Read Tangkhul Naga 2 WUNGNAOBING 13 Bible Online

2 WUNGNAOBING 13 - Tangkhul Naga bible

2 WUNGNAOBING 13

¹Ahaziahwui naomayara, Judahwui awunga Joashna mungda maga̱da kakathuma kum, Samariali Jehuwui nao Jehoahazna kum tharāda shini Israelli thuimunga.

²Ana PROHOwui mikyanli makaphā makhayā ot sai kala Nebatwui naomayara Jeroboamna morei kasā chili shurda Israelli morei sāngasaka; kala chiwui eina mangareithuimana.

³Chiwui vang PROHOna Israelli malungvāthaoda, Syriawui awunga Hazaelwui pāngli, kala anaomayara Ben-hadadwui pāngli horsangmichinga.

⁴Chiwui thili Jehoahazna PROHOli kaphā eina, Syriawui awungana Israelnaobingli kayākha rekharekhala kaji theihaoda, awui kapo chi PROHOna khuisangmi.

⁵(Chiwui vang Israelli huikhame akha mida Syria mibingwui eina yāmshokta, khare kachāngwui thāda Israelnaobingna chingri eina okthuilui.

⁶Chithalala athumna Jeroboamwui morei kasā thāda kala Israelli morei sākhangasak chiwui eina athumna mangareithuimana, kha chiwui apongli zata; kala Samariali Asherah chila leingasakpapama.)

⁷Kaja Jehoahazwuili sigui katong raimi hangphangā, siguigari tharā kala phei raimi thingtharāli lāngda maleisāmana; kaja Syriawui awungana sākazammiserhaida lanpumli khalei chifa thāda sāmihaowa.

⁸Jehoahazwui kasā khavā ana kasāsā saikora kala awui pangshap saikora chi Israel Awungabingwui Thotrinchān Lairikli makapiserhaimala?

⁹Jehoahaz thikahai eina avāva̱ ngarāli ngasoda Samariali chifahaowa; kala anaomayara Jehoashna awui mahut thuishina.

¹⁰Judahwui awunga Joashna mungda thumrāda kashine kum Samariali Jehoashna Israelli mungphoka; kala kum tharāda tharuk munga.

¹¹Ala PROHOwui mikyanli makaphā otmāng sai, Nebatwui nao Jeroboamwui morei kasā saikora china Israelli morei sākhangasak thāda anala chiwui eina mapākthuimana, kha chili zata.

¹²Jehoashwui kasā khavā ana kasāsā khangatatei, awui pangshap eina Judahwui awunga Amaziahli khangarar saikora chi Israel Awungabingwui Thotrinchānli makapiserhaimala?

¹³Jehoash thikahai eina anaomayara Jeroboamna awui mahut wungpamkhongli pama; kala Israel awungabingli ngasoda Joash Samariali chifahaowa.

¹⁴ Elishali athitlamwui kazāt kakazā chitharan Israelwui awunga Joashna ali tāyanga, kala “Ishāvā, ishāvā, siguigari kala raimibing thada Israelli kankhame” da chapa.

¹⁵Elishana, “Malā kala malāthing khuilu” da kakaso eina ana malā kala malāthing khuisinga.

¹⁶Kala Israelwui awungali, “Malā hunlu” da kahāng eina ana malā chi huna. Kala Elishana awui pāng awungawui pāngli para.

¹⁷Ana hānga, zingshoshongwui charfa chi sholu: ana chi shoi. Chieina Elishana, “Kāplu!” da kasoi; kala ana kāpa. Ana hānga, “PROHOwui khayuiya malāthing, Syriali yuikhavai malāthing: Athum makānranglakha eina tangda nana athumli Aphekli ngararra.”

¹⁸Kala ana hānga, “Malāthingbing chi khuilu”; ana chi khui. Israel awungali, “Ngaleili chieina kāpsanglu”; da hānga; ana kāpkathumshilaga thāhaowa.

¹⁹Chieina Varewui mi china malungvāthaoda hānga, “Kāpta phangā tharuk shisi kaje nana Syrianaobing mayumranglakha eina tangda samiki kajina, kha ara nana kathumshidamāng yuimara.”

²⁰Chithāda Elisha thihaowa kala athumna chifahaowa. Chitharan luira̱dung atamli Moabnaobingna rai rakaikai jisai.

²¹Thangkha mi akha chifakida leilakha, yanglu, ngaponkazatbingli theida kathi angun chi Elishawui chikhurli horsanghaowa; kala angun chi Elishawui ara̱kuili zangsāza̱khaleoda ringunglaga thuinganinghaowa.

²²Chitharan Jehoahazwui thotli Syriawui awunga Hazaelna atam kachida Israelnaobingli rekhareklak eina sāsai.

²³Kha PROHOna athumli lumashanmi kala phaningmi; khikhalajila Abrahamli, Isaacli, kala Jacobli tuingashit sākahai chi phaningunglaga athumli shimān khavai masāmana, kala aja rāshungda awui eina horhaichao majimana.

²⁴Syriawui awunga Hazael thikahai eina anaomayara Ben-hadadna awui mahut thuishina.

²⁵Ana thuikaphung eina, avāva̱ Hazaelna rai ngararlaga Jehoash shavāva̱ Jehoahazwui eina ngapaithui kahai keinung saikora chi Jehoashna akhuiluishita. Jehoashna Ben-hadadli yui kathum shida Israel keinung saikora chi khuilui kajina.