Read Tangkhul Naga 1 WUNGNAOBING 3 Bible Online

1 WUNGNAOBING 3 - Tangkhul Naga bible

1 WUNGNAOBING 3

¹Solomonna Egyptwui awunga Pharaohshili ngalā ngakhotta Pharaohwui naongalāva̱li khui. Kala awui shimla, PROHOwui shimla, kala Jerusalemwui kuikhamarei phākhola masākhuiranglakha apreiva̱li Davidwui keinungli thānsanghaisai.

²Chitharan PROHOwui shim masārangsāda mibingna apam kajujuili pha̱kaphayā sāsai.

³Solomonna PROHOli leishi, kala avāva̱ Davidwui shiyan mayonchinga; apam kajujuili nganamkaphā rikkatā kala pha̱kaphayā ot chimang sāmaya.

⁴ Kajuiya apam sahaoda awungana Gibeonli pha̱kaphayā vāsai, hanphut chili Solomonna rikkatā kachigat thingkha achigagat ji.

⁵Gibeonli leilakha ngayāshong, mangshongli PROHOna Solomonli rāchithei; kala Varena hithāda hānga, “Nali khi milu jikhala polu.”

⁶Solomonna hānga, “Nana narao ishāvā Davidli hakkhamahā kala makhangachei leikashi chitheimihaira, kaja ana nali shitkasang mangacheilakla, khamashung khangarong eina kala ning ngatarda zata; kala nana hakkhamahā kala makhangachei leikashi haimiya, kala nana awui wungpamkhongli aja pamkhavai anaomayara akha mihaira.

⁷Ara, O PROHO iwui Vare! narao I naoshinaona jilala ishāvāwui pamli nana narao ili awunga sāngasakhaira; ina kachishong vārakhala kala kachishong ungrakhala da matheimana.

⁸Kala nana kapangkhui kahaiya miyur, shānla makakhui, mashankharar nawui mibingwui alungli haimihaira.

⁹Chiwui vang eina nawui mibingli nganaothei khavai narao ili thangkhamei ning sangmilu, chieina ina kashi-kaphā theikhuipaira; kaja aja nawui miyur hiyakhali khipāna nganaorarrakhala?”

¹⁰Solomonna hi kapo theilaga PROHOna ningyāng unglakhaowa.

¹¹Kala Varena ali hānga, “Khikhalajila nana ili kashāngla, okapeila, kala yangkashebingli athut khuikhavaila mapola, kha kashi-kaphā theishap khavai kapo hiwui vang,

¹²yanglu, nawui kapo chiwui thishurda ina sāmira. Yanglu, kashi-kaphā theishap khavai theithangkhamei ning ina nali mihaira; nawui thangkhamei thāda khipākha mashoklakranga, kashokla khipākha nawui thili na thāda mashokluimara.

¹³Nana makapo, lan kala khayākakāla ina mihaira, chithāda nali ngaheo khavai awunga khangatei na ringlakha maleiluimara.

¹⁴Kala navā Davidwui thāda iwui kakaso nganāda, iwui shiyan-chikan mayonchingakha nawui mirinla sāngsangmira.”

¹⁵Solomonna thuikhamathuk eina, yanglu, chi mangshong ngasāsai. Chieina ana Jerusalemli ungda PROHOwui tuingashit ningkhami okowui ngalemli nganingda rikkatā kachigat, ningyatchigat; kala awui rao saikorawui vang zātkhān akha sāmi.

¹⁶Chiwui thili khayorva̱ sha̱nao khani awungawuili rānganinga.

¹⁷Sha̱nao akhapāva̱na hānga, “O ishāmei, sha̱nao akhapāva̱ ini shim akhali pamruma; kala shim chili pamlakha ina nao akha pharākhui.

¹⁸I pharāhailaga kathumthangwui thili sha̱naopāva̱ hila nao akha pharai; kala mi khangatei mazanglakla inimang shim chili pama.

¹⁹Kala ngayāshong kapi eina sha̱naopava̱ hina anaomayarali shirenthathaowa.

²⁰Ngayā sailung ana ngakarthuida narao I pida leilakha ana iwui naomayara khuilaga awuili chipethaowa, kala awui nao kathi chi iwuili chipetmihaisai.

²¹Ngathor inaoli na̱ thuishimanki kaji eina, yanglu, nao chi thihairasai; kha ningkachāng eina ngathorshong thuiyang kaja ina pharākakhui nao maningsathuwa.”

²²Kha akhapāva̱na hānga, “Maningmana, kharinga nao hi iwuina, kathe chi nanaona.” Khare sha̱naopāva̱na, “Maningmana, kathe nao chi nawuina, kharinga nao chi iwuina.” da ani awungawui mangāli hāngngaroka.

²³Chieina awungana hānga, “Akhana hānga, ‘Kharinga chi inaona, kathe chi nanaona.’ Kharepāva̱na, ‘Maningmana, kharinga chi inaona, kathe chi nanaona.’ da hānga.”

²⁴Chieina awungana, “Ili raighai akha khuirāmilu” da kasoi. Chieina athumna awungali raighai akha khuivāmi.

²⁵Awungana hānga, “Kharinga nao chi kaikhani sālaga kaikha sha̱nao akhali, kala kaikha akhapāva̱li mihaolu.”

²⁶Chieina kharinga naomayarawui ava̱ china awui naoli lumashannahaoda awungali hānga, “Iyavo, ishāmei, nao chi makasāthatmihaialu. Ali miga jilala mihaolu.” Kha akhapāva̱na hānga, “Nawuila, iwuila masāpaimara; ngakaihaolu.”

²⁷Chieina awungana hānga, “Kharinga nao chi masāthatla sha̱nao kharepāva̱li mihaolu, chi ava̱ kachangva̱na.”

²⁸Awungana bichar sākhami chi Israelnao saikorana shālaga matakhak eina nganingsera; kala mashun bichar sāmi khavai Varewui thangkhamei awungali sangmihaira da theikhui.