Read Tangkhul Naga 1 WUNGNAOBING 17 Bible Online

1 WUNGNAOBING 17 - Tangkhul Naga bible

1 WUNGNAOBING 17

¹ Chitharan Gileadli khalei Tishbewui Elijahna Ahabli hānga, “Makashimāna Israelwui PROHO Varewui mangāli ina nganingda kahāngna kaja, iwui kakaso maningla atam kasāngkha kazingla maromara, ikra̱la matāmara.”

²Kala PROHOwui tui china ali rāhānga,

³“Hiwui eina thuida zingshoshong vaulu, kala Jordanwui zingshoshong khalei Cherethkongli ayāmngathumhaolu.

⁴Nana chiwui tara̱ mangra, kala zākhavai ina ngahong-hangkhāli kasohaira.”

⁵PROHOna kahāng athishurda ana Jordanwui zingshoshong Cherethkongli apamhaowa.

⁶Ngathor ngazin mateila ngahong-hangkhāna khamui eina sā khuirāmichinga; kala kongrānaowui tara̱ manga.

⁷Khaleilaga, kazing marolakthuda kongrā chi thenghaowa.

⁸ Chiwui thili PROHOwui tui china ali rāhānga.

⁹“Ngakarthuida Sidonli khalei Zerephathli apamlu. Yanglu, nali mizā khavai ina ra̱meinao akhali kasohaira.”

¹⁰Chieina ana ngakarthuida Zarephathli vai; kala keinungwui ngaveili vākashung eina ra̱meinao akha thing phākasā vāthei. Kala ana hokhuida hānga, “Ili mangkhavai tara̱ khokthikha kha-ungkhuimilu.”

¹¹Ana ungkhui khavai zatuki kaji eina, ana vaoda hānga, “Zātla ngahomkha kakhuirāmilu.”

¹²Ra̱meiva̱ china hānga, “Khamui masāhailakmana kaji PROHO Varena thei, sāmhamli pāng mayākhamāng zangda lei, kala thaokhongli thao kateokha zangda lei. Chi hangzāda inaomayara ini thihaora da thing khani kathum rāphākakhuina.”

¹³Elijahna hānga, “Mangangalu, nali kahāng thāda sālu, kha ili khamui hāngkha mifalu, chiwui thili nanaomayara naniwui vang sākhuinaolu.

¹⁴Kaja Israelwui PROHO Varena hāngkahaina, PROHOna okathuili kazing maro ngasakranglakha eina tangda, ‘Sāmham kakān mavaimara, kala thaokhong katheng mavaimara.’”

¹⁵Elijahna kahāng tākam eina preiva̱ china ungsai, kala ala pareiva̱la, anaomayarala atam kasāngkha kazā samphanga.

¹⁶PROHOna Elijahli kahāng thāda sāmham kakān mavaithuwa, thaokhongla katheng mavaithuwa.

¹⁷Chiwui thili preiva̱ chiwui naomayara kazāhaowa; kala kakazā chi marshunhaida khaksui shimānhaowa.

¹⁸ Chieina ana Elijahli hānga, “O Varewui mi, iwuitungli khi makhamayā leihaokhala? Iwui morei phaningung khavai, kala iwui nao thikhavai kharāla!”

¹⁹Ana hānga, “Nanao ili milu.” Kala ana nao chi khuilaga, awui pikhavai mathang atoli khuikāda awui petli chipeta.

²⁰Kala PROHOli vaoda hānga, “O PROHO, iwui Vare! Ina shimzun kasā ra̱meiva̱ hilila unshimui khuirāmida awui nao thingasak kahaila?”

²¹ Chiwui thili ana naowuitungli kathumshida kāngapumrorlaga PROHOli vaoluishita, “O PROHO iwui Vare! Nao hi kharingung ngasaklu” da ngakaowa.

²²Elijahwui tui PROHOna khuisangmida, nao chiwui manglā ali ungluida ringunghaowa.

²³Elijahna nao chi mathāng atowui eina khuizangda ava̱va̱li mida hānga, “Yanglu, nanao ringhaira.”

²⁴Preiva̱ china Elijahli hānga, “Na Varewui mina kaji ara ina theikhuihaira, kala nana Prohowui tui kahāng saikora khamashungna.”