Read Tangkhul Naga 1 WUNGNAOBING 22 Bible Online

1 WUNGNAOBING 22 - Tangkhul Naga bible

1 WUNGNAOBING 22

¹ Kum kathum Syria eina Israel rai mangararmana.

²Kha kakathuma kum Judahwui awunga Jehoshaphatna Israelwui awungali tāsamphanga.

³Israelwui awungana awui raobingli, “Ramoth-gilead hi ishiwuina, kha yansāngsa̱ eina pamda Syriawui awungawui pāngli khaleina kaji nathum matheimala?” da hānga.

⁴Kala Jehoshaphatli, “Ramoth-gileadli rai tāsa khavai ili mangasovarakhala?” da hānga. Jehoshaphatna Israelwui awungali hānga, “Ini akhana, iwui mi chi nawui mina, iwui siguila nawuina.”

⁵Kala Jehoshaphatna Israelwui awungali hānga, “PROHOli rida ngasanyangfasa.”

⁶Chieina Israelwui awungana marān shāmati sha̱kha hokhuida athumli hānga, “Ili Ramoth-gileadli rai sālu jikā, khānghaolu jikhala?” Athumna, “Sālu, PROHOna awungawui pāngli horsangmira,” da hānga.

⁷Kha Jehoshaphatna hānga, “Ngasankapai PROHOwui marān khangatei hili maleiluimala?”

⁸Israelwui awungana Jehoshaphatli hānga, “PROHOwui tui ngasan khavai mi akhava leifaya, Imlahwui naomayara Micaiah china; kha I ali ningkachaiya, kaja ana iwui vang zakkashi maningla khamathā akhala mahāngmilakranga.” Jehoshaphatna hānga, “Awungana chithāda mahāngmialu!”

⁹Chieina Israelwui awungana kathāna akha hokhuida hānga, “Imlahwui naomayara Micaiahli thākta ahokhuilu.”

¹⁰Chitharan Israel awunga eina Judah awunga Jehoshaphatna wungsāri ngavailaga Samariawui ngaveili zangkhavai lanpum khalei wungpamkhongli pama, kala marānbingna shokki kaji tui marānsai.

¹¹Kala Chenaanahwui naomayara Zedekiahna mari eina angaji sākhuilaga hānga, “PROHOna hithāda hānga, ‘Hi eina Syrianaobingli masāshimānmiranglakha eina tangda muivālu.’”

¹²Marān saikorana marānda hānga, “Ramoth-gileadli angararda khayui ngasalu. PROHOna awungawui pāngli horsangmira.”

¹³Micaiahli akaho paome china hithāda hānga, “Yanglu, marānbing tui akha sāda awungawui vang hangmiserhaira, nawui tuila athumwui thāda awungali khamayā tui hānglu.”

¹⁴Kha Micaiahna, “PROHOwui ming singda kahāngna, ana hānglu kaji tui chi ina hāngra.” da ngahānkai.

¹⁵Ana awungawuili khavā tharan awungana hānga, “Micaiah, Ramoth-gileadli rai angarar khavai varakā, ngaraifalu jikhala?” Ana ngahānkai, “Vada khayuiya ngasalu, PROHOna awungawui pāngli horsangmira.”

¹⁶Kha awungana hānga, “PROHOwui mingli khamashung tui hāngmilu da ina nali kayākhashida hāngrakhala?”

¹⁷ Ana hānga, “Yaokahoma makhalei yaobing thāda Israelnao saikora kaphungli chaiyāng kahai ina thei; kala PROHOna hānga, ‘Hibingwui akhavā maleimana; athum kachiva̱ chingri eina ichichāshili unghaoranu!’”

¹⁸Israelwui awungana Jehoshaphatli hānga, “Iwui vang makaphā maningla phākhavai akhala ana maphongmimara da ina nali mahāngmala?”

¹⁹ Micaiahna hānga, “Chiwui vang PROHOwui tui nganālu: PROHOna wungpamkhongli kapam ina thei, kala kazingramwui mi ashangva̱, saikorana uishong yāshong kuimareida khanganing chi thei;

²⁰kala PROHOna hānga, ‘Ramoth-gileadli vāda pitā khavai Ahabli khipāna asuinikhala?’

²¹Chiwui thili manglā akhana PROHOwui mangāli anganingda hānga, ‘Ina asuira.’

²²PROHOna ali hānga, ‘Kathāda asuira?’ Ana ngahānkai, ‘Ina vāda marān saikorawui khamorli kakapik matui khavai manglā asangmira.’ Ana hānga, ‘Nana asuira kala ot shokphalungra, vāda asaulu.’”

²³“Chiwui vang eina yanglu, nawui marān saikorawui khamorli PROHOna kakapika manglā sangmihaira; nawui vang kalāshi khavai PROHOna hānghaira.”

²⁴Chieina Chenaanahwui naomayara Zedekiahna rānganailaga Micaiahwui maisorli akapheya, kala, “PROHOwui Manglā kathāda iwui eina shoklaga nali ramatuipairakhala?” da hānga.

²⁵Micaiahna hānga, “Yanglu, nana shimlungli zangngathum thanghon chitharan theinaora.”

