Read Tangkhul Naga 1 WUNGNAOBING 20 Bible Online

1 WUNGNAOBING 20 - Tangkhul Naga bible

1 WUNGNAOBING 20

¹Syriawui awunga Ben-hadadna awui raimi saikora kazipkhuiserda wungnao thumrāda khani, kala ali ngasoda sigui kala siguigari zangda Samariali akuinamlaga ngarara.

²Kala ana keinungli paomebing chihoda Israelwui awunga Ahabli ahānga, “Ben-hadadna kahāngna:

³‘Nawui sinā lupā iwuina, napreiva̱, nanaongarā khamathāthā khalei chila iwuisera.’”

⁴Israelwui awungana ngahānkai, “Nana kahāng thāda, amei, ila nawuina, iwui khalei saikora nawuisera.”

⁵Paomebing china rāhānglui, “Ben-hadadna hānga: ‘Ina chihoda kahāngna, “Nawui sinā lupā, preiva̱, naongarā milu da kachihona”;

⁶chithālala akhama hitharan iwui raobing chihorāra, athumna nawui shimla, raobingwui shimla rākapeoda athumna ningkachachāng chi rākhuira.’”

⁷Chieina Israelwui awungana ngalei chiwui ararnaobingli hokhuiserlaga hānga, “Hi machutkhuilu, kaja ana kharar khavai phāda lei. Kaja ana preiva̱la, naongarāla, lupāsāla, sinala, ana poda ina ngga majimana.”

⁸Ararnaobingla kala mibing saikoranala hānga, “Awui kahāng chili matheimilu kala khamayāla mamayālu.”

⁹Chieina Ben-hadadwui paomebingli hānga, “Awunga ishameili hānglu, ‘Naraoli hāngkhare chi ina mayara; kha hiya mamayararmara.’” Paomebing china ngalatthuida tui chi unghānga.

¹⁰Ben-hadadna khangatei pao chihoda hānga, “Samariawui chifa chi iwui thikashurbing saikorawui vang pangparkhaship makāmara, ina mangararakha varebingna theiranu.”

¹¹Israelwui awungana ngahānkai, “Ali hānglu, ‘Rai sāri shaksā kahai china raishok kahai a thāda malangsoranu.’”

¹²Pao hi ungkahāng atamli Ben-hadadna wungnaobingli ngasoda zam mangsai kala ana awui mibingli “Khangarān sālu” da hānga. Chieina athumna keinung kaikhavai khangarān sai.

¹³Kala yanglu, Israelwui awunga Ahabwui ngalemli marān akhana rāhānga, “PROHOna hānga, ‘Nana mi sorngasaida khalei saikora hi theihairala? Yanglu, aja ina athumli nawui pāngli horsangmira, chieina I PROHOna kaji nana theikhuira.’”

¹⁴Ahabna, “Khipāna ngararmirakhala?” da khangahān eina, “PROHOna kahāngna, ngalei hiwui lammungabingwui raimibingna ngararra” da marānpana hānga. Chieina ana hānga, “Khipāna ngararphokrakhala?” Ana hānga, “Nana haophokra.”

¹⁵Chieina ana ngalei chiwui lammungabingwui raimibing kazipkhuiserda shākhani thumrāda khani, kala Israelnao thingshini kāshunga.

¹⁶Athumna ngashunung vai, atam chitharan Ben-hadad kala ali khangachon wungnao thumrāda khani zam mangda maliprei leisai.

¹⁷Lammungabingwui raobingna rimeida zata. Kala Ben-hadadna rairui chihovai, kala athumna unghānga, “Samariawui eina mibing shokrārāda lei.”

¹⁸Ana hānga, “Athumna mashit khavai kharāna jilala, ngarar khavai kharāna jilala kharing eina tukkhuilu.”

¹⁹Chithāda sāda lammungabingwui mibingna thānda raimibingna keinungwui eina shokuwa.

²⁰Kachichā ngazun asāthata; Syrianaobing yāmhaida Israelnaobingna kharomvai, kha Syriawui awunga Ben-hadadva sigui tongphungda sigui katong raimibingli ngasoda yāmhaowa.

²¹Israelwui awungana thānda siguila siguigarila kachungkha tukkhuida, Syrianao kachungkha shaothata.

²²Chiwui thili marān china Israel awungawui ngalemli vāda hānglui, “Mathālak eina khangarān sākhuilu kala chukmaja̱kazaklu, kaja Syriawui awungana luira̱dung atamli rāngararluishitra.”

²³Syriawui awungali awui raimibingna hānga, “Athumwui varebing hiya, kaphungwui vare sāthuda ithumli pangmei kahaina; tampākli ngararsa, chithākha mashoila ithum pangmeira.

