Read Tangkhul Naga 2 WUNGNAOBING 19 Bible Online

2 WUNGNAOBING 19 - Tangkhul Naga bible

2 WUNGNAOBING 19

¹Awunga Hezekiahna chi kashā tharan, kachon serkhaklaga bora ngavaida PROHOwui shimli kai.

²Kala dolanwui zangluiwo Eliakim, kapime Shebna, kala pāngmon khararbing bora ngavailaga Amozwui nao marān Isaiahli asamphang ngasaka.

³Athumna hānga, Hezekiahna hithāda hānga: “Aja hi wukkakhananga, kakahar kala maikashi zimikshona; nao ra̱laga pangshap maleimada mapharākharar thāhaira.

⁴Assyriawui awungana Rabshakehli chihorāda kharinga Vareli mana̱shikida tui kachungkha kahāng hi nawui PROHO Varena shāserhairara. Chiwui vang shākkahaibing hiwui vang seihā kasāmilu.”

⁵Awunga Hezekiahwui raobingna Isaiahli khavā tharan,

⁶Isaiahna athumli hānga, “Nashāmeili unghānglu, ‘PROHOna hithāda hānga, Assyria awungawui raobingna ili mashātlaga kahāng tui saikora chiwui vang mangacheelaklu.

⁷Yanglu, ina ali ning akha sangmida, pao makhamathā akha shāngasakta awui ngaleili latunghaora; kala shimli ungkashung eina ali akhalattawui raighai eina thingasakra.’”

⁸Rabshakehna latkhaung tharan Assyriawui awungana Libnahli rai ngararsai; kaja awunga chi Lachish chihohailaga thuihaira da shai.

⁹Awungana Ethiopiawui awunga Tirhakahwui pongli “Yanglu, nali ngarar khavai ana rāhaira,” da kashā tharan ana Hezekiahli pao chihoda hānga,

¹⁰“Judahwui awunga Hezekiahli ahānglu: ‘Assyriawui awungawui pāngli Jerusalem mahorsangmimara da ngashitsang kakhaninga, nana kachihāna Varewui tui makhuialu.

¹¹Yanglu, ngalei kachiva̱ Assyriawui awungana sākazammiserhaira kaji nala shāhaira. Nali ngatangmimaraola?

¹²Ishāvāna sākazami kahai ngalei, Gozan, Haran, Rezeph kala Telassarli khalei Eden yurbingwui varebingna ngatangshokhami leihairala?

¹³Hamathwui, Arpadwui, Sepharvaim keinungwui, Henawui kala Ivvahwui awungabing kachili leilikhala?’”

¹⁴Paomebingwui eina Hezekiahna chithi chi samphangda pāyanga; kala ana PROHOwui shimli kāda PROHOwui mangāli harchithei.

¹⁵ Kala Hezekiahna PROHOwui mangāli seihā sāda hānga, “O cherubimwuitungli khamunga Israelwui PROHO Vare, okathuiwui wungram saikorawui Vare chi nana, kazingram eina okathui nana kasāna.

¹⁶Nāshungda khanganāmilu; O PROHO, namik eina khayangmilu; kala kharinga Vareli mana̱shi khavai Sennacheribna rāhāng khangasak tui saikora shāmilu.

¹⁷O PROHO, yur saikora kala athumwui ngalei Assyriawui awungabingna sākazammiserhaira kaji hi khamashung tuina,

¹⁸athumwui varebingla meili horsangmiserhaira; kaja chibing chiya varebing maningmana, kha mipāngna thing ngalung eina sākakhuina; chiwui vang shimān ngasak kahaina.

¹⁹Chieina ara O ithumwui PROHO Vare; ina seihā sali awui pāng eina ithumli kakhuimilu, chieina okathuiwui wungram saikorana, O PROHO namāng Varena da theikhuira.”

²⁰Chieina Amozwui nao Isaiahna Hezekiahli pao hāngchiphuna, PROHO, Israelwui Varena hānga: Assyriawui awunga Sennacheribwui pongli nana seihā kasā chi ina shāhaira.

²¹Awui pongli PROHOna kahāng tui chi hina: “Zionwui kachinga naongalāva̱ nali ningkachaida mana̱shiya; Jerusalemwui naongalāva̱na nakhanukli kuikhayita.

²²Nana khipāli mana̱shida zeida leili? Khipāwuitungli nawuikhon juihaira kala langkaso mikyan eina yanghaira? Israelwui Kathara Alina!

²³PROHOli mana̱shi khavai paome chihoda nana hānghaira, ‘Juikhamatai kaphung hupta iwui siguigari kachungkhana vāhaira; Lebanonwui akatanga eina tangda; chiwui kajujuiya cedarthingbing, cypressthing mathāmeikap kaji ina ta̱teka, tāmeikap shāmataimeikap kaji ngahong vāshungda.

²⁴Ina ra̱khong khonda mi ngaleiwui tara̱ manga, kala ina ipheimayā eina Egyptwui kongrā hupta theng ngasaka.’”

²⁵“Na mashāsamala ina rilak eina chukmaja kahai chi? Ina achālakhawui eina machuk kahai arui rāshok khangasakna, kaja ngaziplak eina ngavei kahai keinungbing ngayāng ngasakra da,

²⁶chili khaleiyabing, pangshap maleithuda ningchothaira kala pa̱ngapai, luili khalei thingnā ra̱hā kala wonnuibing, shimtungli kakhar khawobing thāda; makharanglakha ngahui kahai mathāmala?

²⁷“Kha nana pamkazang, kala nawui kashok-kazang ina theisera; kala nana ili malungkhavāt theisera.

²⁸Khikhalajila nana ili makhamayā malungkhavāt, kala nawui langkaso ikhanāli rāshunghaida; Ina nali nārenkhuira, kala nakhamor khalaplaga nana rākhavai shongfa chieina latunglui ngasakra.”

²⁹“Kala hina nawui vang machut ngasāra: ajakum khalatta kakharwui eina zāra, kakhane kum chiwui eina shonkashok chi zāra; chiwui thili kakathuma kum, yaora kala hātra kala drakhārong lingsangda chiwui athei nathumna shaira.

³⁰Kala shākkahaiya Judahwui shimkhurna latluida angayung sa̱khuida athei matheira;

³¹kaja Jerusalemwui eina taishokra, kala Zion kaphungwui eina ringkasā khumkha shokra. PROHOwui lungchan china hi sāmira.

³²“Chiwui vang eina Assyriawui awungawui pongli PROHOna hithāda hānga, keinung hili a marāmara, chāngvei phungdala marāmara, kuikhanamla makuinamara.

³³Awui rākhavai apong chieina horzakta ana hanungluira, kala keinung hili marāzangmara da PROHOna hānga.

³⁴Kaja I khalattawui vang kala iwui rao Davidwui vang ina keinung hi kankhuiki kajina.”

³⁵Chithang ngayā PROHOwui kazingrao china vāda Assyria mibingwui rāmrahli mi lakh akha thing hangchishatta phangā sāthathaowa. Ngathorthak kathui tharan yanglu, kathingun ngasāserhairasai.

³⁶Chieina Assyriawui awunga Sennacheribna latunglaga Ninevehli ungpānhaowa.

³⁷Ana awui vare Nisrochwui shimli khorumda leilakha, anaomayara khani, Adrammelech eina Sharezerna sāthathailaga Ararat ngaleili yāmvāhaowa. Kala awui nao Esarhaddonna awui mahut thuishinhaowa.