Read Tangkhul Naga 2 SAMUEL 21 Bible Online

2 SAMUEL 21 - Tangkhul Naga bible

2 SAMUEL 21

¹Chitharan Davidwui atamli kum kathum ngaronda chāmrei rāhaowa; Davidna PROHOli seihā sai. Kala PROHOna hānga, “Saulna Gibeonnaobingli shaokathatwui vang a kala awui shimkhurli asheewui morei lei.”

² Chieina awungana Gibeonnaobingli hokhui. Gibeonnaobing hi Israelwui mibing maningmana, kha Ammonnaobingwui shāk kahaina; Israelwui mibingna athumli masāthatmara da ngashithaisai, kha Saulna Israel eina Judahwui vang malungchāngda shaothat kahaina.

³Kala Davidna Gibeonnaobingli hānga, “PROHOwui miyurli nathumna malung mavātlui khavai khi eina athut hāngsangmilu jikhala?”

⁴Athumna ali hānga, “Saulshi shimkhur eina ithumwui ngachaili sinā lupāwui tuila maleimana; kala Israel khipālikha sākathatwui tuila maleimana.” Ana ngahānkālui, “Chithakha nathumwui vang ina khi sāmilu jikhala?”

⁵Athumna awungali hānga, “Ithumli Israel ngaleili akhanida maokthui khavaiwui vang sāshimān khavai khangarān kasaa,

⁶mi chiwui naomayarabing, PROHOwui phungrei Gibeonli PROHOwui mangāli phāshi sākhavai, athum shini milu.” Awungana, “Ina athum chi mira” jihaowa.

⁷ Kha David eina Jonathanna ngashit ngarok kahai khaleiwui vang, Saulwui ara̱ kaja Jonathanwui nao Mephiboshethle athumwui pāngli mahorsangmimana.

⁸ Kha Saul preiva̱ Aiahwui naongalāva̱ Rizpahna kapharā naomayara khani Armoni eina Mephibosheth; kala Meholathpa Barzillaiwui naomayara Adri-el preiva̱ Merab, kaja Saulwui naongalāva̱na kapharā naomayara phangā da athum shini,

⁹awungana Gibeonbingwui pāngli horsangmi. Kala PROHOwui mangāli phungreili phāshi sāhaida athum thitkha sāhaowa. Athumli phāshi kasā hi mahā kachāngwui hatkhare thangna.

¹⁰Chiwui thili Aiahwui naongalāva̱ Rizpahna lunghār tungli bora akha phayairorhai; kala mā hātkaphok eina thuilaga kazing kumda zingrotra̱ matāranglakha eina tangda ngashun ngayā vānaola, sāla marāngasaklakmana.

¹¹Saulwui angashirva Aiahwui naongalāva̱ Rizpahna kasā chi Davidna shālaga,

¹² Davidna Saul kala anaomayara Jonathanwui ara̱kui, athumli Gilboali sathatthang Philistinenaobingna Beth-shanwui yarui leihngapha̱li hokthanghaisāda Jabesh-gileadwui mibingna ngathumda khuithui kahai chi akhui;

¹³kala Davidna Saul eina anaomayara Jonathan kala kāngyuithat kahaiya athumwui ara̱kui akhuisera.

¹⁴Kala awungana kakaso athishurda, Saul eina Jonathanwui ara̱kui, Benjaminli khalei Zela kaho apamli, avāva̱ Kishwui chikhurli chifahaowa. Chiwui thili ngalei chiwui kapo chi Varena khuisangmihaowa.

¹⁵Philistinenaobingna Israelli rai rāngararluishita, kala Davidna awui raimi thānlaga Philistinenaobingli angarara; kala David khananglākhaowa.

¹⁶Chieina Ishbi-benob, mireitheiwui naotunna, pithrai kg. kathum tangkhai kharit eina sākakhui awui kazei akha sing, kala raighai kadhar akha thāngphunglaga Davidli sāthat khavai hotnai.

¹⁷Kha Zeruiahwui nao Abishaina rāfahaida Philistinepa chili sāthathaowa. Chiwui thile Davidwui mibingna, “Na rai khangarar mavāluilakalu, chi maningakha Israelwui kahor shimānhaora” da hānghaowa.

¹⁸ Hiwui thili Gobli Philistinenaobingli ngararlui; kala chilila mireitheiwui naotunbing Saphli Hushatwui Sibbecaina sāthathaowa.

¹⁹Kala Gobli Philistinenaobingli ngararlui; kala kazei kapem rikha kasinga Gitpa Goliathli Bethlehemwui Jaare-oregimwui naomayara Elhananna sāthathaowa.

²⁰Kala hiwui thili Gathli ngararlui, chiwui raili mi kahakva akha awui pāng kala phei khaninili pāngmareng kala pheimareng tharuruk kakā; pheimareng pāngmareng mashing maga̱da mati kakā mi zangsai; ala mireithei naotunwui eina kharā mina.

²¹Ana Israelli kachipat eina, Davidwui achinā Shime-iwui naomayara Jonathanna sāthathaowa.

²²Athum mati hi Gathli khalei mireitheiwui naotun shimkhurli kapharā misera; athum Davidwui pāngli kala awui raimibingwui pāngli thisangserhaowa.