Read Tangkhul Naga 1 WUNGNAOBING 13 Bible Online

1 WUNGNAOBING 13 - Tangkhul Naga bible

1 WUNGNAOBING 13

¹Kala yanglu, PROHOwui tui athishurda Varewui mi akha Judahwui eina Bethelli rai. Chitharan Jeroboamna nganamkaphā rikkhavai hanphutpamli nganingsai.

²Kala mipā china hanphut chili PROHOwui tui chi vaoshokta hānga, “O hanphut, hanphut, PROHOna hānga; ‘Yanglu, Davidwui shimkhurli Josiah kaho naomayara akha pharāra; ana nawuitungli kaphung kajujuiwui kameowui pāngmonbingli riktāra, kala nawuitungli mira̱kui riktāra.’”

³Kala chithang ngalāngda machut khavaila mida hānga, “PROHOna hāngkahai machutkhui khavai chi hina; ‘Yanglu, hanphut hi shaokhaihaora, kala chiwuitungli khalei hotla saikora chaiyānghaora.’”

⁴Bethelwui hanphutli makhamayā vaokashok Varewui mina kahāng chi awungana kashā chitharan, Jeroboamna hanphutpamwui eina pāng katingvāda hānga, “Mipa chi tukkhuilu.” Kala katingkhava apāng chi thihaida makhuiungluipaithuwa.

⁵PROHOwui tui Varewui mi china machutkhui khavai khami athishurda hanphutla minkhaihaowa, kala hotla yaoyānghaowa.

⁶Kala awungana Varewui mi chili hānga, “Nawui PROHO Varena lumashanmida ipāng raimi khavai seihā kasāmilu.” Varewui mi china PROHOli pomilaga awungawui pāng raihaida khangachā tākam eina unghaowa.

⁷Kala awungana Varewui mi chili hānga, “Ili ngasoungda ungphazāsa, ina samanla mira.”

⁸Varewui mi china awungali hānga, “Nawui shimlui tangkhai miga jilala maungmara. Apam hili ina zātla mazāmara, tara̱la mamangmara;

⁹kaja PROHOwui tuina ‘Nana zātla mazāpaimara, tara̱la mamangpaimara, kala nana vākhavaishong eina maungpaimara da hānghaira.’”

¹⁰Kala ana Bethelli vākhavaishong maningla apong khangateivāk eina unghaowa.

¹¹Chitharan Bethelli kasara marān akha okthuisai. Bethelli chithang kashoshok, kala Varewui mipa china awungali kahāng tui chi avāva̱li anaomayarana unghāngsera.

¹²Avāva̱na athumli hānga, “Shongfa kachishong eina vāhaokhala?” Judahwui eina kharā Varewui mina latung khavai apong chi anaomayarana chithei.

¹³Anaomayarali hānga, “Gadha chi iwui vang shaksāmilu.” Chieina athumna gadhā chi shaksāmida ana chili tonga.

¹⁴Ana Varewui mi chili shurvai, kala shirimthingphei akhali pamsāda angahāna, “Judahwui eina kharā Varewui mi chi nala?” Ana “Ina” da hānga.

¹⁵Chieina ana hānga, “Ili ngasoungda shimli ungphazākhuisa.”

¹⁶Ana hānga, “Nali mangasoungpaimara, shimlila maungzangpaimara, kala apam hili nali ngasoda zātla mazāmara, tara̱la mamangmara;

¹⁷kaja PROHOwui tuina ili, ‘Zātla mazāpaimara, tara̱la mamangpaimara, kala vākhavaishong eina malatungalu’ da hānghaira.”

¹⁸Ana hānga, “Ila na thāda marān akhana, kala ili kazingraona PROHOwui tui eina, ‘Nashi shimli ali houngda phazāngasaklu kala tara̱ mangkhui ngasaklu.’ da hānga.” Kha ana kapikta kahāngna.

¹⁹Chieina ani ngasoungda ashi shimli phāzai kala tara̱la manga.

²⁰Ani tableli phazāda leilakha, ahokakhuiya marān chili PROHOwui tui china rāhānga,

²¹kala Judahwui eina kharā marān chili vaoshokta hānga, “PROHOna kahāngna, ‘Khikhalajila PROHOwui tui nana makhanganāwui vang, kala nawui PROHO Varewui ningkhami mamayonla,

²²kha latungda, “Mazālu, mamanglu” kachipamli kazā kala khamangwui vang nawui phasā navā ngarāwui chikhurli machifamara.’”

²³Phāshak-phazākhui kahaiwui thili, ana ahokakhui marānwui vang gadhā shaksāmi.

²⁴Ana ungmamān kaji eina shongfali kazingkha̱ akha samphangda ali makeithathaowa. Kala awui phasā shongfa khamaseli hortahaida gadhāna chiwui ngalemli nganingpama; kazingkha̱la mingun ngalemli nganingpama.

²⁵Kala yanglu, shongfa chi khamakānbingna khamaseli mingun hortā kahai kala kazingkha̱na mingun ngalemli nganingkapam chi thei. Athumna kasara marān china pamkhavai keinung chili ungda chi unghānga.

²⁶Ahokakhuiya marān china tui chi kashā chitharan ana hānga, “PROHOwui tui makhanganā Varewui mi chilaka; chiwui vang PROHOna ali hāngkahai thishurda kazingkha̱li mida makeithatta serkazam kahaina.”

²⁷Kala anaomayarali hānga, “Gadha chi iwui vang shaksāmilu.” Chieina athumna gadhā chi shaksāmi.

²⁸Ana akhayang eina angun chi shongfali hailaga gadhā eina kazingkha̱ chi angun ngalemli nganingsai. Kazingkha̱ china kathingun mashaimana, lah gadhā chila mamakeithatmana.

²⁹Marān china Varewui mi chiwui angun chi gadhātungli khāngkāda chapngachā khavai kala ungchifa khavai keinungli khuiunghaowa.

³⁰Kala, awui chikhurli chifada, “Iyavo, ichina” da chapsasui eina awui vang chapngachai.

³¹Ali chifa kahaiwui thili anaomayarali hānga, “I thithang Varewui mi chifa khavai chikhur hili ilila chifalu, awui ara̱kui ngalemli iwui ara̱kuila hailu.

³²Kaja Bethelwui hanphutli kala Samaria keinungli khalei kajujuipamwui shimli PROHOwui tui ana vaoshok kahai saikora makahatlakla ungshungra” da hānga.

³³Hiwui thili Jeroboamna makaphā shongfawui eina mangareiungmana, kha kajujuipamwui vang khangatei mibing ngachaiwui eina pāngmon kapangsanglui, kala sakhangangaibing chili tharchigatmida kajujuipamwui vang pāngmon sāngasaka.

³⁴Hikathā otsak hina Jeroboamwui shimkhurli morei sāngasakta katathailaga okathuiwui eina shimānchao khavai sathuihaowa.