Read Tangkhul Naga 1 WUNGNAOBING 16 Bible Online

1 WUNGNAOBING 16 - Tangkhul Naga bible

1 WUNGNAOBING 16

¹PROHOwui tui Baashawuitungli makhamayā Hananiwui naomayara Jehuli rāhānga,

²“Iwui yur Israelli kathāna sākhavai, chifawui eina ina nali khangama sāngasakhaira, kha nana Jeroboamwui thi shurda iwui yur Israelli morei sāngasakhaira,

³yanglu, Baasha kala awui shimkhurli ina shimān ngasakchaohaora, kala nawui shimkhur Nebatwui nao Jeroboamwui shimkhur thāngasakhaora.

⁴Baashashiwui mi keinungli fana shaira, lamli katheli khamasaili yongkazata vānaona shaira.”

⁵Baashawui kasāsā, khangatateila, kala awui kaping Israel Awungabingwui Thotrinchān Lairikli makapiserhaimala?

⁶Baasha thikahai eina avāva̱li ngasoda Tirzahli chifahaowa, kala anaomayara Elahna awui pamli thuimunga.

⁷Chili lāngda Baasha kala ashi shimkhurli makhamayawui tui, PROHOwui mangāli makhayā otmāng sāda, kala awui otsakna malungvāt khangasakwui vang, Jeroboamwui shimkhurli shimān khangasakwui pongli Hananiwui nao Jehuli PROHOna hāngmilui.

⁸Judahwui awunga Asana mungda maga̱da katharuk kum, Baashawui nao Elahna Tirzahwui eina Israelli mungphoka, kala kum khani munga.

⁹Kha awui rao Zimri, siguigari ngayarpakwui raimi kathānapa china ali thikhavai sāhaowa. Ana Tirzahli shimwui kashina Arzawui zam mangda marip kahai eina,

¹⁰Zimrina zangda ngaphitsangda sāthathaowa; hi Judahwui awunga Asana mungda maga̱da kashine kumna, kala Zimrina Baashawui pamli thuimunghaowa.

¹¹Ana wungpamkhongli pamda mungkaphok tharan ana Baashashi shimkhur saikora sāthathaowa; athei-asā kala ngasotnaobingla mayarnao kaho akhala mataimimana.

¹²PROHOwui tui Jehu marānna hāngkahai athishurda Zimrina Baashawui shimkhur saikora shimān ngasaka,

¹³kaja Baashawui morei saikora kala anaomayara Elahwui morei saikora, kala china Israelli morei sākhangasakwui vang, athumwui meoma̱ china Israelwui PROHO Vare chili malungvāt ngasakhaowa.

¹⁴Elahwui kasākhavā, kasāsā saikora, kala katateila Israel Awungabingwui Thotrinchān Lairikli makapiserhaimala?

¹⁵Judahwui awunga Asawui maga̱da kashine kum Zimrina Tirzahli shinithang munga. Chitharan raimibingna Philistinewui Gibbethonli rairum sāsai;

¹⁶kala “Zimrina thikhavai sālaga awungali sāthathaowa” kaji rairum kasā raimibingna shāhaowa; chiwui vang rairumli raithanme Omrili Israelwui awunga chithang sanghaowa.

¹⁷Chieina Omrina Israel saikorali ngasoda Gibbethonwui eina vāda athumna Tirzahli akuinamhaowa.

¹⁸Keinung khuithuihaira kaji kathei eina Zimrina awungawui konunglungli sākahai raipam chili zangda mei sa̱tāda, ala chili thihaowa,

¹⁹kaja awui morei kasā, Jeroboamwui athishurda PROHOwui mikyanli makaphā ot kasā, kala awui morei china Israelli morei sākhangasak chiwui vang einana.

²⁰Zimriwui kasākhavā, kasāsā, kala ngathumda khangarān saikora Israel Awungabingwui Thotrinchān Lairikli makapiserhaimala?

²¹Chiwui thili Israel kaikhani sāhaowa; ngakaipakna Ginathwui nao Tibnili awunga sangra jihaowa, ngakaipak akhana Omriwui thi shurthuihaowa.

²²Kha Ginathwui nao Tibniwui athi kashurbingli Omriwui thi kashurbingna yuihaowa. Chiwui vang Tibni thihaida Omrina awunga sāhaowa.

²³Judahwui awunga Asana mungda thumrāda kharekum, Omrina Israelli mungphoka, kala kum tharāda khani munga, kum tharuk Tirzahli mungsai.

²⁴Samaria kaphung hi ana Shemerwui eina lupāsā thingtharuk mida lokhui; kala kaphung chi raipan sākhuilaga kaphung akhavā Shemerwui ming khuida Samaria hoi.

²⁵PROHOwui mangāli Omrina makaphā otmāng sai, kala awui mangāli leikasābingli zakshimeikharda sai.

²⁶Kaja ana Nebatwui naomayara Jeroboamwui shongfali zata, kala Israelli morei sākhangasaka morei, athumwui meoma̱bing china Israelwui PROHO Vareli malungvāt ngasaka.

²⁷Omriwui kasā khavā, kasāsā, awui kaping kachithei Israel Awungabingwui Thotrinchān Lairikli makapiserhaimala?

²⁸Omri thikahai eina Samariali chifahaowa; kala anaomayara Ahabna awui pamli thuimunga.

²⁹Judahwui awunga Asana mungda thumrāda kachishata kum Omriwui nao Ahabna Israelli mungphoka, kala Omriwui nao Ahabna Samariali kum maga̱da khani munga.

³⁰Omriwui nao Ahabna PROHOwui mikyanli makaphā otmāng sai, awui mangāli leikasābingli zakshimeikharda sai.

³¹Nebatwui nao Jeroboamwui morei kasā chi khikha maningmana kaji thāda, ana Sidonwui awunga Ethboalwui naongalāva̱ Jezebelli khui, kala Baalli shurda khoruma.

³²Samariali khalei Baal kameoshimli ana Baal wui vang hanphut akha sākhui.

³³Ahabna Asherah akha sākhui. Israelwui PROHO Vareli malungvātmei khavai awui mangāli leikasā Israelwui awungabingna sākasā chili mataimeikharda Ahabna sai.

³⁴ Awui atamli Bethelwui Hielna Jericho sakai; Nunwui naomayara Joshuana PROHOwui tui hāngkahai chi tākam eina, shimphunga sākakāwui vang awui naochizai Abiramli pha̱ya; kala chiwui ngavei sākakāli paisho Segubli pha̱ya.