Read Tangkhul Naga 2 WUNGNAOBING 21 Bible Online

2 WUNGNAOBING 21 - Tangkhul Naga bible

2 WUNGNAOBING 21

¹ Manassehna mungkaphok atamli kum tharāda khani kāshunghairasai, kala Jerusalemli kum hangphangāda phangā munga. Ava̱va̱li Hephzibah hoi.

²Israel mibingwui vang PROHOna yāmmi kahai yurbingwui ningkakachai otsak chi tākam eina ana PROHOwui mikyanli makaphā ot sai.

³Kaja avāva̱ Hezekiahna sakhai kahai kajujui apambing sakāluishita, kala Baalwui vang hanphutbing sakai; kala Israelwui awunga Ahabna sākahai thāda Asherahla sākhuilaga zimik, kachāng, sirā ashangva̱li khoruma.

⁴ kala PROHOna, “Jerusalemli iwui ming leira” da hāngkahai PROHOwui shimlungli kameo pha̱khavai hanphutla sakai.

⁵Kala PROHOwui shim yāngkhup apam khanili zimik, kachāng, sirā ashangva̱wui vang hanphut sakai.

⁶Anaomayaralila pha̱phayā khavai meili riktai, khanong khayang eina khamarān sāngasaka kala kazeikazang eina laivā kasā hi sāngasaka. PROHOwui mikyanli makaphā kachungkha sāda PROHOli malungvāt ngasaka.

⁷ Asherahwui meoma̱ ana sākakhui chi PROHOna David eina anaomayara Solomonli hāngkahai, “Shim hili, kala Israel shang saikorawui eina ina kapangkhui kahai Jerusalem hili mashimānda iwui ming leingasakra;

⁸kala ina kaso kahai ningkhami saikora chiwui athishurda ning ngasharda mayonakha, kala iwui rao Mosesli kaso kahai ain saikora chiwui athishurda mayontitakha, ina athumwui avāva̱ ngarāli mikahai ngalei chiwui eina Israelli mathui ngasaklakmara.”

⁹Kha athumna makhuisangmana, kala Israel mibingwui vang PROHOna sākazammi kahai yurbingna sākasā chili zakshimeida sākhavai Manassehna kasatsanga.

¹⁰Kala PROHOna awui rao marānbingli hāngngasaka,

¹¹“Khikhalajila Manasseh, Judahwui awungana ningkakachai otbing chi sāhaoda, kala athumli rida leikasā Amorwui mibingli zakshimeikhārda sahaoda; kala awui meoma̱li kaphaningwui vang Judahli morei sākhangasakwui vang;

¹²Israelwui PROHO Varena hithāda hānga, Yanglu, Jerusalem eina Judahwuitungli kasaka tandi mira, kala chi kashā mibingna khanā mathakra.

¹³Samariali tandi khami thāda Jerusalemli ina tandi mira, Ahabwui shimkhurli kasā thāda sāmira; Jerusalemli ina khongphei pheoda mithailaga ngakhum kahai thāda ina khumphalatra.

¹⁴Iwui shimluiwui shākkahai chi yangkashebingwui pāngli horsangmira, kala athumwui yangkashebingwui kashakazā kala ngaponzā khavai ngasāra,

¹⁵khikhalajila Egyptwui eina avāva̱ ngarāli thānshokthang eina thuilaga aja rāshungda athumna iwui mikyanli makaphā ot chi sāda ili malungvāt ngasaka.”

¹⁶PROHOwui mikyanli makaphā kasā morei sākhangasakli lāngda Jerusalem achikun akhawui eina akhali machipemranglakha eina tangda Manassehna khayon makhalei mibing eina tangda kachungkha shaothata.

¹⁷Manassehwui otsakbing ana kasā saikora, kala awui morei sākahai chi Judah Awungabingwui Thotrinchān Lairikli makapiserhaimala?

¹⁸ Manasseh thihaida ashi shimwui yāmgui kaja Uzzawui yāmguili chifahaowa kala anaomayara Amonna awui mahut thuishina.

¹⁹ Amonna mungkaphok tharan kum maga̱da khani kāshunghairasai, kala Jerusalemli kum khani munga. Ava̱va̱wui ming Meshullemeth hoi, Jotbahwui nao ngalāva̱na.

²⁰Avāva̱ Manassehna kasā thāda anala PROHOwui mikyanli makaphā ot chi sai.

²¹Avāva̱na kazat chili zata, kala avāva̱na khokharum kameobing chili khoruma.

²²Avāva̱ ngarāwui PROHO Vare chili horhaida PROHOwui athi mashurmana.

²³Amonwui raobingna ngathumda mithit khalen sāda ali shaothathaowa.

²⁴Kha awungali mithit khalen kasābingli mibingna shaothatpapamhaowa, kala awungawui nao Josiahli awungawui mahut shinngasakhaowa.

²⁵Amonwui otsakbing Judah Awungabingwui Thotrinchān Lairikli makapiserhaimala?

²⁶Alila awui chikhur Uzza yāmguili chifaya; kala anaomayara Josiahna awui mahut thuishinna.