Read Tangkhul Naga 2 SAMUEL 20 Bible Online

2 SAMUEL 20 - Tangkhul Naga bible

2 SAMUEL 20

¹Chitharan Benjaminshangli, Bichriwui naomayara Sheba hoda khikha masākhavai mi akha leisai; kala ana talla̱ khongda hānga, “Davidwuili ishiwui yar maleimana, ithum Jessewui naomayarwui eina shimlui samphang khavai maleimana; kachichāshili ungserulu, O Israel!”

²Chiwui vang Israelwui mibing saikorana Davidli horhaida Bichriwui naomayara Shebali shurthuiserhaowa; kha Judahwui mibingna awungali mahorhailakla Jordanwui eina Jerusalemli shurunga.

³ Kala Davidna awui shim Jerusalemli ungkashung eina; awungana awui shim mayon khavai nothā kahai angashirva tharā chi shim akhali haihailaga athumli mayon khavai mi phāsanga, kala athumli kashakazā ngarānmi; kha athumli mangasopiluimana. Chithāthāda ra̱meinao sāda athumwui athitlam eina tangda shungnamhaowa.

⁴Chiwui thili awungana Amasali hānga, “Kathumthangwui alungli Judahwui mibingli hokhuida kazipkhuilu kala nala chili leisalu.”

⁵Chieina Amasana Judahli ahokhui khavai vai, kha ali langchin sākahai atam chili ana makazipkhuirarthuwa.

⁶Davidna Abishaili hānga, “Bichriwui nao Shebana Absalomli zakshimeida sāra; ana keinungbingli raipan sākhuilaga ithumli hapkhanopaishina, nawui raimi thānlaga ali kharomkhuilu.”

⁷Abishaiwui thili Joab, Cherethnao, Pelethnao kala kapingabing saikora zangda vai; Bichriwui nao Shebali kharomvā khavai athumna Jerusalemwui eina zatuwa.

⁸Athumna Gibeonli vākashung eina ngalung kahakva khaleipam chili Amasa ungngarokrāsai. Joabna raisāri shaksālaga chiwuitungli raighai ahonli sanglaga akashānli shanneira̱ eina ngaveiphunga, kala ana mangāshong zatvāmamānda chi ahonwui eina tātunghaowa.

⁹Kala Joabna Amasali, “Ichina kathamameili?” da hānga. Joabna yāshong eina Amasawui morhāli yonkhuida maya̱ khavai sai.

¹⁰Kha Joabwui pāngli raighai kasing chi Amasa matheithuwa; chieina Joabna awukli tovātsangmihaida akhari ngaleili tātungda tokhanishi majila thihaowa. Kala Joab eina achinā Abishaina Bichriwui nao Shebali kharomthuihaowa.

¹¹Kala Joabwui mi akha Amasawui ngalemli nganingda, “Joabli ngahānkhangaibing khipālong, kala Davidwui vang khipālong, Joabli shurthuranu” da hānga.

¹²Kala Amasana asheemāng eina chanreili ngaleopama. Kala rākakān saikorana, ali kathei eina rānganingsera; mi saikorana rākhayang chi theida Amasali khamasaipam akhali khuivāhaowa, kala kachon akha farormihai.

¹³Ali shongfawui eina khuithui kahaiwui thili, saikorana Bichriwui naomayara Shebali kharomthui khavai Joabli shurthuiserhaowa.

¹⁴Kala Shebana Israelwui shang saikora peida Beth-maacahwui Abelli vāshunga; kala Bichrinaobing saikora kazipkhuida awui thi shurhaowa.

¹⁵Kala Joabli khangasobingna Beth-maacahwui Abel kaho apam chil akuinamhaowa; athumna pan ngalemli ngalei thongkai, chiwui eina keinungwui raipan phaklāng chi shirkhaitā khavai sai.

¹⁶Chieina thangkhamei preiva̱ akhana keinungwui eina vaoshokta hānga, “Nganālu! nganālu! Joabli hānglu, ‘Nali chān ngazek khavai hili rālu jilu.’”

¹⁷Kala ana awui ngalemli khavā eina sha̱nao china, “Na Joabla?” da ngahāna. “Ina” da ngahānkai. Chieina preiva̱ china hānga, “Narao iwui tui khanganāmilu.” kala “Ina nganāda lei” da hānga.

¹⁸Chiwui thili preiva̱ china hānga, “Achalakha nganang-ngazaiakha, ‘Abel keinungli achamnākhuilu’ — kaji chānjam akha lei, kala chithāda chamnākhuiya.

¹⁹Ila Israelwui alungli chingri eina khamathā sākhangai ning katongva̱ akhana, nathumna Israelli ava̱ kasā keinung hi sāshimān khavai sādalei, khisāda PROHOwui shimlui sāshimānmihaonikhala?”

²⁰Joabna ngahānkai, “Chikathā maningmana, ina masāshimānmimara, lah masākhayangmara!

²¹Chi mamashungmana. Kha Ephraim kaphungramli khalei Bichriwui naomayara Sheba kaho china awunga Davidli ngakaikashiwui vang; amangli khuishokmiakha ina keinung hiwui eina hanthuihaora.” Preiva̱ china Joabli hānga, “Yanglu, awui kui phākho tungwui eina hortamira.”

²²Chiwui thili preiva̱ china thangmeilak eina hānglaga, athumna Bichriwui nao Shebawui kui rangkhuida Joabli hortāmihaowa. Joabna talla̱ kakhong eina athum ngathānse haida kachichāshi shimli ungserhaowa. Kala Joabla Jerusalemli awungawuili unghaowa.

²³ Chitharan Joabna Israel katongawui raimi kathāna sāsai, kala Jehoiadawui naomayara Benaiahna Cherethbing eina Pelethbingwui kathāna sāsai;

²⁴kala Adoramna thoukai kaphungwui yangsangkhame; Ahiludwui naomayara Jehoshaphatna kapimena,

²⁵kala Shevana thuilinga kala Zadok eina Abiatharna pāngmon sai;

²⁶kala Jairpa Irana Davidwui pāngmon sai.