²⁴Kala hithāda sālu: wungnaobing khuishokhaolu, kala athumwui pamli raimi thānmebing phāsangsa;

²⁵kala shimān kahai raimi, sigui, siguigari chiyākha kazipkhuiluisa; chiwui thili tampākli ngararakha kachangkhat eina athumli ishi pangmeira.” Ana athumwui tui khuida chi tākam eina sai.

²⁶Luira̱dung atamli Ben-hadadna Syriawui mibing kazipkhuida Israelli ngarar khavai Aphekli vai.

²⁷Israelwui mibingla kaziplaga otpam ngayarserhaida ngarar khavai vai; Israel mibingna athumwui mangāli me ashangva̱ khani thāda rairum sai; kha Syrianaobingna ram chi pemhaowa.

²⁸Varewui mi akhana Israelwui awungali rāhānga, “PROHOna hithāda hānga; ‘Khikhalajila Syrianaobingna hānga, “PROHO hiya kaphungwui varena, tampākwui vare maningmana.” Chiwui vang sorkhangasai mi hi ina nawui pāngli horsangmida I PROHOna kaji nana theikhuira.’”

²⁹Athumna kāroda shinithang rairum sāpama. Kashinethang rai sāphokuwa; kala Israelnaobingna Syrianao, chithangmāng, pheiwui raimi lakh akha sāthata.

³⁰Kataibing china Aphek keinungli yāmvai; kala taikahaibing chi thingmaga̱ da shini phākhona minrorhaowa. Ben-hadadla yāmhaowa, kala keinungwui shimlung akhali azanghaowa.

³¹Kala awui raimibingna hānga, “Israel shimkhurwui awungabing hiya lumashantheilaka da shai; ithumna bora eina shānneira̱ sāda kuili khara̱ neilaga Israel awungawuili vāsa, chithakha nawui mirin huimilapai.”

³²Chieina athumna bora shanneira̱ sai, khara̱ kuili neilaga Israelwui awungali ahānga, “Narao Ben-hadadna hangli, ‘Masāthatmialu da seihā sāli.’” Ana hānga, “A mathirangla? A ichināna.”

³³Chitharan mibingna machutkhui khavai yangsāda, athumna tatot eina phaningkhuida hānga, “Mha, nachinā Ben-hadad mathiranga.” Chieina ana, “Ahokhuilu” da kasoi. Chiwui thili ana kharā eina ali siguigarili kapam ngasaka.

³⁴Ben-hadadna ali hānga, “Navāwui eina ishāvāna khuikahai keinungbing ina hanmira; kala ishāvāna Samariali leihngapha̱ sakakā thāda nanala Damascusli sakāpaira.” Ahabna hānga, “Chithasa jiakha nali apong hiwui vang chihomira.” Chieina tuingashit akha sālaga chihohaowa.

³⁵PROHOna kakaso athishurda marānwui naomayarabingwui eina akhana akhali PROHOwui kakaso athishurda “Ili shaolu.” da poi. Kha mipa china shaokhavai mamayāthuwa.

³⁶ Chieina ana hānga, “Nana PROHOwui tui makakhuiwui vang, iwui eina nana pakhaikhaleoda nali kazingkha̱na makeithathaora.” Ani pakhaikhaleoda mipa chili kazingkha̱ akhana makeithathaowa.

³⁷Chiwui thili mi khangatei akha samphangda, “Ili shaolu.” da poi. Mipa china shaoda khamā za̱haowa.

³⁸Chieina marān china awungawui rākhavaili angaraipamhaowa, kala azak mathei khavai chonshi eina amik neiphinhai.

³⁹Awunga rākakān eina ana panglāk eina vaoda hānga, “Narao I raipamli vai, kala yanglu, raimi akhana yangkashe akha tukungda ili hānga, ‘Mipa hili mayonsālu, yāmhaiakha awui mahut nali sāthatra, maningakha lupāsā thingkathum kashong lāngra.’

⁴⁰Kha narao ina ot khangateiwui vang ngalang zarlakha mipa chi yāmhaowa.” Israelwui awungana hānga, “Nawui bichar chithāpapamra; nana tuikup khuikahaina.”

⁴¹Chieina ana katotsisi mikli neikahai kachon chi khalatāhaowa, kala Israelwui awungana marān akhanada theihaowa.

⁴²Marān china hānga, “PROHOna kahāngna, ‘Sāthat khavai ina mikahai mi nawui pāng eina nana chiho kahai chiwui vang, awui vang na thira, kala awui mibingwui vang nawui mi thira.’”

⁴³Israelwui awunga ning khājir wukkhananglak eina awui shim Samariali unghaowa.