹⁰khangateibing chi agato Abishaiwui pāngli horsangmida Ammonnaobingli ngarar khavai ngahermithaowa.

¹¹Kala ana hānga, “Syriawui raimibingna yuihaiakha, nana rāngachonlu; kala Ammonwui raimibingna yuihaiakha, ina rāngachon jira.

¹²Pingmeilu, kala ithumwui mibingwui vang kala ithum Vare keinungwui vang mayarnao akha sāda ngararsa; PROHOna khamayā chieina vairanu.”

¹³Chieina Joab eina awui raimibingna vānganaida akhangarar eina, Syriawui raimibing awui mangāli yāmhaowa.

¹⁴Kala Syriawui raimi yāmhaira da kathei eina, Ammonwui raimibingla agato Abishaili mangararla keinunglungli yāmungserhaowa. Chieina Joabna Ammonnaobingli mangararluila Jerusalemli latunghaowa.

¹⁵Kha Syriawui raimibingli Israelna yuikahai chi kathei eina, Syriawui raimibingna kazipluishita.

¹⁶Kala Euphrates makānda khalei Syrianaobingli Hadadezerna ahokhui ngasaka; kala athumna Hadadezerwui raimi kathāna Shobachli ngasoda Helemli thānrai.

¹⁷Kala chi Davidli kahāng eina, ana Israel saikora kazipkhuilaga Jordan kānkāda Helemli vai. Kala Syriawui mibingna ngaherlaga Davidli ngarara.

¹⁸Kha Israelwui mangāli Syriawui raimibing yāmhaowa; kala Davidna siguigari kathaobing shāshini, sigui katong thing hangmatili sāthathaowa; raimi kathāna Shobachna khamā za̱haida chili thihaowa.

¹⁹Kala Hadadezerwui rao wungnaobingna athum Israelwui azingli maikashi samkaphang chi theilaga, athumna Israelli amashitkhuihaowa. Kala Israelwui rao sāhaowa. Chiwui vang eina Syriabingna Ammonnaobingli ngachonki kaji tharinghaowa.