Read Tangkhul Naga 2 SAMUEL 19 Bible Online

2 SAMUEL 19 - Tangkhul Naga bible

2 SAMUEL 19

¹“Yanglu, Awungana Absalomwui vang sifada chapngachāda lei” kaji Joabli hānga.

²Chiwui vang chithang khayui chi mi saikorawui vang chapkhangachā ngasāhaowa; kaja “Awungana awui naowui vang wukkhanangda lei” da mina chithang shāhaowa.

³Kala rai mayuimada mibingna yāmngayin kazatwui kakhayak thāda chithang mibingna keinungli va̱rihaphaowa.

⁴Awungana kachon kuirunlaga, “O inao Absalom, O Absalom, inao, inao!” da panglāk eina chapa.

⁵Chieina Joabna awungawui shimli vāda hānga, “Aja zimik namanglā, nanaongarā, napreiva̱̱ ngarā, angashirvabingwui manglā kankhami nawui raimibingli kakhayakna mai kuirunmida nana athumli aja maishingasakhaira,

⁶khikhalajila nana nali yangkashebingli leishi, kala nali leikashibingli nana yangkharinga. Kaja nana nawui raimi kathānabing kala raimibing aja tharlak eina khikha maningmana da nana sāchitheihaira; kaja aja ithum saikora thihaida Absalom mathisāsi kaje na mathānshunra kaji ina theikhuihaira.

⁷Chiwui vang eina ara ngakarthuida shoklu kala nawui raimibingli mathālak eina hānglu; kaja chi mathaakha, PROHOwui ming singda kahāngna, arui ngayā mi akhala nali ngasoda maleisāmara; kala na yaronlakha eina thuida aja rāshungda nawui mirinli kalākashi kharārā chile hina nawui vang zakshimeikharhaora.”

⁸Chieina awungana ngakarthuida ngaveili shokpama, kala “Yanglu, awunga ngaveili pamda lei” da mi saikorali chishāta; kala mibing saikorana awungali asamphanga. Chitharan Israelnaobing[1] kachichāshiwuili yāmungserhaowa.

⁹Kala Israelwui shang saikorali nganang ngarokta hānga, “Awungana ithumli yangkashebingwui eina kanshokmi; kala Philistinewui pāng eina kankhuimi; ara ana Absalomwui pāng eina yāmshokhaira.

¹⁰Kha ithumna thao neomi kahaiya Absalomla raili thihaira. Chiwui vang awungali ahokhui khavai nathumna khiwui vang mahānglak kajikhala?”

¹¹Kala Judah shimkhurli hāngkhavai Awunga Davidna pāngmon khani Zadok eina Abiatharli pao miungda hānga, “Judahwui khararnaobingli hānglu, ‘Awungali khuiung khavai Israelnaobing rāngasanserhaira; kachiwui vang eina Judahna khanaowa sārakhala?

¹²Na iwui khanganaiyana, na iwui asheena, asāna, laga kathāda nana naomeithuirakhala?’

¹³Kala Amasali hānglu kaja, ‘Na iwui ashee asā maningmala? Ina Joabwui mahut nali raithanme masangakha Varena theira.’”

¹⁴Kala awui tui china Judah saikorali ningkhokkha sāngasakhaoda awungali, “Nala, nawui raimibingla latungserlu.” da hāngchiphunvai.

¹⁵Chiwui vang awungana Jordanli latunga; kala Jordan kongli phungkāmi khavai Gilgalli Judahna angaroka.

¹⁶ Kala Bahurimli khalei Benjaminshi Gerawui nao Shime-ina awunga Davidli angarok khavai Judahwui mibingli totot eina ngasovai;

¹⁷kala ali Benjaminnaobing thingkha ngasosai. Kala Saulwui rao sākasā Zibana awui naomayara tharāda phangā kala rao maga̱ thānlaga awungali Jordanli asamphanga,

¹⁸kala athumna awungashi shimkhurli phungkāmi khavai kala awungawui ningkachāng sāmi khavai makān khavaishong eina kānkai. Awungana Jordan makānranglakha Gerawui nao Shime-ina ngakhumshāmzanglaga hānga,

¹⁹“Ishameina Jerusalemwui eina thuithang narao ina sākahai chiwui vang khayon mamiranu, lah chithang naraowui khayon chi maphaningungmiranu; kala mahaimiaranu,

²⁰kaja ina morei sāhaira kaji naraona theikhuihaira; chiwui vang eina, yanglu Josephshi shimkhurwui ngachaili ina rimeithuida ishāmei awungali rāsamphang khavai rākhangarokna.”

²¹Zeruiahwui nao Abishaina, “PROHOwui thao neomi kahaiyali khonkashiwui vang Shime-ili masāthatngayimala?” da hānga.

