Read Tangkhul Naga 2 SAMUEL 9 Bible Online

2 SAMUEL 9 - Tangkhul Naga bible

2 SAMUEL 9

¹ Kala Davidna hānga, “Jonathanwui mai eina ina lumashanmikapai Saulshi shimkhurwui mi taifala?”

²Atam chitharan Ziba hoda Saulwui rao sakasā akha leisai, kala athumna ali Davidwuili hovai kala awungana hānga, “Na Zibala?” Ana, “Amei, narao ina” da ngahānkai.

³ Kala awungana hānga, “Ina Varewui lukhamashan mikapai Saulshi shimkhurwui mi khipākha maleimala?” Zibana awungali ngahānkāda, “Jonathanwui nao aphei kateka akha lei.”

⁴Awungana ali hānga, “A kali leili?” Zibana awungali ngahānkai, “A Lodebarli Ammielwui naomayara Machirwui shimli lei.”

⁵Chieina Awunga Davidna mi chihoda Lodebar, Ammielwui naomayara Machirwui shimwui eina ahokhui ngasaka.

⁶Kala Saulwui naomayara Jonathanwui naomayara Mephiboshethna Davidli vāda kui mashunzangda akhoruma. Kala Davidna, “Mephibosheth!” da kaho eina, “Narao I hili leili” da ana ngahānkai.

⁷Kala Davidna hānga, “Mangacheelu; navā Jonathanwui mai eina ina nali lumashanmira; nawo Saulwui lam saikora nali hanmira, kala nana iwui tableli phazārumchingra.”

⁸Chieina ana khorumda hānga, “Thikahai fali ina phakhamei maleimana, amei! Khiwui vang ili chiyakha sakta yangsangmikhala?”

⁹Chiwui thili awungana Saulwui rao Zibali hokhuida hānga, “Saulwui, kala awui shimkhurwui khalalei saikora nawui akhavāwui naoli ina mikahaina.

¹⁰Na kala nanaomayarabing, kala nawui raobingna awui vang lui chi vāra, kala akhavāwui naomayara zākhavai chiwui heithei khuiungmira; kha nawui akhavāwui naomayara Mephiboshethva iwui tableli phazāchingra.” Chitharan Zibawui nao tharāda phangā kala rao maga̱ da leisai.

¹¹Chieina Zibana awungali ngahānkāda hānga, “Awunga ishāmeina kakaso athishurda narao ina sāra.” Chieina Mephiboshethna awungwui naomayara akha thāda Davidwui tableli ngasoda phazāruma.

¹²Chitharan Mephiboshethwui naomayara katenao Mica hoda akha leisai. Kala Zibawui shimli kapama mi saikora Mephiboshethwui rao saserhaowa.

¹³Chithāda Mephiboshethna Jerusalemli pama; kala ana awungali ngasoda phazā ngarumchinga. Ava aphei khanini teka.