Read Tangkhul Naga 2 SAMUEL 5 Bible Online

2 SAMUEL 5 - Tangkhul Naga bible

2 SAMUEL 5

¹ Chiwui thili Israel shang saikora Hebronli vāda Davidli hānga, “Yanglu, ithum nawui ashee asāna.

²Khare kachāng Saulna ithumli munglakha Israelli thānshokkhame chi nana; kala PROHOna nali, ‘Iwui Israel mibingwui yao kahoma sāra, kala athumwuitungli nana wungnao sāra’ da hānghaira.”

³Chiwui vang Israelwui khararnao saikorana awungali Hebronli rāhānga; kala Hebronli Awunga Davidna athumli PROHOwui mangāli tuingashit sai, kala athumna Israelwui awunga sākhavai Davidli thao neomihaowa.

⁴ Davidna mungkaphok atamli a zingkum thumra kāshunghairasai, kala ana kum hangmati munga.

⁵Ana Hebronli leilakha kum shini kachāng tharuk Judahli munga, kala Jerusalemli ana Israel eina Judahli kum thumrāda kathum munga.

⁶ Awunga eina awui mibingna Jerusalemli khalei Jebusnaobingli ngarar khavai vai; chili kapambingna, Davidli, “Na hili marāzangthukmara” da kaphaningwui vang, “Nana hili marāzangrarmara, pheikatek mik khangapeobingnala nali kashamshapra” da hānga.

⁷Chithālala Zionwui raipan Davidna yuihaowa, chiya Davidwui keinungna.

⁸Kala chithang Davidna hānga, “Kachikathāna Jebusnaobingli sāthatra jiakha, ana tara̱khur chieina katā Davidna yangkharingmeikap kaji pheikatek, mik khangapeobingli kāngararranu.” Chiwui vang eina “Khangapeobing, katekbing china shimli kazang masamphangmara” da kahāngna.

⁹Kala Davidna raipan sākahai apam chili pānda Davidwui keinung da hoi. Millo alungshongwui eina thuilaga keinung chi kuimareida Davidna ngaveimithaowa.

¹⁰Kala Davidna mataisangkhangai mataisanghaowa, kaja saikorawui PROHO Varena ali ngasomi.

¹¹ Kala Tyrewui awunga Hiramna Davidli paomebing eina ngasoda cedarthing, kala thing ot, ngalung ot kasā mi chihovāda Davidwui dolanshim asākāmi.

¹²Kala ali Israelwuilungli Varena awunga sāngasakhaira, kala awui wungram Israelwui vang mai kāngasakhaira da Davidna theikhui.

¹³Kala Hebronwui eina Jerusalemli akapam atamli Davidna preiva̱ kala ngashirva̱ chungmeida khuida naomayara kala naongalāva̱ kachungkha pharāsanghaowa.

¹⁴ Kala awui nao Jerusalemli kapharābing chiya; Shammu-a, Shobab, Nathan, Solomon,

¹⁵Ibhar, Elishu-a, Nepheg, Japhia,

¹⁶Elishama, Eliada, kala Eliphelet athum hina.

¹⁷ Israelwuitungli Davidli thao neomida awunga sanghaira kaji Philistinenaobingna kashā eina, athumna Davidli phāvai; kha Davidna shāhaoda raipanli tāpamhaowa.

¹⁸Chitharan Philistinenaobingna Rephaim tampāk puitinghaowa.

¹⁹Kala Davidna Vareli, “Philistinenaobingli angararrala? Kala athumli iwui pāngli mahorsangmirakhala?” da ngasana, kala PROHOna hānga, “Kaulu, kaja Philistinenaobingli mashoila ina nawui pāngli horsangmira.”

²⁰Kala Davidna Baal-perazimli angararda chili yuihaowa; kala ana “Tara̱ kaphong thāda PROHOna kathangthām khaimihaira” da Davidna hānga. Chiwui vang eina apam chili Baal-perazim hoi.

²¹Kala Philistinenaobingna athumwui meoma̱bing makhuiphāla yāmhaida David kala awui mibingna pongunghaowa.

²² Kala Philistinenaobingna rāluishitta Rephaim tampāk puitinghaowa.

²³Kala Davidna PROHOli khangasan tharan, ana hānga, “Shingāda mavālu, kha khanukshong eina balsam thing pamli mai ngarei ngarokta vālu.

²⁴Kala nathumna balsam thing tungli mi kazatkhon kashā eina, nathumna ngatha̱phoklu; kaja Philistinenaobingli PROHOna sāthat khavai zatkaphokna.”

²⁵Kala PROHOna kakaso athishurda Davidna sai; kala Geba eina thuida Gezer vāshungda Philistinenaobingli sākazammihaowa.