Read Tangkhul Naga 1 WUNGNAOBING 15 Bible Online

1 WUNGNAOBING 15 - Tangkhul Naga bible

1 WUNGNAOBING 15

¹ Chitharan Nebatwui nao Jeroboam awungana mungda tharāda kachishata kum Abijamna Judahli mungphoka.

²Ana Jerusalemli kum kathum munga. Ava̱va̱li Maacah hoi, Abishalomwui naongalāva̱na.

³Avāva̱na awui mangāli sākasā thāda ala moreiwui otmāngli zata; kala avāva̱ Davidwui ning thāda awui PROHO Vareli ningtongda maphaningmana.

⁴ Chithālala, Davidwui vang awui PROHO Varena Jerusalemli thaomei akha haimi, kaja anaomayarali awui mahutli chipamda Jerusalem sakā ngasaka.

⁵ Khikhalajila Davidna awui mirin peida PROHOwui eina mai mangareithuilakmana, Hitpa Uriahwui pongli maningla, awui kakaso katonga mayonchinga.

⁶Chitharan Rehoboam eina Jeroboamwui thotli rai sangarokchinga.

⁷Abijamwui kasāsā saikora Judah Awungabingwui Thotrinchān Lairikli makapiserhaimala?

⁸ Abijam thihaida Davidwui keinungli chifahaowa, kala anaomayara Asana awui pamli thuimunga.

⁹Jeroboamna mungda khamaga̱ kum Israelwui awunga Asana Judahli thuimunga,

¹⁰kala ana Jerusalemli kum hangmatida akha munga. Ava̱va̱wui ming Maacah hoi, Abishalomwui nao ngalāva̱na.

¹¹Avāva̱ Davidna kasā thāda Asana PROHOwui mangāli khamashung otmāng sai.

¹²Ngalei chili khayora mayarnao saikora kashamserhaowa kala avāva̱ ngarāna sākahai meoma̱ saikora khuishokserhaowa.

¹³ Ava̱va̱lila awungva̱ kasāwui eina khuishokhaowa, khikhalajila ana Asherahwui vang ningkakachai meoma̱ sākhui; kala Asana awui meoma̱la sakazamlaga Kidron kongli ariktahaowa.

¹⁴Kha, kajujuiwui kameopam sākahai chi haipapama. Chithālala mirin peida Asana PROHOli ningtongda phaninga.

¹⁵Avāva̱na khangashit mikahai, kala ana khangashit sākahai kachigat saikora sināla, lupāsāla, khorkhongla Khorumshimli khuikāsera.

¹⁶Israelwui awunga Baasha eina Asawui thotli rai ngararchinga.

¹⁷Israelwui awunga Baashana Judahli ngararlaga, Judahwui awunga Asawuili khipākha maung-mavāpai khavai Ramahli sākhamhaowa.

¹⁸Chieina PROHOwui shimli khalei, awungawui shimli khalei, lupāsā eina sinā saikora khuilaga Asana awui raobingwui pāngli sangmi; kala Awunga Asana raobingli Damascusli kapam Syriawui awunga, Hezionwui nao Tabrimmonwui naomayara Ben-hadadli vāmi ngasakta hānga,

¹⁹“Navā eina ishāvā khangashik thāda inila ngarumkha sākhavai: yanglu, ina lupāsā eina sinā hi khamina; Israelwui awunga Baashana iwui eina yāmpai khavai nani ngarumkha kasā tanghaolu.”

²⁰Ben-hadadna Asawui tui khuida raimi kathānabingli Israelwui keinung akai ngasaka; kala Ijon, Dan, Abel-beth-maacah, kala Naphtali ngalei zanglaga Chinneroth katonga yuikhuihaowa.

²¹Chi kashā eina Baashana Ramah masākāluila Tirzahli pamhaowa.

²²Chiwui thili Awunga Asana Judah katongali, akhala mashāklakla, hukhum khami athishurda Baashana Ramah sakākhavai thing kala ngalung kahai saikora chi khuilaga Benjaminwui Geba eina Mizpah sakāvaihaowa.

²³ Asawui kasāsā awui pangshap, kala ana sākakhui keinungwui khararchān saikora Judah Awungabingwui Thotrinchān Lairikli makapisermala? Asārlam apheili kazāhaowa.

²⁴ Asa thikahai eina avāva̱ ngarāli ngasoda Davidwui keinungli chifahaowa; kala anaomayara Jehoshaphatna awui pamli thuimunga.

²⁵Judahwui awunga Asana khamung kum kakhaneli Jeroboamwui naomayara Nadadna Israelli thuimunga; kala ana kum khani munga.

²⁶Ana PROHOwui mikyanli makaphā sai, kala avāva̱wui makaphā thāda sai; kala awui morei kasālungli Israelli morei sāngasaka.

²⁷Issacharwui shang eina, Ahijahwui nao Baashana mijang khomlaga Philistineli khalei Gibbethon apamli mithit khalen sāda Nadabli sāthathaowa; kaja Nadabla zangda Israel saikorana Gibbethonli kuinampamsai.

²⁸Chithāda Judahwui awunga Asana mungda kakathum kum Baashana Nadabli sathathailaga awui pamli thuimunga.

²⁹ Ana awunga sakhaleoda Jeroboamshi shimkhur saikora sāthatserhaowa; PROHOwui rao Shilohwui Ahijahna PROHOwui tui hāngmi kahai athishurda, Jeroboamwui shimkhurli akhanida mashākla sāthatserhaowa;

³⁰Jeroboamna morei sāda Israelli morei sākhangasakwui vang Israelwui PROHO Vareli malungvātngasakhaowa.

³¹Nadabwui kasāsā kala khangatateila Israel Awungabingwui Thotrinchān Lairikli makapiserhaimala?

³²Asa eina Israel awunga Baashawui thotli rai sangarokchingsai.

³³Judahwui awunga Asana mungda kakathuma kum Ahijahwui nao Baashana Tirzahli pamda Israel saikorali kum maga̱da mati munga.

³⁴Ana PROHOwui mikyanli makaphā sai, kala Jeroboamwui makaphā thāda sāda awui moreilungli Israelli morei sakhangasakna.