Read Tangkhul Naga 2 WUNGNAOBING 23 Bible Online

2 WUNGNAOBING 23 - Tangkhul Naga bible

2 WUNGNAOBING 23

¹Chiwui thili awungana Judah eina Jerusalemwui khararnao katongali kazipkhui.

²Kala awungana PROHOwui shimli Judahwui mibing, Jerusalemli khaleibing, pāngmonbing, marānbing kala khararnaosan mateila mi saikorali hokāsera; kala PROHOwui shimli samkaphang tuingashit lairikwui tui chi saikora shākhavai pāchithei.

³Kala awungana pakra̱pheili nganingda PROHOwui mangāli lairik chili kapi kahai saikora ningtongda mayonra da tuingashit sai; kala mi saikorala tuingashit chili zangsera.

⁴ Kala pāngmon kharei Hilkiah, awui thi kazangbing, kala shim khāmong khamayonbingli awungana, Baalwui vang, Asherahwui vang kala kazingramli khalei ashangva̱wui vang sāsang kahai khorkhong saikora PROHOwui shimwui eina khuishokserhaolu da kasoi. Ana saikora chi Jerusalemwui ayar Kidronwui lamli riktālaga chiwui hotla Bethelli khuivai.

⁵Kala ana Judahwui awungana Judah kala Jerusalem kuikhamareili khalei kajujui apambingli nganamkaphā thao riktā khavai tharchisin kahai meoma̱li khokharuma pāngmonbing; kala Baal, zimik, kachāng, sirābing kala kazingli khalei ashangva̱ khangatateiwui vang thao rikkatā saikora chila khuishokhaida kashamserhaowa.

⁶Ana Asherah chi PROHOwui shimwui eina khuishokta Jerusalemwui ayar Kidron kongli ariktai kala shaokachuplaga chifa sāngasakta chifa chi yaruiwui chikhur tungli chaihaowa.

⁷PROHOwui shimli haikahai Asherahwui chonrān sākasang sha̱naobingna pamkhavai chili khayora mayarnaobingwui shim chila sakhaimihaowa.

⁸Pāngmonbingla Judah keinungwui eina kashamhaida, Geba eina thuilaga Beersheba vāshungda khalei kajujui apambingli pāngmonbingna nganamkaphā thao riktā khavai chi sākhamāngmiserhaowa; kala keinung ngavei uishong, lammunga Joshua ngavei zangkhavaili khalei kajujui apambing chila sākhaimiserhaowa.

⁹Jerusalemle kajujui apamwui pāngmonbingna PROHOwui hanphutli mazangla, achinā ngarāli ngasoda khawok makazang khamui zāda okthui.

¹⁰ Hinnomwui naomayara ngarāwui tampākli khalei Tophethla sākhamāngmihaida Molechli khipānakha naomayara kala ngalāva̱li kachigat sāda mariktā khavai sai.

¹¹PROHOwui shim zangkhavaili shim khamayona akhavā Nathan-melechwui shim ngalemli Judah awungabingna zimikli dharchigat sākahai sigui eina siguigariwui ama saikorala khuishokmiserhaowa, kala siguigari chi meili riktāmihaowa.

¹² Ahazwui shim mathāng atoli Judah wungnaobingna sākahai hanphutbing, kala PROHOwui shim kayāng khanili Manassehna sāsang kahai hanphutbing chi ngakhunteklaga akha̱-akhā samihaida Kidron kongli ahorsanghaowa.

¹³ Chiwui thili Jerusalemwui zingshoshong, sāmakhao kahai kaphungwui azingshong khalei kajujui apambing saikora Israel awunga Solomonna sākakā, Sidon mibingwui ningkakachaiya Ashtoreth, Moab mibingwui ningkakachaiya Chemosh, Ammon mibingwui Milcom, chi Josiahna sākhamāngmiserhaowa.

¹⁴Ana lungshomla shaokhaimihai, Asherimla ta̱tekmihaida, apam chili kathinaowui ara̱kui eina chipemihai.

¹⁵ Chili lāngda Bethelwui hanphut Nebatwui nao Jeroboamna kajujui apambing sakakā, mibingli morei sākhangasak chibingla ana ngakhuntekta lungguibing chila akha̱ sāda shaokachuplaga chifa sāmi kala Asherah chila meili riktāmihaowa.

¹⁶Josiahna ngarei khaung eina kaphungli chikhur kachungkha thei, kala mi chihoda chiwui ara̱kui akhuishok ngasaklaga meoma̱shim hanphutungli riktāda sākhamāng ngasaka; hi Varewui mi china hithāda shokra da PROHOwui tui chi hāngkahai athishurda rākashokna.

