Read Tangkhul Naga 2 WUNGNAOBING 14 Bible Online

2 WUNGNAOBING 14 - Tangkhul Naga bible

2 WUNGNAOBING 14

¹Israelwui awunga, Joahazwui nao Joashna mungda kakhane kum, Judahwui awunga, Joashwui nao Amaziahna mungphoka.

² Ana mungkaphok atamli kum maga̱da phangā kāshunghairasai. Kala ana Jerusalemli kum maga̱da chiko munga. Ava̱va̱ Jerusalemwui einana, aming Jeho-addin hoi.

³Ana PROHOwui mikyanli khamashung ot sai, chithālala avāva̱ Davidwui mathāmana; otsak saikorali avāva̱ Joashna kasā tākam eina sai.

⁴Kha kajujuiwui apambing chi masākhaimihaithuda mibingna pha̱kaphayā ot kala nganamkaphā otyur riktāchinga.

⁵Awui wungram ngazipshap kaji eina ana avāva̱, awungali sākathata raobingli sāthathaowa.

⁶Kha shaokathatabingwui anaongarāli masāthatmana: PROHOna kaso kahai Moseswui ain lairikli kapi kahai athishurda, “Naongarāwui vang eina avāva̱ ngarāli masāthatpaimara; lah avāva̱ ngarāwui vang eina naongarāli masāthatpaimara, kha mi kachiva̱na ichichā moreiwui vang thira.” da kapihaisai.

⁷ Kashuirak eina Salt Seali rai sāda ana Edomwui mi thingtharā shaothatlaga Sela kaho apam chi khui, kala Jokthe-el da phokmida aja eina tangda hoda lei.

⁸ Amaziahna Israelwui awunga Jehuwui nao Jehoahazna kapharā Jehoashli, pao chihovāda hānga, “Ralu ini maingātta ngasungyangsa.”

⁹Chieina Israelwui awunga Jehoashna Judahwui awunga Amaziahli pao chihovai, “Lebanonli khalei ka̱shātrongna Lebanonli khalei cedarthingli ‘Nanao ngalāva̱ inaomayarawui preiva̱ sākhavai milu’ da hānga; kala Lebanonwui ramsā akha rākānda ka̱shāt chi naikachupmihaowa.

¹⁰Nana Edomli yuihaowa da langso khaningli. Nawui tekhamatei chi shapa da phaninglaga kasaikha shimli pamlu; nala Judahla shimān khavai mili malungmavāt ngasakalu.”

¹¹Kha Amaziahna manganāsangmana. Chiwui vang Israelwui awunga Jehoashna vāsamphanga; kala Judahwui Beth-shemesh kaho apam chili ani khani ngasunga.

¹²Israelna Judahli yuihaoda kachāyām eina shimli yāmungserhaowa.

¹³Kala Israelwui awunga Jehoashna Judahwui awunga Jehoashwui nao Amaziahli tukkhuihaida Beth-shemeshwui eina Jerusalemli khuiunga; kala Ephraim ngavei eina thuilaga Achithek Ngavei vāshungda phākho khuining shāmati shaokhaimihaowa.

¹⁴Kala PROHOwui shimli leikasā sinā, lupāsā, khorkhong kala awungawui shimli leikasāsā saikora chila, mila tukphungda Samariali khuiungserhaowa.

¹⁵Jehoashwui kasākhavā, ana sāhaikasā, awui pangshap, kala Judah awunga Amaziahli khangararwui apong saikora Israel Awungabingwui Thotrinchān Lairikli makapiserhaimala?

¹⁶Jehoash thikahai eina Israel wungnaobingwui ngachailli Samariali chifahaowa; kala anaomayara Jeroboamna awui mahut thuishina.

¹⁷ Jehoahazwui nao Jehoash thikahaiwui thili, Judahwui awunga Joashwui nao Amaziah kum tharāda phangā ringvai.

¹⁸Amaziahwui otsak sākahai kateibing Judah Awungabingwui Thotrinchān Lairikli makapiserhaimala?

¹⁹Athumna Jerusalemli ali sāthat khavai ngathumda kasāwui vang Lachishli yāmvāhaowa. Kha athumna ali kharomvālaga chili asāthathaowa.

²⁰Athumna awui angun chi sigui eina khuiunglaga Davidwui keinung Jerusalemli avāva̱ ngarāwui ngalemli chifahaowa.

²¹ Kala Judahwui mibingna avāva̱ Amaziahwui mahut kum tharāda tharuk khararra anaomayara Azariahli awunga sanga.

²²Avāva̱ thikahai eina ana Elath sakāluishitlaga Judahli hanmi.

²³Joashwui naomayara Judahwui awunga Amaziahna mungda tharāda kaphangā kum, Israelwui awunga Joashwui nao Jeroboamna Samariali mungphoka, kala kum hangmatida akha munga.

²⁴PROHOwui mikyanli makaphā ot chi sāda, Israelli morei sākhangasak, ana Nebatwui naomayara Jeroboamwui morei kasā saikora chiwui eina mangareithuimana.

²⁵Israelwui PROHO Varena awui rao Jonah marān Gath-hepherwui Amittaiwui naomayarali hāngmi khangasak tui athishurda, Israelwui thari Hamathwui zangkhavai eina thuida Arabah Ngayi vāshungda hanshokmi.

²⁶Kaja Israelwui sipkasa marlak kahai chi PROHOna thei kaja rao nilala kala ningkakhan nilala athumwui alungli Israelli ngachonmi khavai maleisāmana.

²⁷Kha Israel kaho hi okathuiwui eina shimān ngasakphalungra da PROHOna kahāngla mahānghaimana; chiwui vang ana Joashwui nao Jeroamwui pāng eina athumli kankhuimi.

²⁸Jeroboamwui kasākhavā, ana kasāsā saikora, awui pangshap kala ana kathāda rai ngarar, kala Judahli leikasā Damascus eina Hamathli kathāda hankhuiluishit kaji saikora hi Israel Awungabingwui Thotrinchān Lairikli makapiserhaimala?

²⁹Jeroboam thikahai eina anaomayara Zechariahna awui mahut thuishina.