Read Tangkhul Naga 2 SAMUEL 15 Bible Online

2 SAMUEL 15 - Tangkhul Naga bible

2 SAMUEL 15

¹Chiwui thili Absalomna akhalattawui siguigari akha kala siguibingla khuida awui mangāli raimi hangphangāli thānzat ngasaka.

²Kala Absalomna ngathorthākva̱ thuilaga ngaveipheili anganingning jiya; kala kachikathāna bicharwui vang awungali rākida kazat tharan, Absalomna hokhuilaga, “Na khi keinungwui eina khala?” da ngahānkhui. Mi china, “Narao Israelwui chipāshi shangna” da hāngakha,

³Absalomna, “Iya, ngalei hiwui bichar kasaa I ngasāsasi kaja chong! Tui kashok saikorana ili rāda ina mashungrik eina bichar sāmira.”

⁴Chili lāngda Absalomna hānga, “Iyavo, I ngalei hiwui bicharsame sasi kaje chong! Tui kashok kala bichar saikorali ina mashungrik eina bichar sāmira,” da hānga.

⁵Kala kachikathāna ali rākhorumakha, apāng khuishokta vamkhuilaga maya̱khaninga.

⁶Hithāda awungali bichar sākhavai kharā saikorali ana chithāda kasāwui vang mi kachiva̱na ali mayāngaiserhaowa.

⁷Kum khamate apeilam Absalomna awungali hānga, “Hebronli PROHOli ina ngashit kahai athishurda asākhavai khamayā mikhavai kapona.

⁸Kaja, Geshurwui Aramli leilakha narao ina, PROHOna ili Jerusalemli khuiungmiluishitakha, ina PROHOli rākhorumra” da ngashithaida lei.

⁹Awungana, “Chingri eina vaulu” da hānga. Chieina Absalomna ngakarthuida Hebronli vai.

¹⁰Kha Absalomna ngathumda paome chiholaga Israel katongali, “Talla̱ kakhong shākhaleoda, ‘Hebronwui awunga Absalomna sāhaira’ da vaoserlu” da ahāng ngasaka.

¹¹Jerusalemwui eina Absalomna hokhuida ngaso khava mi athum shākhanina; kha athumna khikha matheila khavāna.

¹²Kala Absalomna pha̱kaphayā chi chigatta leilakha, Davidwui machinme Gilonwui Ahithophelli Giloh keinungwui eina ahokhui ngasaka. Kala khangathum otsak chi pangmamānda Absalomwui mi chungsang khangai chungsanghaowa.

¹³Kala paome akhana Davidli unghānga, “Israelnaobing Absalomli ning horsangserhaira.”

¹⁴Chieina Jerusalemli leikasā awui raobingli Davidna hānga, “Ngakarthuilu, ithum yāmusa; maningkha Absalomwui eina yāmkashok masamphangpaishina; thākta zatlu, chi maningakha ithumli thaklāk eina ngaphankhuida kalākashi tāhaora, keinungli khalei saikora raighaina sāthatser kachanghaora.”

¹⁵Chieina awui raobingna, “Yanglu, ishāmei awungana phāra kaji sākhavai ngaraidalei” da ngahānkai.

¹⁶Chiwui vang awunga kala awui shimkhur saikora thuiserhaowa. Kala shim mayon khavai angashirva tharā haihaowa.

¹⁷Awunga kala mi saikora awui thi shurda zatthuihaowa, kala khanaowa shimli angasāmkhui.

¹⁸Kha awui raobing, Cherethnaobing, Pelethnaobing, Gitnaobing shātharuk, Gathwui eina ali shurkazatbing chi mangasāmla ali kanthuiserhaowa.

¹⁹Chieina Gitpa Ittaili awungana hānga, “Na khisāda ithumli shurrakhala? Nathum yur khangateina, awungali ungngasopamulu.

²⁰Nathum ayāmāng kharāna, laga ina makatheipamli kathāda thānzatkachangrakhala? Nachinā ngarāli thānphungda ungulu, PROHOna awui makhangachei leikashi chitheida ningtongda yangmiranu.”

²¹Kha Ittaina ngahānkāda hānga, “PROHOwui ming singda kahāngna, kala ishāmei awungana theira, thilala ringlala na khaleipam chili ithumla leira.”

²²Chieina Davidna hānga, “Thakha vaulu.” Chieina Gitpa Ittaina, awui mibing, naongarāla zangda vāhaowa.

²³Kala mibing thuikahai theilaga aram katonga chapngachai. Kala awungana Kidron kong kānhaida mi saikora lamhāngshong vāserhaowa.

²⁴Kala Abiatharla rāda, yanglu, Zadokla Levi saikora ngasoda Varewui tuingashitwui oko chi phungrāda, mi kachiva̱ keinung makānranglakha eina tangda Varewui ningkhami oko chi haizangda ngaraikhui.

²⁵Chiwui thili Davidna Zadokli hānga, “Varewui ningkhami oko chi keinungli khuiunghaolu. PROHOna ili leishimiakha thānungmiluishitta, hila mibingla ungsamphangluira;

²⁶kha kalikha ana ‘Nali ina ningyāngkhaung maleimana’ jiakha yanglu, I hili leili, ana phāra kaji chieina vairanu.”

²⁷Awungana pāngmon Zadokli hānga, “Yanglu, nanaomayara khani, naomayara Ahima-az kala Abiatharwui naomayara Jonathan nathum chingri eina keinungli ungulu.

²⁸Yanglu, kaja naniwui pao masamphangranglakha eina tangda ina lamhāngwui kathuka chili ngaraisāra.”

²⁹Chieina Zadok eina Abitharna Varewui ningkhami oko chi Jerusalemli khuiunglaga chili ungpamhaowa.

³⁰Kha Davidna pheihop matongla, kachon kuirunlaga chapsasui Olive Kaphungshong kahaowa; kala ali khangaso mibingla kuirunriplaga chapsasui kāhaowa.

³¹“Ahithophel Absalomwui rairuili zanghaira” da Davidli ahānga. Davidna seihā sāda hānga, “O PROHO ina nali seihā sali, Ahithophelwui hāngkachithathei mangkhama̱wui tui kathā ngasāmihaolu.”

³²Vareli khorum khavai kaphungtonli Davidna kākashung tharan, yanglu, Architwui Hushaina phahon serkhākta kuili ngalei neolaga rārāsai.

³³Davidna hānga, “Kalikha nala ili ngasovāshumakha, iwui vang sakkhanā ngasāhaora.

³⁴Kha kalikhada nana keinungli hanunglaga, Absalomli nana, ‘Thuikahai atamli I navāwui rao sākasā thāda, aruila nawui rao sāpapamra, O awunga’ da ahānglu; chithākha nana iwui vang Ahithophelwui tuili yuimira.

³⁵Pāngmon khani Abiathar eina Zadokla nathumli chili ngasokapam maningmala? Chiwui vang eina awungawui shimli nana kashāshā chi Zadok eina Abiatharli hānglu,

³⁶Yanglu, Zadokwui naomayara Ahima-az, kala Abiatharwui naomayara Jonathanla chili leiserli; nana kashāshā chi anina ili rāhāngpaira.”

³⁷Chiwui vang eina Davidwui ngasota Hushaina keinungli khaung eina, Absalomla Jerusalemli ungchamda leisai.