Read Tangkhul Naga 2 WUNGNAOBING 2 Bible Online

2 WUNGNAOBING 2 - Tangkhul Naga bible

2 WUNGNAOBING 2

¹Elijahli PROHOna sur eina kazingram khuikānanai tharan, Elijah eina Elisha Gilgalwui eina zatphokhairasai.

²Elijahna Elishali hānga, “Na hili pamsālu; kaja PROHOna Bethelli vāshunglu jihaira.” Kha Elishana hānga, “PROHOwui ming singda kahāngna, nanala katheina, ina nali kachilikha mahorhaimara.” Chieina ani Bethelli ngasotai.

³Bethelli khalei marānbingwui naomayarabingna Elishali rāsamphangda hānga, “Nawui akhavāli aja PROHOna khuithuihaora kaji na theila?” “Mha, thei; kasaikha pamlu.” da ngahānkai.

⁴Elijahna ali hānga, “Elisha, na hili pamsālu; kaja ili PROHOna Jericholi tāshunglu jihaira.” Kha ana hānga, “PROHOwui ming singda kahāngna nanala katheina, I nali kachilikha mahorhailakmara.” Chieina anina Jericholi vai.

⁵Jericholi khalei marānbingwui naomayarabingna Elishawui ngalemli vāda hānga, “Nawui akhavāli aja PROHOna khuithuihaora kaji na theila?” Ana, “Mha, thei; kasaikha pamlu.” da ngahānkai.

⁶Chiwui thili Elijahna ali hānga, “Hili pamsālu; kaja PROHOna ili Jordanli vāshunglu jihaira.” Kha ana hānga, “PROHOwui ming singda kahāngna, nanala katheina, I nali kachilikha mahorhailakmara.” Chieina ani thuithathuihaowa.

⁷Marānbingwui naomayarabing hangphangāla anili ngasovai kala anina Jordan pheili khanganing eina, athum katāmeihamsamda anganinga.

⁸Chiwui thili Elijahna awui kachon khaluikhuilaga tara̱ chili khangaphit eina atung azing ngayarhaida, ngalei kathengtungli zatlaga kong makānkāhaowa.

⁹Anina makankā kahai thili Elijahna Elishali hānga, “Ili makhuithuiranglakha, ina nawui vang khi samirakhala polu.” Elishana hānga, “Nawui manglā kathā khani shida ili kha-mataisang ngasakmilu da poli.”

¹⁰Ana hānga, “Kasaka ot nana pohaira; chithālala, ili khuikathui chi nana theiakha chi nawui vang ungshungra; kha nana matheiakha chi masamphangmara.”

¹¹ Anina chān ngazekmamānda zatlakha, yanglu, meiwui siguigari akha eina meiwui siguibing tālaga anili pākngasakhaowa. Kala Elijahli sur eina kazingram khuikāhaowa.

¹² Elishana chi theilaga, “Ishāvā, ishāvā, siguigari kala raimibing thada Israelli kankhame!” da chapa. Kala ali matheiluithuwa. Kala awui kachon khuilaga akai khani sāda serkhākhaowa.

¹³Elijahwui kachon tātung kahai chi khuilaga ana latungda Jordan kongpheili anganinga.

¹⁴Kala Elijahwui eina tātung kahai kachon chieina tara̱li ngaphitta hānga, “Elijahwui PROHO Vare chi kali leili?” Ana tara̱li khangaphit tharan tara̱ chi yāshong uishong pākthuihaowa; kala Elishana kānkāhaowa.

¹⁵Chitharan Jericholi khalei marānbingwui naomayarabingna ali khalāda kathei eina hānga, “Elijahwui manglā Elishali zanghaira.” Kala athumna ali angaroklaga awui mangāli ngakhumsanga.

¹⁶Athumna hānga, “Yanglu, ara naraobingli ngasoda kapanga mi hangphangā leili; athumna vāda nawui akhavāli aphāyangranu; kaja PROHOwui Manglāna ali khuithuihailaga kaphungli nilala, tampākli nilala apam akhali horsanghaida leilapai.” Ana hānga, “Machihovāpaimara.”

¹⁷Kha athumna hānglui hānglui kaji eina, vaishihaida, “Vāngasaklu” da hānghaowa. Chieina athumna mi hangphangā chihovāda, kathumthang aphālaga masamphangthuwa.

¹⁸Ana Jericholi pamda leilakha athum hanungrāsai, chieina ana, “Mavālu da ina nathumli mahāngmala?” da hānga.

¹⁹Chitharan keinung chiwui mibingna Elishali hānga, “Yanglu, ishāmeina kathei thāda keinung hi ringphālaka, kha tara̱ mamathāmana, ngaleila matumana.”

²⁰Ana hānga, “Koklui kadhar akha machi sanglaga ili khuirāmilu.” Chieina athumna khuivāmi.

²¹Chiwui thili ana ura̱pamli vāda machi chi heisangda hānga, “PROHOna hānga, tara̱ hi ina tharngasakhaira; aja eina thuida hiwui eina kathila, kashimānla mashokluimara.”

²²Chiwui vang Elishana kahāng athishurda aja eina tangda chiwui tara̱ tharchingda lei.

²³Ana chiwui eina Bethelli kai, kala shongfali zatlakha keinung chiwui naonshinao katenaobingna zeida hānga, “Kuikoka, thuiulu! kuikoka, thuiulu!”

²⁴Ana ngareiunglaga athumli kathei tharan PROHOwui ming singda athumli khonshi. Kala singom ava̱ khani khararwui eina shoklaga athum hangmatida khani chi makeikhanārmihaowa.

²⁵Chiwui eina ana Carmel Kaphungli vālaga Samariali latunga.