Read Tangkhul Naga 2 SAMUEL 22 Bible Online

2 SAMUEL 22 - Tangkhul Naga bible

2 SAMUEL 22

¹Yangkashibingwui eina kala Saulwui pāngwui eina PROHOna kanshokkhamiwui vang, Davidna hithāda laa sai.

² Ana hithāda hānga; PROHO iwui yāmngayin khavai lunghārna, kala kankhamena.

³Iwui Vare, iwui lunghārli ina ngayinkhui; iwui chāngvei kala huimi khavaiwui pangshapna, iwui ngayin khavai raipanna kala kankhamena, yangkashewui eina ili huimi.

⁴Ina masot mikhangaye PROHOli ngakaoda, yangkashebingwui eina huimi.

⁵Kaja kathiwui tara̱na ili kuinama, kazeipongwui tara̱na ili kuinama;

⁶Kathewui ramwui khara̱na ili neikhuiya, kathiwui khalenna ili ngasunga.

⁷Ining kachot tamli, iwui PROHOli ina ngakaowa; iwui Vareli ina ngakaowa. Awui khorumshimwui eina iwui akhon shāmi, kala iwui kachap ana khuisangmi.

⁸Chieina okathuina nganukta nganinga; kazingramwui shimphunga nganuka, awui malungkhavātna nganuk khangasakna.

⁹Anātangkhurli meikhut shoka, kala akhamorli mei mermer chui, thingjangmeithā thāda malingtinghai.

¹⁰Ana kazingram nemzang ngasakta; tangmangting kahai apheizingli lei.

¹¹Ana cherub tongda yongzata; ali masiwui angachāngli thei.

¹²Ali tangkhamangna kuimareiphin ngasaka, tara̱na kazipkakhui muiyā kashā awui khaya̱larna.

¹³Awui mangāli kahor chiwui eina meithā malingting eina shokngasaka.

¹⁴Kazingramwui eina PROHOna khangangtai; kala Reikhamataiyana vaotai.

¹⁵Kala ana rikhānwui malā kāpkhayangda, yaggashebingli yui.

¹⁶Chiwui thili PROHOna khakkhākharor eina, shamadruwui ra̱shongla thei, apuk-apagwui zangkatangla ngahāhanghaowa.

¹⁷Kazingwui eina ana ili khāngshokmi, ngayiwui tara̱ kachungkhawui eina;

¹⁸Ili yangkakharing kapangabingwui eina ana ili kanshokmi; kaja athum iwui vang pangnahaowa.

¹⁹Ina khananglakha athumna ili rāngarara; kha PROHOna ili makārmi.

²⁰Ana ili khamashā pamli khuishokmi; ngahānkhangaiwui vang ili kanshokmi.

²¹Iwui khangarong athishurda PROHOna ili sāman mi; ipāng kathar athishurda ana samphang ngasaka.

²²Kaja PROHOwui apongli ina shurzata, Varewui eina yāmhaida makaphā masāmana.

²³Kaja awui shiyan-chikana ili thānmi, kala awui ainwui eina I mangareithuimana.

²⁴Awui mangāli I shāt makāmana, kala ina khalāng ot masāmana.

²⁵Chiwui vang eina iwui khangarong athishurda, awui mikyanli mashun otsak athishurda, PROHOna ili samphang ngasaka.

²⁶Khangavapali nana ngavapmi, shāt makakā mili nanala shāt machigatmana.

²⁷Katharali nanala tharda chitheimi, phaning khanguiyali khangui nana sāchithei.

²⁸Ngahuiri kahai mili nana kanshokmi, kha hiksor kahai mili nana yangkharingda ngakhuntai.

²⁹Mha, na iwui thaomei na, O PROHO, kala iwui Varena tangkhamangli hormi.

³⁰Mha, nawui mangā eina ina raimibingli yuishapa; kala iwui Varewui mangā eina ina raipan yongkānshapa.

³¹Varewui apong mangapeilakmana, PROHOwui ngashit kahai mangapatmana, ali yāmkhangayin saikorali ana chāngvei sāmi.

³²Vare hi PROHO maningmala? Vare maningla lunghār khipa lei?

³³Vare hi iwui khamakanga yāmngayin khavaina; kala iwui shongfa kalā mashingasakmana.

³⁴ Ana iphei chaophei thāda thākngasaka; kala kaphungli yansāngsa̱ eina chipama.

³⁵Ana ipangli ngarar khavai tamchitheida; chiwui vang ipāngna pithraiwui malāthing hunshapa.

³⁶Nana ili nawui huikhamiwui chāngvei mi, nana ngachonmida ili reingasaka.

³⁷Nana ili khamashāpamli zatngasaka, kala makonglui ngasakmana.

³⁸Ina yangkashebingli kharoma kala sākazama, kala athum makānranglakha eina tangda mangareiungmana.

³⁹Ina athumli kupmihaoda; Ina pharsei pharseisanghaida ipheizingli pitai; kala athum mangakarthukluithuwa.

⁴⁰Kaja nana raiwui pangshap ili sangmi, ili khangararbingli iwui mangāli pitā ngasaka.

⁴¹Nana iwui yangkashebing iwui eina yāmngasaka, ili yangkakharingbingli ina sākazamhaowa.

⁴²Athumna phālala kanmi khavai khipākha maleisā; athumna PROHOli ngakaolala ana mangahānkāmana.

⁴³Ina athumli ngaleiwui chifa-chihā thāda ngaphitkachupa; Ina naikachupta shongfa khangapetwui leikhon thāda sāmihai.

⁴⁴Mibingwui rotkhamarātwui eina nana ili kanshokmi; yur akhawui akhavā sāngasaka. Ina makathei yurna ili otram ngatha̱mi.

⁴⁵Yur kateina ili yāmsanga, iwui tui shākhaleoda athumna kahāng nganai.

⁴⁶Yur kateibingna malung tātungda ngacheerarang ili thākta yāmrai.

⁴⁷PROHOna katheina, iwui lunghār chili sochikatranu; kala iwui huikhame lunghār, Vare chili maiyāranu,

⁴⁸athut hāngsangmida mibingli iwui azingli haikhame Vare,

⁴⁹yangkashebingwui eina ili kanshokmi; kala yangkashebingwui mangāli ili maiya khangasaka, nganang-khangazāibingwui eina kankhame Vare chili sochikatranu.

⁵⁰ “Hiwuivang, O PROHO, yurbingwui alungli; nali sochingra, namingli laa sāchingra.

⁵¹Awui awungali yuikhamataiya sangasakmi; Ana thao neomi kahaiya chili makhangachei leikashi chitheimi, Davidli kala awui naotunli, katang mavaila.”