²²Kha awungana hānga, “Zeruiahwui naomayarabing, iwui pongli khi hāngsang khavai leikhala? Kaja aja nathum iwui yangkashi sāhaorala? Aja Israel akhali shaothatkapai atamla? Kaja aja I Israelwui awungana kaji ina matheithula?”

²³Kala awungana Shime-ili hānga, “Na mathimara” da awungana ali awui khangashit mihaowa.

²⁴ Chiwui thili Saulwui nao Mephiboshethna awungali samphang khavai rai; awunga thuihaithang eina thuilaga latkhaung eina tangda apheiwui chonnneila maneimana, morhāla masimana, kachonla mangasa̱lakmana.

²⁵Jerusalemwui eina ana akhangarok tharan awungana hānga, “Mephibosheth, na khisāda ili mangasovāthukhala?”

²⁶Ana ngahānkai, “Ishamei, O awunga, iwui raona ili kapikhaowa: kaja narao sheisha̱haoda, ‘Iwui vang gadhā akha shaksāmilu, chi tonglaga ila awungali ngasothura’ da hānga.

²⁷Ana awungawui mangāli naraoli thikhavai matuihaowa. Chithālala ishāmei awunga, nava Varewui kazingrao kathāna; chiwui vang nawui kapha chi sāmilu.

²⁸Kaja ishāvāwui shimkhur, mi saikora ishamei awungawui mangāli shimānchaohaoki kajina; kha nana naraoli nawui tableli phazākhangarumbingwui ngachaili chipama. Chili lāngda ina awungali pokhavai khi leiluikhala?”

²⁹Kala awungana ali hānga, “Khisāda nawui pongli chiyākha matuikhala? Ina tuitak khuihaira: ngalei chi Ziba nani ngayarpakra.”

³⁰Chieina Mephiboshethna hānga, “O, saikora chi ali khuikhalairanu, Ishamei awunga, shimli chingri eina unghaida phāshunhaira.”

³¹Chitharan Gileadpa Barzillaila Rogelimwui eina rārāsai; kala ana awungali Jordanli thankā khavai ngasovāshuma.

³²Barzillai hiya kasarnao kum hangchishat kashung kahai mina, kashānga mi sāthuda, awungana Mahanaimli leilakha ana kashakazā ngarānmi.

³³Kala awungana Barzillaili hānga, “Ili ngasounglu, ina nali Jerusalemli nawui vang pam mida ini chili ngasopamra.”

³⁴Kha Barzillaina hānga, “Ara I karankha okthuirada awungali ngasoda Jerusalemli vārakhala?

³⁵Ara kum hangchishat kāhaira; narao ina kashi-kaphāla khi theira, zākaphā mangkaphāla khi theira? Kala mayar-ngalawui laa kasā chila nganākhuishapluirala? Khisāda awungali naraona chotchān sāsangmirakhala?

³⁶Narao ina awungali Jordan kānda kasha̱kha ngasovāmara. Awungana khisāda hikathā sāman mikhavai phaninghaokhala?

³⁷Narao ili iwui keinungli hanung khavai kala ishava̱ ishāvāwui chikhur ngalemli chifapai khavai khamayāmilu. Kha narao Chimham hili leili awungali ngasoungranu, kala awungana sāmikhangai chi samiranu.”

³⁸Awungana hānga, “Chimhamna ili ngasoungra kala nana sami ngasak khangai chi ina sāmira, kala nana ningkachāng athishurda ina nawui vang ali sāmira.”

³⁹Chiwui thili mi saikora Jordan kānhaowa, kala awungala kānhaowa, kala awungana Barzillaili maya̱khuida sokhami mida ala ashishim hanunghaowa.

⁴⁰Awungana Gilgalli ungshunga, kala Chimhamna ali ngasounga. Judahwui mi saikora kala Israel ngayarpakna awungali thānunga.

⁴¹Chieina Israelwui mi saikorana rāda awungali ahānga, “Kachiwui vang eina ichināngarā Judahwui mibingna nali ngathumda khuithuihaida awunga kala awui shimkhur kala awui mibingli Jordanli thānunghaokhala?”

⁴²Judahwui mi saikorana Israelwui mibingli hānga, “Awungala ishi theisāna, chiwui vang kathāda hiwui pongli malungvātkhala? Ishili awungana phauihaola, chikā ana ishili khikhakha mihaola?”

⁴³Israelnaobingna Judahwui mibingli ngahānkai, “Awungali ishiwui sharuk tharā zangda lei kala Davidli ishi ngavapmei. Kathāda mikpaishipaira? Awungali ahokhuisa kaji ishina mahāngrimala?” Kha tuimatuile Israelnaobingle Judahpāshina marmei.