¹⁷ Kala ana, “Arā chili ina kathei chikhur chi khipāwuikhala?” da khangahān eina keinungwui mibingna, “Bethelli nana hanphut sākathānmi kahai chi shokra da kahānga, Judahwui eina kashoka Varewui mi chiwui chikhurna.” da ngahānkai.

¹⁸Ana hānga, “Ale ningkhānranu, khipānakha awui ara̱kui makhuiranu.” Chieina awui ara̱kui makhuishokthuda Samariawui eina kashoka marānbingwui ngachaili leipapama.

¹⁹Kala kameoshim saikora, kala PROHOli malungvāt khangasak Israel awungabingna Samaria keinungbingli sākahai kajujui apambingla Josiahna khuithuimiserhaowa; Bethelli sākahai chithāda saikora sakhaiserhaowa.

²⁰Kala chili leikasā pāngmonbingli hanphutungli shaothatta athumwuitungli mira̱kui riktārora. Chiwui thili ana Jerusalemli latunga.

²¹Awungana “Tuingashit lairik hili kapi kahai athishurda nathumwui PROHO Vare mingli makānkhami phanit mayonlu.” da kakaso mi.

²²Kaja Israelli wungva̱-wungvābingna mungkaphok eina thuida kala Israelwui awungabingna munglakha lah Judahwui awungabingna munglakha makānkhami phanit hi mamayonsalakmana.

²³Kha Awunga Josiahna mungda tharāda kachishata kum PROHOwui mingli Jerusalemli makānkhami phanit mayonnaowa.

²⁴Chili lāngda PROHOwui shimwui eina Hilkiahna phākakhui lairikli kapi kahai athishurda sākhavai, Judah kala Jerusalem ngaleili leikasā khanongbing, leivā kasā, teraphim kala meoma̱, ningkakachai saikora Josiahna hormiserhaowa.

²⁵Moseswui ain athishurda, ningla, yāngla, pangshapla tongda PROHOli leikashi a kathā awunga rida mashoklakrangsai, naodala mashokluimana.

²⁶Chithālala, Manassehna PROHOli Judahwuitungli malungvāt ngasak kahai chiwui vang awui malung kakang masuitāthuwa.

²⁷PROHOna hānga, “Israelli ina horphui kahai thāda, Judahlila iwui mikyanwui eina horhaora, kala iming chili leira da shim kapangkhui kahai Jerusalem chi ina horhaora.”

²⁸Josiahwui otsak kala ana kasāsā saikora chi Judah Awungabingwui Thotrinchān Lairikli makapiserhaimala?

²⁹Awui atamli Assyriawui awungali samphang khavai Egyptwui awunga Pharaoh Necona Euphrates kongli vai. Ali samphang khavai Josiahla vai. Megiddo apamli kathei tharan Pharaoh Necona shaothathaowa.

³⁰ Awui raobingna siguigarili sanglaga Megiddowui eina Jerusalemli kathi eina khuiunga, kala awui chikhurli chifahaowa. Ngalei chiwui mibingna anaomayara Jehoahazli tharchisinmida avāva̱wui mahut awunga sanga.

³¹Jehoahazna mungkaphok atam tharan kum maga̱da kathum kāshunghairasai, kala ana Jerusalemli kachāng kathum munga. Ava̱va̱li Hamutal hoi, kala Libnahli khalei Jeremiahwui naongalāva̱na.

³²Avāva̱ ngarāwui kasā athishurda ana PROHOwui mikyanli makaphā ot sai.

³³Kala Hamath ngaleiwui Riblahli Pharaoh Necona ali narhaida Jerusalemli maung ngasakthuwa. Kala aramli kum kachida shai khuida lupāsā kg. thing kathum shāmati, sinā kg. thumrada mati da michinga.

³⁴ Pharaoh Necona Josiahwui nao Eliakimli avāva̱wui pamli awunga sanglaga aming Jehoiakim da ngacheimihaowa. Kha Jehoahazli Egyptli tukvāhaida chili athisanghaowa.

³⁵Jehoiakimna Pharaohli lupāsā eina sinā shai chi mi, kha Pharaohna kakaso athishurda shai chi mikhavai Jehoiakimna ngalei chiwui mibingli pheisā ngashaikhui. Pharaoh Necoli mikhavai lupāsā kala sinā chi, mi kachiva̱na samkaphang athishurda ngalei chili khalei mibingwui eina kazipkhui.

³⁶ Jehoiakimna mungkaphok tharan kum maga̱da phangā kāshunghairasai, kala Jerusalemli kum tharāda akha munga. Ava̱va̱wui ming Zebidah hoi, kala Rumahli khalei Pedaiahwui naongalāva̱na.

³⁷Avāva̱ ngarāna kasā tākam eina makaphā ot chi anala PROHOwui mikyanli sai.