Read Tangkhul Naga 2 WUNGNAOBING 18 Bible Online

2 WUNGNAOBING 18 - Tangkhul Naga bible

2 WUNGNAOBING 18

¹ Israel awunga, Elahwui naomayara Hosheana mungda kakathuma kum, Ahazwui nao Hezekiahna Judahwui awunga sāphoka.

²Ana mungkaphok tharan kum maga̱da phangā kashunghairasai, kala Jerusalemli kum maga̱da chiko munga. Ava̱va̱wui ming Abi hoi, Zechariahwui naongalāva̱na.

³Avāva̱ Davidwui kasā thāda anala PROHOwui miktāli khamashung otmāng sai.

⁴ Ana kajujui apambingli sākahai kameopam sākazammihailaga lungkhorla pheimihaowa, tarungla sātekmiserhaowa. Mosesna sākakhui pithraiwui phara̱ chila akha̱ sāmihaowa, kaja atam chitharan eina tangda Israelnaobingna chili nganamkaphā thao riktāsai; chili Nehushtan da hoi.

⁵Israelwui PROHO Vareli ana shitsangtita; ridala naodala Judah awungabingwui ngachaili a kathā maleilakmana.

⁶Kaja ana PROHOli ngavaptitta athi kashurwui eina mapakthuilakmana, kha Mosesli PROHOna kaso kahai ningkhami chi mayontita.

⁷PROHOna ali ngasomida khavā apam kachiva̱li mataisangchinga. Ana Assyriawui awungalila mashurmara da rai sai.

⁸Philistinewui mibingli raikān kapambingwui dolan eina thuida raipan sākahai keinung vāshungda yuihaida Gaza kala chiwui leiret vāshunga.

⁹Awunga Hezekiahwui khamate kum kaja Elahwui nao, Israelwui awunga Hosheawui kashine kum chi Assyriawui awunga Shalmaneserna rāda Samariali kuinamhaida

¹⁰kakathuma kumwui akuplamshong khuichanghaowa. Hezekiahwui katharuka kum kaja Israel awunga Hosheawui kachiko kum chi Samaria khuithui kahaina.

¹¹Assyriawui awungana Israelnaobing Assyriali tukunghaida Halahli, Gozan kongphei Haborli, kala Medebingwui keinungli chipama,

¹²kaja athumwui PROHO Varewui tui makhuisangmana, kha PROHOwui tuingashit awui rao Mosesna kaso kahai saikora chieina tangda chonmakanhaowa; athumna kakhuila makhuisangmana kahāngla manganāmana.

¹³ Awunga Hezekiahwui tharāda khamate kum, Assyriawui awunga Sennacheribna rāda Judahwui raipam ngaveikham kahai keinung saikora khuithuihaowa.

¹⁴Judahwui awunga Hezekiahna Assyriawui awungana Lachishli leilakha pao chiphunda hānga, “Ina yonhaira, hiwui eina kathuimihaolu kala nana kapopo chi mira.” Assyriawui awungana lupāsā kg. thingthara kala sinā kg. thingkha milu jihaowa.

¹⁵Hezekiahna PROHOwui shimli khalei kala awungawui lanshimli khalei lupāsā saikora miserhaowa.

¹⁶Chitharan PROHOwui shim khāmongwui sinā kharaikhui, kala Hezekiah awungana khāmongthingli heiror kahai sinā chila kharuikhuilaga Assyriawui awungali miserhaowa.

¹⁷Kala Assyriawui awungana Tartan, Rabsaris kala Rabshakeh kaji akhavā kathum hili ngasoda raimi kachungkha Lachishwui eina Jerusalemli awunga Hezekiahwuili chihovai. Athumna Jerusalemli vākashung tharan ato ra̱khongwui ra̱shong kajui shongfa Fullerwui Luipam chili vāngasāma.

¹⁸Athumna awungali akhavao eina, dolanwui zanglui, Hilkiahwui nao Eliakim, kapime Shebnah kala kazipme Asaphwui nao Joah athum shokrāsai.

