Read Tangkhul Naga 2 WUNGNAOBING 20 Bible Online

2 WUNGNAOBING 20 - Tangkhul Naga bible

2 WUNGNAOBING 20

¹ Atam chitharan Hezekiahli kazāda thiki jihaowa, kala Amozwui nao marān Isaiahna ahānga, “PROHOna kahāngna, ‘Shimkhurli hāngkharān saikora hānghaolu, kaja na thihaora, na mashokrarluimara.’”

²Chieina Hezekiahna phākhoshong mai ngareizanglaga PROHOli seihā sāda hānga,

³“O PROHO, arui kaphaningungmilu, ina kathāda nawui mangāli ningtongda shitsangtitlaga zathaira, kala nawui mikyanli khamathā ot chi sāhaira kaji.” Kala Hezekiahna panglāk eina chapa.

⁴Isaiahna kayāng makānshokranglakha PROHOwui tui china ali rāhānga;

⁵“Ngareiungda iwui mibingwui wungnao Hezekiahli hānglu, ‘Navā Davidwui PROHO Varena kahāngna: Ina nawui seihā kasā shāhaira, kala nawui chara̱ katā theihaira; yanglu, nawui kazāt ina raimihaida kakathumathang nana PROHOwui shimli kāra.

⁶Kala ina nawui mirin kum tharāda phangā ngarumsangmira. Ina nali kala keinung hi Assyria awungawui pāng eina kanshokmira; kala I khalattawui vang, iwui rao Davidwui vang keinung hi kankhuira.’”

⁷Isaiahna, “Khaorātheiwui khamui ahāng akha khuirālu, kala chi moksātungli parlu, chieina ana kharai samphangra.” da hānga.

⁸Hezekiahna Isaiahli hānga, “Iwui kazāt hi PROHOna raimihaida kakathumathang ina PROHOwui shimli kāra kaji hi, kathāda theikhuipairakhala?”

⁹Isaiahna hānga, “PROHOna ngashitmi kahai ana sāki kaji ot chiwui theikhui khavai chi hina: akalā hi pheikār tharā kaseivā ngasakngaika kaseiung ngasakngaikhala?”

¹⁰Hezekiahna hānga, “Akalāna pheikār tharā kaseikhavā kasak maleimana, chiwui vang kaseiung ngasaktha̱lu.”

¹¹Chieina Isaiah, marānna PROHOli ngakaoda kapo eina, Ahazna akalā machut khavai sāhaikasā chiwui eina pheikār tharā kaseiunghaowa.

¹²Atam chitharan Babylonwui awunga Baladanwui nao Merodach-baladanna chithi eina ngasoda ot awui pao phungmeli chihovai; kaja Hezekiah kazāhaowa da ana shai.

¹³Hezekiahna mathānthup eina athumli samphangda, awui lanshimli khalalei lan lupāsā, sinā, nganamkaphā otyur, aman kasaka thao, raisāri haikhavai pam, kala awui shimli khalalei saikora, chitheisera; awui shimli kala awui wungramli khalalei chitheisera.

¹⁴Chiwui thili Isaiah marānna awunga Hezekiahli vāda hānga, “Mibing hina khi rāhāngkhala? Kala kachiwui eina kharākhala?” Hezekiahna ngahānkai, “Ngalei katāva, Babylonwui eina kharāna.”

¹⁵Isaiahna, “Athumna nawui shimli khimamei theihairakhala?” da ngahāna. Hezekiahna hānga, “Iwui shimli khalei saikora chitheihaira; iwui lanshimli khalalei ina makachithei maleimana.”

¹⁶Chieina Isaiahna Hezekiahli hānga, “PROHOwui tui nganālu:

¹⁷ Yanglu, nawui shimli khalalei, kala navā ngarāna aja rāshungda kazip kahai lan saikora Babylonli khuivāserhaoki kaji atam rārāli; akha eina tangda mataimara da PROHOna hānghaira.

¹⁸Nana pharākakhui nanao mayarabing eina tangda, kaikhali tukvāhaora; kala athum Babylon awungawui konungli ahongabing sāda apamra.”

¹⁹Chieina Hezekiahna Isaiahli hānga, “Nana kahāng PROHOwui tui hi phāhaira.” Kaja ana phaninga, “Khiwui vang maningkada, iwui thotli chingri vari kahai leira jiakha?”

²⁰Hezekiahwui otsakbing, awui pangshap saikora kala ra̱khongla, ra̱shongla, ana sākhuida keinungli tara̱ hokasang chi Judah Awungabingwui Thotrinchān Lairikli makapiserhaimala?

²¹Hezekiah thihaoda anaomayara Manassehna awui mahut thuishina.