Read Tangkhul Naga 2 SAMUEL 24 Bible Online

2 SAMUEL 24 - Tangkhul Naga bible

2 SAMUEL 24

¹ Israelwuitungli PROHONA malungvātluihaida, Davidli ning za̱ngasakta hānga, “Vālu, Israel eina Judah shānkhuilu.”

²Chieina Davidna ali khangaso Joab eina raithānabingli hānga, “Mi kayākha leikhala kaji theikhuipai khavai Dan eina thuilaga Beer-sheba vāshungda Israel shang saikora shānkhuilu.”

³Kha Joabna awungali hānga, “Leida khalei hiwuitungli shākha shida nawui PROHO Varena nawui mik raklakha ngarumsangmiranu; kha ishāmei awungana khiwui vang sākhangaikhala?”

⁴Kha Joab eina raithānawui tuili awungawui tuina yuihaoda, Joab kala raithānabingla Israelwui mibing shānkhui khavai thuihaowa.

⁵Athumna Jordan kānlaga Aroerwui eina kala chiwui tampākli khalei keinungbingwui eina shānlaga Gad kānvāda Jazerli vāshunga.

⁶Chiwui thili athumna Gileadli vālaga Hit ngalei Kadeshli vamamānda Danli vāshunga, kala Danwui eina Sidon kuikhui,

⁷chiwui eina Tyrewui raipanshong vālaga Hivnaobing Canaannaobingwui keinung shānkhuiserlaga Beer-shebali khalei Judahwui Negebli vai.

⁸Athumna lam saikora vapeihaida Jerusalemli kachāng kachiko zimiksho khamaga̱ thanghon hanunga.

⁹Kala Joabna mi mashing saikora ngarumkhuilaga awungali unghānga: Israelwui alungli raighai singda rai khamarāka mi lakh chishāta, kala Judahwui mi lakh phangāna.

¹⁰Kha mi mashing shānkhui kahaiwui thili David ning sāza̱haowa. Kala ana PROHOli hānga, “Ina kasā hi nguilakhaira. O PROHO, ina poli narao iwui khayon hi kapheomilu, kaja ina mangma̱lak eina sāhaira.”

¹¹Kala ngathor Davidna kathui tharan, awui marān Gadli PROHOna chihovai, kala

¹²“Vāda, Davidli ahānglu, PROHOna kahāngna, apong kathum ina khamina, akha kapangkhuilu, ina nali ungshung ngasakra,”

¹³Chieina Gadna Davidli ahānga, “Nawui ngaleili kum kathum zāt sakngasakrakā, maningakha, yangkashebingna nali kharomda kachāng kathum yāmzattha̱ra, jika, kathumthangwui vang kazātkashi nawui ngaleili rāngasakngaikhala? Ili kachiho mi chili khi unghāngrakhala kaji chukmaja kazaklaga hānglu”

¹⁴Chieina Davidna Gadli hānga, “Ining chotnāhaira; ithum PROHOwui pāngli tāzangtha̱ga, kaja awui lukhamashan haklaka; kha ili miwui pāngli matāzang ngasakmilu.”

¹⁵Chiwui vang PROHOna kazātkashi chihoda, chithang ngathor eina thuilaga langchin kahai peidawui alungli, Dan eina thuilaga Beer-sheba vāshungda, mi thing hangshini thihaowa.

¹⁶Kala Jerusalem shimān khavai kazingraona pāng katingkhavā eina, PROHOna lumashanhaida kazingrao chili, “Shaphaira, napāng thāhaolu” da hānga. Atam chili kazingrao chi Jebuswui Araunahwui luili leisai.

¹⁷Chiwui thili kazātkashi rākhangasaka kazingrao chili kathei eina Davidna PROHOli hānga, “Yanglu, ina morei sāhaira; kala ina makaphā ot sāhaira, kha yaonaobing hina khi sāhaokhala? Nawui pāng chi ili tāranu, kala ishāvāwui shimkhurli tāranu.”

¹⁸Chithang Gadna Davidli ahānga, “Vada, Jebuswui Araunahwui lanpumli PROHOli hanphut akha sāda apha̱phayālu.”

¹⁹PROHOwui kakaso thāda Gadna kahāng athishurda Davidna vai.

²⁰Araunahna yangkhavā eina, awungala awui mibingla zangda awuishong rākhara theida angaroka, kala kui mashunzangda akhoruma.

²¹Kala Araunahna hānga, “Ishamei awungana narao iwui shimli kharā hi khiwui vangkhala?” Davidna hānga, “Kazātkashi hi makazālui khavai nawui lanpum lokhuilaga PROHOwui hanphut sakāsi kajina.”

²²Chieina Araunahna hānga, “Ishamei awungana phāra kaji chi khuida ali chigatlu, rikkatā kachigatwui vang mukkābing leili, thingwui vang okkai, mukkāwui langkon leiserda lei.

²³O awunga, saikora hi Araunah ina nali mikahaina.” Kala Araunahna awungali, “Nawui PROHO Varena nali khuisangmiranu.” da hānga.

²⁴Kha awungana Araunahli, “Machithālu, ina aman milaga loki kajina; ina pheisā mazanglakla PROHO Vareli kachilikha pha̱kaphayā ot masāmara.” Chiwui vang Davidna lanpum eina mukkā chi lupāsā shekel hangphangā mida lokhui.

²⁵Kala Davidna apam chili hanphut akha sakālaga rikkatā kachigat eina ningyatchigat chigata. Chieina ngalei chiwui vang athumwui kapo PROHO na khuisangmida kazātkashi Israelli makazāluithuwa.