²⁶Israelwui awungana hānga, “Micaiahli tukkhuilu, kala keinungwui lammunga Amon eina awungawui naomayara Joashwuili khuivāda hānglu,

²⁷awungana hithāda hānga, I maungranglakha eina tangda mipa hili phātopli sanghailu, kala zātla, tara̱la kateteo māng mimalu.”

²⁸“Na chingri eina latungluisi kaje” Micaiahna hānga, “PROHOna ili hāngmi khangasak maningmana!” Kala ana hānga, “Miyur saikora iwui tui hi nganālu.”

²⁹Israelwui awunga eina Judahwui awunga Jehoshaphatna Ramoth-gileadli vai.

³⁰Israelwui awungana Jehoshaphatli hānga, “Ili mathei khavai sāri ngacheikhuilaga ina raipamli vāra, nava wungsāri shaksāpapamlu.” Kala Israel awunga sāri onkhuilaga raipamli vāhaowa,

³¹Syria awungana awui siguigari kathāna thumrāda khani chili, “Israelwui awungali maningla kharei kateo khipālikha mangararlakalu” da kasohaisai.

³²Siguigari kathānabing china Jehoshaphatli kathei eina athumna, “Israelwui awunga chi hilaka” da hānga. Chieina athumna ali ngarar khavai ngareivai; kala Jehoshaphatna vāoshoka.

³³Kathānabing china Israelwui awunga maningmana da kathei chitharan ali kakharomwui eina ngalanhaowa.

³⁴Kha mi akhana malāthing kapphāphā kaji eina Israel awungawui chāngvei eina thikom ngachaili zanghaowa; chieina awui siguigari kathaowa chili, “Ili za̱haira, ngareikhuilaga raipamwui eina ili phungunghaolu.” da kasoi.

³⁵Chithangwui rai marhaoda awungana awui siguigari tungli zungpamda Syria raimibingli yangngasungda pama, kha zingyinlam thihaowa; kala awui ashee akhamā eina shokta siguigari pemhaowa.

³⁶Zimik tunnanaili raimibingli hithāda vaorai, “Kachicha keinungli kala kachichā ramli ungserulu!”

³⁷Chieina awunga thihaoda Samariali khuiunga; kala chili ungchifahaowa.

³⁸Kala athumna siguigari chi Samariawui ra̱khongli ungpheokhui; PROHOwui tui hangmihaikasāwui thishurda ashee chi fana rāmaleka, kala khayorva̱ sha̱naobingnala ra̱vaisanga.

³⁹Ahabwui kasākhavā, kasāsā, mafahā eina shim sākakhui, kala ana sākakā keinung saikorawui apong Israel Awungabingwui Thotrinchān Lairikli makapiserhaimala?

⁴⁰Ahab thikahai eina anaomayara Ahaziahna awui pamli thuimunga.

⁴¹Israelwui awunga Ahabna mungda khamate kum, Asawui nao Jehoshaphatna Judahli mungphoka.

⁴²Jehoshaphatna mungkaphok tharan awui kum thumrāda phangā kāshunghairasai; ana Jerusalemli kum maga̱da phangā munga. Ava̱va̱li Azubah hoi, Shilhiwui naongalāva̱na.

⁴³Ana avāva̱ Asawui otsak thāda sai; PROHOwui mikyanli khamashung otmāng sai. Kha kajujuipam chi makhuithuihaimana, chieina mibingna chili pha̱phayāda nganamkaphā thao riktachinga.

⁴⁴Jehoshaphatna Israel awungali mashitkhui.

⁴⁵Jehoshaphatwui kasākhavā, ana kachithei awui pangshap, kala rai kathāda ngarar kajiwui pongli Judah Awungabingwui Thotrinchān Lairikli makapiserhaimala?

⁴⁶Avāva̱ Asawui thotli taikasa khayora mayarnaobing ana yaithupthathaowa.

⁴⁷Edomli awunga maleimada mahut kashina akhana awunga phungmisai.

⁴⁸ Ophirli sinā akhui khavai Jehoshaphatna Tarshishwui jahas sākhui, kha mavāshungranglakha Ezion-Geber kaho apam chili kaihaowa.

⁴⁹Chiwui thili Ahabwui nao Ahaziahna Jehoshaphatli hānga, “Iwui raobingna nawui raobingli jahasli ngasovā ngasaksa.” Kha Jehoshaphana mamayāngaithuwa.

⁵⁰ Jehoshaphat thikahai eina avāva̱ ngarāli ngasoda avāva̱ Davidwui keinungli chifahaowa, kala anaomayara Jehoramna awui pamli thuimunga.

⁵¹Judahwui awunga Jehoshaphatna mungda tharāda kashine kum Ahabwui nao Ahaziahna Samariali khalei Israelli thuimunga; kala kum khani munga.

⁵²PROHOwui mikyanli ana makaphā otmāng sai; avāva̱wui thāda, kala Nebatwui naomayara Jeroboamna Israelli morei sākhangasak thāda anala chi tākam eina sai.

⁵³Avāva̱na kasā tākam eina Baalli khorumda Israelwui PROHO Vareli malungvāt ngasaka.