Read Tangkhul Naga 2 SAMUEL 4 Bible Online

2 SAMUEL 4 - Tangkhul Naga bible

2 SAMUEL 4

¹Hebronli Abner thihaira kaji kashā eina Saulwui nao Ish-bosheth malung kaping shimānhaowa, kala Israel saikora wukkhananghaowa.

²Chitharan Saulwui naomayara Ish-boshethwui mi ngaponkazāwui kathāna khani leisai; akhali Baanah, akhapali Rechab hoi; Be-erothli khalei Benjamin shimkhur Rimmonwui naomayara thathuiya (kaja Be-erothnaobing

³Gittaimli yāmvāda apamchang kahaiwui vang Be-erothli Benjamin shimkhurli shānsanga).

⁴ Saulwui naomayara Jonathanwui nao aphei sheisha̱laga akha leisai. A kum phangā kahairakasā tamli Jezreelli shokkahai Saul eina Jonathanwui pao kashā chitharan ali kakhuipava̱na phunglaga khayāmli katotnāhaoda kongluida aphei tekhaowa. Kala awui ming Mephibosheth hoi.

⁵Chitharan Be-erothpa Rimmonwui naomayara khani, Rechab eina Baanahna ngashunung kasā atamli Ish-boshethwui shimli khavā eina, ana ngasāmkhuida pisai.

⁶Kala yanglu, ashi khāmong khamayonva̱ chila mā sāmathāda singutta pivāhaowa; chieina Rechab eina Baanahna kasainakha azanga.

⁷Anina shimlungli kākhayang tharan, awui petli pisai, anina shaothatta akui rangkhui, kala akui chi phungda Arabahwui shongfa eina ngayā zatthai,

⁸kala Hebronli vāda anina Ish-boshethwui kui Davidli khuivāmi. Anina awungali hānga, “Nawui yangkashe, kala nawui manglā khuikhavai kasā Saulwui nao Ish-boshethwui kui hili leili; aja zimik PROHOna ishāmei awungawui vang Saul kala awui naothei tungli athut khuimihaira.”

⁹Kha Davidna, Beerothpa Rimmonwui naomayara Rechab eina agato Baanahli hānga, “Ka̱lākashi kachiva̱wui eina ili huikhame PROHOwui ming singda kahāngna,

¹⁰kachikathāna khamathā paona da phaningda, ‘Saul thihaira’ da rākahāng tharan awui paowui vang ina sāman mida ali ina tukkhuida Ziklagli shaothathaowa.

¹¹Chithākha makaphā mina khamashung mili, awui shim petli pida leilakha sākathata chili ina athut khuida nanili masāthat ngayimala?”

¹²Kala Davidna awui raimibingli kasoda athumna aphei apāng katatlaga phasā chi Hebronwui ra̱khongpheili hokthanghai. Kha Ish-boshethwui kui chi khuilaga Hebronli Abnerwui chikhurli chifahaowa.