¹⁹Rabshakehna athumli hānga, Hezekiahli hānglu, khangama Assyriawui awunga china kahāngna: Nathumna ningnganungkhung eina khalei hi khipāli kachihānkhala?

²⁰“Tuimāng china raiwui angarit kathem kala pangshapna da phaningla? Khipāli ningshaida ili ngakaishikhala?

²¹Yanglu, nathumna tekkahaiya titi khāmshui, chili kashaiali rungki kaje Egyptli ningshaipamli. Ali ningshai kapambing saikorali Egyptwui awunga Pharaohahna chithai.”

²²Kha nathumna ili, “Ithumwui PROHO Vareli ningkashaina, jilaga Hezekiahna Judah eina Jerusalemli, Jerusalemli hanphut hili khorumra da hānglaga kajujuipam kala hanphutbing sākathānmi kahai chi a maningmala?

²³Shoklu, Assyriawui awunga ishameili ngasanyanglu: Nathumwuili sigui tongkathei leiakha ina sigui thingkhani mira.

²⁴Siguigari kala sigui raimiwui vang nathumna Egyptli ningshaipamlaga kathāda ishameiwui teomeikap kaje raithānali kashamshapra da phaningla?

²⁵Chili lāngda ina apam hi sāshimān khavai kharā hi PROHO mazangmala? PROHOna ili, vāda ngalei chi sāshimānhaolu da hānga.”

²⁶Chieina Hilkiahwui nao Eliakim, Shebnah, kala Joah athumna Rabshakehli hānga, “Narao ithumli Aramwui tui eina matuimilu, ithumla shai, Judahwui tui eina mamatuimialu, phākholi nganāpamda khaleibingna shākhuihaipaishina.”

²⁷Kha Rabshakehna athumli hānga, “Phākholi pamda khalei athum khalattawui chir-pai mangzālaga nathumli shimānrumki kaji athumli tui hi mahāngla, nashāmei kala nathummāngli hāngkhavai ishāmeina ili kachihola?”

²⁸Chieina Rabshakehna thui nganingda Judahwui tui eina juilak eina vaoda hānga, “Assyriawui awunga khangama awungawui tui nganālu!

²⁹Awungana kahāngna: nathumli Hezekiahna mathānngui ngasakalu, kaja ipangwui eina ana makanshokmirarmara;

³⁰PROHOna ithumli makahatlakla ngatangshokmira kala keinung hi Assyriawui awungwui pāngli mahorsangmimara da Hezekiahna nathumli kahānga PROHO chili maningshaipamalu.

³¹Hezekiahwui tui makhuilu; kaja Assyriawui awungana hithāda hānga: Nathumna ili shokchamnākha, kachichāwui drakhāthei kala khaorātheilui vazāra, kachichā ra̱khongwui tara̱ mangpamra —

³²nathum lamli ngaraikachā apam, zātla, theishiraila, kashakazā yur drakhā yāmgui, olive eina khuira̱ khavāt makhalei apamli okthui khavai makhuivāranglakha eina tangda nathum chingri eina leipapamra. PROHOna ngatangshokmira da Hezekiahna kahāng chi makhuisanglu.

³³Kachikathā yurwui varebingna Assyria awungawui pāng eina awui ngalei ngatangshokmi kahai leihairala?

³⁴Hamath eina Arpadwui vare kali leili? Sepharvaim, Hena, kala Ivvahwui vare kali leili? Athumna ipangwui eina Samaria kakankhuihairala?

³⁵Ngaleibingwui varebing khipāna athumwui lam ipangwui eina kankakhui khaleida, PROHOna Jerusalem ipangwui eina kankhuira kajila?”

³⁶Kha mibingna khikha mangahānkāla kasaikha pamhaowa, kaja awungana, “Ali mangahānkālaklu.” da kasohairasai.

³⁷Chieina dolanwui zanglui Hilkiahwui nao Eliakim, kapime Shebna, kala kapikakhuiya Asaphwui nao Joah, athumna kachon serkhākta awungali Rabshakehwui kahahāng tui chi ahāngsera.