Read Tangkhul Naga 2 WUNGNAOBING 11 Bible Online

2 WUNGNAOBING 11 - Tangkhul Naga bible

2 WUNGNAOBING 11

¹ Ahaziahshāva̱ Athaliahna anaomayara thihaira kaji kashā eina, ana wungnao shimkhur katonga shaothathaowa.

²Kha awunga Joramwui naongalāva̱, Ahaziahwui azara Jehoshebana, Ahaziahwui naomayara Joashli, shaothathaoki kaji awungawui naomayarabingwui eina ngathumda khuilaga awui naokakhuiva̱ ani khanili petkā akhawui alungli thumhaowa. Hithāda Athaliahwui eina thumhaida ali masāthatthuwa;

³kala Athaliahna ngalei chili munglakha nao china PROHOwui shimli kum tharuk ngathumpamsai.

⁴Kha kashine kum pāngmon Jehoiadana Cariwui raithānabing kala khamayon raimibingli hokhuida PROHOwui shimli khuizanga kala ana athumli khangashit akha sai kala PROHOwui shimlungli athumli tuingashit khuingasakhailaga awungawui nao chi khuishok chithei.

⁵Kala athumli kasoda hānga, “Nathumna sāki kaji ot chi hina: khum kathumwui khumkha sabbaththang otram khangatha̱li zangda awungawui shim mayonki kajibing

⁶(sharuk kathumwui akhana Surwui ngaveili, akhapāna ngavei khamayonabingwui khanukli khalei ngaveili) da konung chi mayonra;

⁷kala sabbathwui vang otram ngatha̱ khavai, awungali shantri sākhavai kharābing chiwui kānglup khanina,

⁸kachichāwui khutlai singlaga awungali kuinamra kala nathumna chili kharā kharei-kateo mayangla sāthat phalungra. Awungana unglala ungriplu, vālala variplu.”

⁹Pāngmon Jehoiadana kakaso athishurda raithānabing china sai; Sabbathwui otram ngatha̱khui kahaibingli shinki kajibinglila athumna pāngmon Jehoiadawuili thanvāsera.

¹⁰Kala PROHOwui shimli haikasā Awunga Davidwui kazei, chāngvei saikora chi pāngmonna raithānabingli mishokra;

¹¹kala azingshong eina thuilaga atungshong eina tangda, shimla, hanphutpamla kuimareida raimibingna khutlai singriplaga nganingphina.

¹²Chiwui thili ana awungawui nao chi khuishoklaga wungnao kuihon ngahonmida nao chiwui pongli hāngmi. Chieina athumna thao neomida awunga sanghaowa; kala pāng kapheda, “Awunga okpeimeiranu!” da hānga.

¹³Raimibingwui kala mibingwui akhon akhak chi Athaliahna kashā tharan, khi kasākhala da ana PROHOwui shimli mibing chili zangyanga;

¹⁴ ana akhayang tharan, khangachā athishurda awungana pākra̱ ngalemli nganingda, raithānabing kala talla̱ kakhongbing china awunga ngalemli leisāsera; kala ngalei chiwui mibingna mathānda talla̱ khongsai. Athaliahna awui kachon serkhakta, “Yomhaira, yomhaira!” da vaoshoka.

¹⁵Chieina raimibingli yangmi khavai raithānabingli pāngmon Jehoiadana kasoda hānga, “Ali raimibingwui ngachai eina khuishoklu, kala kachikathāna ali shurakha raighai eina sāthatlu.” Kaja, “PROHOwui shimli masāthatalu.” da pāngmonna hānga.

¹⁶Chieina athumna ali tukkhuilaga siguishim zangkhavai eina awungashim ngarui khavai chili asāthathaowa.

¹⁷Chiwui thili Jehoiadana, athum PROHOwui mi sāra da PROHO eina awunga kala mibingwui ngachaili tuingashit khuingasaka kala awunga eina mibinglila tuingashit khuingarok ngasaka.

¹⁸Kala mi saikora vālaga Baalwui shim ashaokhaitai; hanphutpamla, meoma̱la shaokathānkhaimiserhaowa kala Baalwui pāngmon Mattanlila hanphut mangāli shaothathaowa. Kala pāngmonna PROHOwui shim mayon khavai shantri phāsanga.

¹⁹Chiwui thili raithānabing, Carinaobing, shantribing kala ngalei chiwui mi saikora hokhuida awungali PROHOwui shimwui eina thānshoklaga shantribingwui ngaveishong eina awungawui shim kāshungchaoda kachuiunga. Kala ana awungawui pamkhongli pama.

²⁰Chithāda sāda mi saikorana mathāna; kala Athalilahli awungawui shimli sāthat kahaiwui thili keinung chi chingrihaowa.

²¹ Jehoashna mungkaphok tharan a kum shini kāshunghairasai.